صلاة ..اسمـها.."التراويح"

أي حد يطول ف الصلاة طوول السنة، يقولوا عليه بيصلي "التراويح" ولا إيه ؟؟؟

السُنَّة الحاضرة جدًا في رمضان، مش عارف أوقات بتخيل إن الناس دي كللللها مش مدركة إنها"سنة"، أو إن نصهم مثلاً لو حد قال لهم دي مش فرض، هيجروا !!!

لأ طبعًا ...

لأنه ف رمضان الناس بتحب ـ تلقائيًا ـ تقرب من ربنا أكثر

التراويح دي بشوفها من الحاجات اللي بتدي أمل قوووي ، ف إن الناس لسه فيها الخييير ده كللله ، والزحمة دي كلها على صلاة سنة تؤكــد إن الناس لسـه قريبة من ربنا قوي ، رغم كل المظاهر اللي بتبان بعيدة، والأصحاب اللي بيتجمعوا ف المساجد ولاد وبنات ، وكده ... بقى !!

.

زمان كنت بحب أصلي التراويح في مسجد يبقى مش زحمة قوي، مش عارف ليه، بس بحس كده بالتميـز، لما تبقى الدنيا زحمة، كنت بحس إنها مش فارقة أصلي، ولا ما أصليش، الأمر اختلف جدًا طبعًا لما الواحد راح يصلي ف الحرم، حيث الزحمة أساس من أساسيات الصلوات الخمس أصلاً ، لكن ولأني شخص ملول بطبعه، كنت بصلي كل ركعتين ف مكان J ....

.

في صلاة التروايح بتحس بطعم تاني خااالص للصلاة، سبحان الله، بتفضل مركز مع القرآن(المفروض يعني) أوقات كثييير (خاصة لما ربنا يكرمك بإمام صوته حلو) تبقى بتسمعه كأنما لأول مرة، ما بيبقاش نفسك الراجل يبطل قراءة، ولا يركع خااالص، ،،،

الغريبة بقى إنه بمجرد ما يسلم نفسك الأمارة بالسوء توَّزك تقوم، وتقول لك "كفاية كده"، ماهو ده حاجة برضو تبين لك إنك لسه جوا مش صافي قوي، يعني مفيش شياطين، وكنت مبسوط وإنتا بتصلي، والناس كلها حواليك بتشجعك، لكن برضه لسه جوا محتاج كثيييير ، محتاج يصفى أكثر ، محتاج يقرَّب من ربنـا أكثر، محتاج يعيش رمضان بقلبه مش قدام الناس بـــس ....

محتاج قوووي تعرف .. إن التراويح ليها تكملة ف البيت، لوحدك، بينك وبين ربنا بـــــس

تدعي قووووي وتقرب قووووي

ماهي فرصة أبواب السما مفتوحة جدًأ ، والشياطين مصفدة، يعني مفيش غير نفسك الأمارة بالسوء، وشوية شياطين إنس عمالة تتنطط، سيبهم كلهم ... والجأ إلى الواحد الذي لاينام ولا يغفل ولا ينساك ..

قول له الحمد لله يااااارب، عصيتك كثيييير، وبعدت عنك كثييير، نفسي أقرب قووووي يااارب ، نفسي أبقى كويس أكثر من كده ، الناس شايفيني كويس، بس إنتا عارف أنا عامل إزاي !!، بتسترني وتسامحني لأنك كريم وعظيييييم، وأنا عبدك الضعيف قوي، الفقير قوووي، ارحمني برحمتك، واشملني بعفوك ... يااااااااااارب

ربنا يتقبل مننا جميعًا ...

. . . .

و .. رمضـان ..كريم .. مع إبراهيم :)