موضوع السـاعة .. و منتظَـر .. والحذاء ..

من البداية :

اليوم الاثنين15/12 صباحًا ... عشرات (ولا خمسات) الدعوات على الفيس بوك تدعو لمشاهدة أو التعليق أو أي حاجة لـ "صحفي عراقي يضرب بوش بالجزمة" ...

لم أعقب ...

المسانجر الصباحي:

شفت اللي حصل ،،، بوش اتضرب يا رجااالة ،،،، بالجزمة ...

إيه ؟؟ ما عرفتش ؟؟، ما تابعتش؟؟ ، طب ويا ترى الشارع المصري عامل إيه ؟؟ و يا ترى الناس بتقول إيه دلوقتي ؟؟؟

نعم ؟؟ إيه ؟؟؟ ... ما يولع !! ...

إنتا ماشقتش المنظر، ده كان فظيييييع ، ده كان رهييييب ، ده كان ........

لأ ، ولا تفرق معايا !!

إزاي ما تفرقش معاك، بوش اتضرب بالجزمة ، يعني التاريخ هيقول ، والتاريخ هيعيد ...

أنهي المحادثة ...

تسجيل دخول لآخرين ...

(كنت قد قررت صبيحة ذلك اليوم، ولغرضٍ في نفسي، وبإيعازٍ من عزازيل أني لن أمارس هوايتي المقيتة الصباحية في متابعة العديد من الصحف اليومية، وقراءة رؤوس موضوعاتها، وعددًا من مقالات الرأي .... إلخ ) ولكن يبدو أن السفن لا تأتي ولا تروح !! ...

قبل حتى (إزيك يا هيما ،،، عامل إيه) : شفت اللي حصل ؟!!

طب نقول : صباح الخير الأول !!

صباح الفل يا سيدي ... هاااا شفت اللي حصـل ؟؟؟

أيوة حصل ف إيه ؟؟؟

إنتا لازم تكتب عن الموضوع ده ف مدونتك ...

أيوة اللي هوا إيه بقى ( لا أعلم لماذا لم يدر بخلدي أن يكون "اللي حصل" ده هو نفس الموضوع الذي تجاهلته تمامًا وهو ضرب بوش... إلخ) ...

ـ بوش اتضرب بالجزمة في .......................

آآآه ... عرفت !!!

أعود لمحادثات سابقة (كانت قد تناولت الشأن الجزماوي البوشي)

ـ هوا موضوع ضرب بوش بالجزمة ده مهم قوي كده !!!

.

.

وأعود إلى صفحات الفيس بوك، وأفتح عددًا من المدونات ...

العناوين كلها متشابهة :

سلمت يداك يا منتظر

فعلها البطل ، ووضع قبلة الوداع لبوش

الجزمة الطائرة

بالجزمة ..حمزة زوبع

بوش والحذاء الطـائر .. وائل السمري

ويرى فيها ابن شلتوت فرصة للتفكه : ضرب "بوش" بالجزمة عوَّض المصريين عن هزيمة الأهلي !!

وربيع الحافظ : حـذاء يسع بوش ويزيـد

وجمال سلطان يبرر الفرحة الطاغية !!

وسليمان جودة يراها واقعة فيها بلااغة !!

وأحد قراء المصريون يكتب على هامش ثقافة الحذاء

و شقير يشكر منتظر !!

في المدونات ممكن تلاقي كثييييير طبعًا / للأسف ماجاتش فيه، أغلى حذاء في العالم، و
عقبال اللي ف بالي،، وأقوى من الرصاص، الجزمة بمعناها ، وتنظيم الجزمــة ، وحذاء منتظر الزيدي ، ولا عبارات رااائقة من نوعية : عندما تموت ضمائر الحكام تحيا أحذية الشعوب !! والمقارنة بين جزمة صدام وجزمة بوش، وما وراء جزمة بوش ، وأنا بضم جزمتي لجزمتك يا ولدي !!! والحذاء وصناعة التاريخ، وشوز الوداع !!

وبالمرة شعبان عبد الرحيم يغني لجزمة منتظر !!

وناس معترضة على ما حدث وترى فيه إهانة للصحفي والصحافة (ربما)

يكتب طارق الحميد اليوم : ديمقراطية صحافة الأحذية

وعلي إبراهيم يعتبرها همجيـة : تعميم الهمجية

وناس خرجت تهيص وتزيط وتتضامن وتقطع ورق !!

.

.

قناة الحياة تنفرد (وتنثني) بـ ساعتين ونصف حول الموضوع، وتغطية إخبارية إعلامية (لا مثيل لها) شرَّفت الإعلام المصري (حد تعبير المسلماني!!!) ...

ومنى الشاذلي تثني على " نيشان" منتـظر، لأنه أصاب الهدف بسرعة في المرتين ،،، ممممم لم أتابع الحلقة !!

عدد من المواقع الإلكترونية سارع كتابها في صنع مقالات جاهزة، وكان أكثرها ساخرًا بالطبع عن " الجزمة، ونفسك تضرب مين بالجزمة، بلا ،،، بلا ،،، بــلااااا ".. و عملوا له لعبة ع النت والشاطر اللي يصيب الهدف
لأ لعبتين

.

ياااالهووووووووووووووي ...كــل ده؟؟؟؟؟؟

.

لم أذكر أنــا بهذا الصدد (بمناسبة الأرشيفات) أني كتبت موضوعًا قلت فيه إن ( مبـارك ع الجزمة) ...

((بس انت من حقك لانك شايف ان الامر لا يستحق انك تتجاهل الموقف !! وتفضل على رأيك مش تنساق وراء القطيع))

****************

صبيحة فوز الرئيس الأسود بالبيت الأبيض (باراك أوباما) كانت شوارع الهرم وفيصل مزدحمة(بالتأكيد ليس بسبب فوزه)، وعرفت الخبر من سائق التاكسي (في إشارة دالة إلى أهمية وخطورة الأمر) وبدا الأمر بالنسبة لي في بادئ الأمر حاثًَا على السعادة، وإن كتبت (بعد تفكير) موضوعًا يصب في خانة الترقب والتفكير بدلاً عن المبالغة بالفرحة لانتصارٍ ليس لنـا !! (إنتا بتقول أوبـاما يابن الـ***) ...

ولكن الأمر كان مهمًا ، وسبقه العديد من أيام الانتخابات الرئاسية الأمريكية، وتبادل المرشحين الكلمات واللقاءات، الحد الذي جعل ابنة خالي (وهي في الإعدادية) ترشِّح أوباما، وتطالب بترشيحه.. ، كان الأمر كما صنعته الميديا/ الإعلام الأمريكي حدثًا جللاً ، وكان الفوز حدثًا مدويًا لاعتباراتٍ عديدة (وجعلتها أمريكا عديدة،،،، ليس هذا موضوعنا الآن) ...

أما منتظر ، وبوش ، ... و الجزمة !!

لا أعلم !!

صبيحة الاثنين أيضًا (15/12) خرج العراقيون آلافًا (فيما بدا أنه فجأة) ينددون بالاحتلال الأمريكي للعراق ، ويطالبون بالإفراج فورًا عن منتظر ... البطل!!

ظهر الاثنين كان اتحاد المحامين العرب ، بيعمل ، ويسوي ... إلخ إلخ إلخ ...

واضح إن الموضوع كبييييير إذًا !!!

فليكن ....

ولكني أحببت أن "أسجِّل" هنا أيضًا ، وعلى صفحتي الخاصة جدًا أن الأمر أصلاً لم يثر فضولي حتى في البداية، واعتبرته عاديًَّا !! ألو لم أهتم بكونه حدث أو لا !!

ولا أعتقد أنه أمر فارق، وسيغير التاريخ كما سمعتهم يتشدقون بالأمـس !!!

ببساطـة ، شوية كده ، ويأتينا "خبره" ، ونندد ونستنكر ، ونشجب ....

بعدها سيأتي (أوباما ) يقول : مكنش ليكو حـق يا وحشـيـن !!

وخلصت !!

في النهاية أقول لكم ما تقوله الأم الطيبة لأبنائها البررة: التفتوا إلى دروسكم، ولا تنشغلوا بتوافه الأمور، حتلى لو كل الفصول اللي جنبكم بتلعب كورة كل يوم، ذاكروا إنتو ، عشان تنجحوا وتطلعوا الأوائل ( بلا نيلة) !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

*** الصورة لسـاعة من الطبيعة، ليست من العراق، ولا من أمريكا!!، ولا حتى من مصر !!