العالم بيتطوَّر .. جدًا

 في هذا الصباح العادي جدًا .. لم أكن أنتوي (زي ما قال) أني أكتب شيء جديد،

 لكن قصيدة (مصطفى إبراهيم) الجديدة .. قلِّبت المواجع، وفكرتنا بالذكريات، أيام ما كنَّا بنكتب تدوينات مرفقة بفيديوهات،

 الجميل هذه المرة إن القصيدة بصوت مصطفى نفسه، وإن الكلمات معاها ..

 اسمعوا! 

 

هيحزّموك ...

زي الجنيه ف الأستك

هيسيبولك الفُتات

و يبيعولك الأمل ف الإعلانات

و الهجرة لبلاد البلاستيك

و ف خطبة الجمعة عن الجنة

و قُولِة استنى.. فات الكتير هانت خلاص

لحد ما خيل الحكومة..

يدوسه عَجَل الميكروباص

النظام العالمي بيقتل

أوقات كتير ..

من غير رصاص

الهوا ..

هيحَصّل المَيّة اللي بقت ماركات

تعددية تعني تعدد الشركات

حرية تعني حق فتح القفص ..

على الناس اللي ملهاش باب

الأخطبوط الرأسمالي اتساب

على الناس اللي ملهاش حظ

على الناس اللي ملهاش فرص

حياتك..  مهمة لبياعين الحلم

وفاتك..  مهمة لبياعين القُرَص

حسابك حتى في قبرك ..مهم

رخصة الجنة مهمة لبياعين الرُخَص

و لبياعين الدين

و لبياعين الآخرة اللي هتنصف المساكين

"العالم بيتطوّر" ..

يمشي إسم مسرحية..

أما الحقيقة المضحكة المُبكيّة..

العصاية اللي بتوقّف و بتدوّر.. بتمشي..

من إيد صحاب الجنة..

لصباع صحاب البندقية..

لجيوب صحاب البنك...

دم الغلابة بيتحرق ف التانك...

شامم ريحتهم و انتا بتفوّل ؟...

الغرب هيموّل..

إعمار ِبيار النفط..

لضمان زيادة منسوبات الشفط...

و ضمان بقائك عبد متسوّل...

يا زميل الكوكب المنكوب..

رَكب الحضارة ماشي بالمقلوب...

يا زميل المنطقة المنكوبة...

رَكب الحضارة كان لازم له ركوبة...

العالم .. بيتطوّر...

و انتا شمعة بتتحرق علشان .. برج التجارة ينوّر..

..العصاية هي هي و شكلها بيتحول

العالم بيتغوّل

و انتا واقف ف وش الطيارات بالطوبة..

هتعيش حمار و تموت حمار...

أخرك تحس بإنتصار لما...

بتولّع الأعلام..

و تدوس على صورة إصحاب الدولار و القرار بالجزمة..

القناة ..

في نشرة الأخبار..

هيقولوا عنك فوضوي و قاتل..

نفس القناة وقت اللزوم ..

هتطلّعك مقتول و بتناضل..

فيه ناس كتيرة أكل عيشها الأزمة..

و ده عيبه..

إن هذا العالم صوته من جيبه

و مفيش حقيقة صعب تتأوّل..

و دي ناس تعرف تبيع الآه

زي ما بتعرف تبيع اللأ

الميديا بائع حق... متجول..

بشرى لابناء العالم التالت م العالم الأول

بشرى لابناء العالم الهمجي م العالم الإنسان

العالم الحر اللي ما بيضربش ف المليان

بس بيجوّع بلاد لحد الموت

القاتل الشيك المحترف...  ابو طلق من غير صوت

فيه الجيوش ما بقوش..  لابسين هدوم ميري

و الطيارات ...ما بقتش بتوّّزع منشورات اليأس

و البنوك ..مش هيسيبوك تتحبس ...بالعكس

النهارده حاطط إعلانات ع التاكس

علشان عليه أقساط

بكره تتعلق على هدومك...  زي اللعيبة ف الماتشات

عالم جديد ..

هتخشه بمزاجك قبل ما نزُقّك

الكهنة فيه.. لابسين بدل و كرافتات

هيأكِّلوك الحقيقة بمعلقة ف بقك

و كسر حُقّك ياللي مش عايز

عالم ديمقراطي رأسمالي سعيد

الشركة فيه...

اقوى من الاوطان

غضبان ؟...أكيد غضبان

مربوط ف ساقية و بتجري في مكانك

مسجون و مش عارف وش سجّانك

عايز تخبّط كوبايات الحبس ع القضبان

لكن هتعمل إيه ...معذور

أمريكا عملت سجن من غير سور

أمريكا رابطة الناس ف بعضيهم

أمريكا رابطة الناس و مربطّاك بيهم

تدّن في مالطا قد ما هتدّن

أمريكا هتفضل بتحب البشر جدا...

و بتعمل جِميل فيهم..

فيها الخير يا هل ترى ولّا فيها فلوس؟

أمريكا فيها الحلم

و بلادنا فيها كابوس

الناس تخاف ..

امريكا تحميهم..

الناس تجوع..

امريكا تديهم ..

تِكسي بالإيد اليمين اللاجئين ...بعد ما إيديها الشمال تعرّيهم

شركة بتهِدّ البلاد و شركة تبنيهم

شركة بتبيع السلاح

و شركة بتطبطب على اللي يموت

العالم بيتقسّم دول...

العالم بيتقسّم بيوت...

العالم بيتقسم لبني آدم و لبنكنوت...

مكتوب على شهود البلاد...

الممسوحين بأستيكة...

أنتَ حر ...

ما لم تضر...

أمريكا.

............................................

 

الكتابة الجميلة .. وما بعدها :)

يحدث أن يكتب أحدهم كتابة ما، فيصادف أن هذه الكتابة تُعجب الناس، ويكتشف البعض أن هذه الكتابة هي كتابة "جميلة" فعلاً، ويحدث أن يدور الناس بعد ذلك حولها، لاسيما المهتمين بالأمر الباحثين عن هذا الجمال النادر في كل شاردة وواردة، ويحدث أيضًا أن يُقام لهذا الأمر احتفال ..

 منذ فترة ليست بالقصيرة اعتاد الكتَّاب أن يقيموا في المكتبات شيء اسمه (حفل توقيع) وهي عادة سنتها المكتبات الكبرى (فيما أعلم) لكي يعرفوا القرَّاء على مكانهم، ويجذبونهم إليها، ثم وجدت دور النشر فيها فرصة للتعريف بالكتَّاب الجدد، فأقاموا حفلات التوقيع تلك ودعوا الأصدقاء إليها، وما إلى ذلك ..

أقول هذا الكلام كله لأشير فقط إلى أني ذهبت بالأمس إلى حفلة توقيع كتاب الصديقة (أريج جمال) "مائدة واحدةللمحبة"

وشعرت لأول مرة بأن هذه الكاتبة وهذه الكتابة الجميلة تستطيع أن تجمع حولها "المحبة" بالفعل،

للست على يقينٍ من أن كل الحضور قد قرؤوا لأريج، أو حتى أحبوا كتابتها، ولكني أنا فعلت، وكنت سعيدًا حقًا بهذا الاحتفاء الذي تستحقه ..

كتبت د.شيرين أبو النجا في عدد أخبار الأدب هذا الأسبوع عن المجموعة مقالاً جميلاً (الجسد كأداة ومادة للتعبير)   

 وكتب الصديق إسلام أنور أيضًا عنها (أمنيات غائبة وفقد دائم)

وحاولت أن أكتب أنا أيضًا شيئًا عنها .. (دوران العالم بين الشعر والموسيقى)

دار الحديث بالأمس عن كتابة أريج طبعًا، فتحدث الصديق "الضوي" عن كتابتها التي تجمع بين الشعر والنثر معتبرًا ما تكتبه نصًا مفتوحًا، وتحدثت د.شيرين أبو النجا عن كتابة أريج المتميزة للجسد، وأنها سعيدة بهذا المستوى الاحترافي الذي كتبت به مجموعتها، وقرأت "غادة خليفة" قصة (مائدة واحدة للمحبة) بأدائها المتميز .. 

أستطيع أن أرشح لكم هذه المجموعة للقراءة بشدة بالتأكيد، ولكن ليس هذا الشاهد أصلاً، القضية كلها أن "أريج" استطاعت أن تجمع بالأمس عدد من محبي الكتابة، وأني قابلتهم .. هذا كل ما في الأمر!

..........

أخبار الأدب، بالمناسبة، كتبت أيضًا عن الرجل الجميل الذي لا يعرفه أحد "جار النبي الحلو"

 والذي استطعت أخيرًا أن أوفِّر واحدة من رواياته الكترونيًا .. وهي رواية (حجرة على السطوح)، لم أقرأها بعد، لكني أشعر أنها ستعجبني.

 .

 فليبارك الله لنا في هذه الكتابة الجميلة، وفي هؤلاء الأصدقاء الجميلون،

تلك كلها أشياء  تهوِّن علينا الكثير من قبح وبؤس هذا العالم!