حلو قوي اللي بيحصل ده!
كده كل محاولات صبرك عليَّا هتنفد!
النت بيقطع للمرة العاشرة
وأنا مش لاحق أقول لك
وإنتي أصلاً ولا هتفهميني!
متخيِّل شكلك دلوقتي ونرفزتك وجنانك!
ما أنا أصلاً متغاااااظ!
بس أعمل إيه حظك ..كده!
هبدأ أهدي ف نفسي وأفكر في كلامك!
"إنتا عارف إني قاعدة ف سايبر"
"لو مشغول قول لي"
"بتكلم مين أهم مني"!
"أف ..زهقت، أنا قايمة"!
يااااه!
وأنا كل نرفزتي وغيظي من النت ومن الشركة ومن الاختراع السخيف أصلاً ده بيروحوا!
لما أشوفك مش عارفة تفهميني
وتقولي لي "طيب"
أو "معلش"!
اشمعنى الناس كلها فاهماني!
وليه انتي بس اللي بستنى اليوم كللللله يعدي
علشان آجي أرمي لها صباح الخير!
ما صباح الخير اتقطعت 100 مرة انهاردة!
ولا عرفتيش تلميها
أو تبصي لها
كرمشتي ف وشك
ورجعتي البيت مش طايقة نفسك
وكان طبيعي إنك تتخانقي مع مامتك
وما تجيش تقولي لي "بسببك"
مش هنهزر!
ده بسبب النت
يعني قضية شبكـة عالمية!
.....
قد إيه أنا بارد .. فعلاً !
بس جنونك بيخليني أفكر
مش عارف ليه
ماهو كده كده إنتي هتمشي
وأنا هفضل كده "مرزي" لوحدي
أكمل شغلي وأفكر فيكي
وأقوم وأقعد مش على بعضي
وأرن تكنسلي
أبعت ماسيج ماترديش!
فلوحدي بتجاهل كل التصرفات دي وأفضل أفكر
يعني مش كان أحسن ليا وليكي
بدل السايبر والنت
والخنقة والزحمة
نرجع تاني
ونسيب التكنولوجيا وبلاويها ونفضل كده متصالحين!
وكل ما اشتاق لك آآجي لك
تحت التينة أو الجميزة
ونقزقز لب ونضحك
قال يعني اتنين حبيبة
ونسيب النت في حاله، والشغل في حاله
ونخللي الخنقة للبواب ومديري في الشغل
وسواق الميكروباص وتباعه
واليوم اللي النت يقطع فيه
أقعد أفكر فيكي وبــــس!
مش كده أحسن؟!
ولا إيه ؟
**************
(تاني )
حلو قوي اللي بيحصل ده!
وأهي جت من عنده!
مانتيش مضطرة تمدي لساعة جديدة
هتقومي، خلاص!
ما "بنااااقص " أصلاً
وهتفرق إيه؟
بإمكانك تفتكري كلامي اللي بقوله
كل مرة
أنا راجع أأه،
طب والأولاد،
واااحشااااني صحيح!
دلوقتي أحسن!
هتقومي تشوفي الدنيا والناس حواليكي
مش ناقصة ساعات انتظار
عشان كلمة!
كلامي كالعادة!
ولا بيودي ولا بيجيب!
أهي جت من عنده!
"معلش حبيبي
لما يصلحوه بكره أبقى أكلمك!"
************
(تـالت)
حلو قوووي اللي بيحصل ده!
أهو كده مش ناقص حاجة خلااااص
تبرير تكنولوجي
هنعمل إيه ؟
ازيك يا ابراهيم
ردحذفمن زمان مقرأتش ليك
تحياتي
تبرير تكنولوجي
ردحذفأحلى سطر في الكلام دا كله
وملهمة جدا
يالهوووووووووووووي
ردحذفحلوة اوووووووووي
يخرب بيت مخك
sorry
يعني
:)
حلوة أوووي تبرير تكنولوجي دي فعلا :)
ردحذفمختصرةو جايبة المفيد ....
عاجبني النص كله في العموم،، خصوصا اني من البني آدمين اللي بيعانو من كوارث النت المنزلي إيااااه
بحب ازاي ممكن تعمل من حدث يبدو " عبيط " و هو مش عبيط خالص .. حدوتة
تسلم إيدك :)
أسما:
ردحذفافتقدت مرورك فعلاً، بس إيه قريتي كده ولا لسه ؟
ـــــــــــــ
هدى: كويس إن عجبك منها حاجة:)
أي خدعة
ـــــــــــــــ
يخربه ولا يعمره يا سهاد، مش مشكلة
نورتي
ــــــــــــــ
حلو حدث يبدو عبيط ، ده أسخف حدث في الكون دلوقتي، وابقي اسألي