كلام بيني وبيني..

مخاصمني بقالي زمااان!

 رغم إني ما عملتش حاجة فيَّا، ولا زعلتني ف حاجة، وتقريبًا راضيني يعني!

 بس حاسس إني مخاصمني برضو، وعاوز أكلمني عشان أسمعني ... بــس!

.

ليه بقى؟!

مش مهم ليه، على فكرة، المهم إزاي ؟!!

 إزاي تكلمك وتسمعك؟!

حاجة كده، عشان توصل للحالة اللي كتبتها في (التحديق في العيون)* (( الآن لا أثر لآخرين على ردود أفعالى..))

رغم إنه كان سبقها (لا أثر لي عليَّ) ..

 أعتقد إن ده مش ممكن يحصل إلا في القصص، لا أثر لي علي ولا للآخرين!

 أمال الأثر لمين؟! لصحاب الأثر؟!

 لكن عمومًا أنا هنا ودلوقتي راضي بأثري عليَّ، عشان كده عاوز آخدني .. وأكلمني!

..

في ظني إني لما بكلمني برضو مش بكتفي بيًا، فلو تم الاستغناء عن الأحياء، فحتمًا ولزمن ولابد .. ستتم الاستعانة بالأشياء، ساعتها ممكن أكلم القمر، وأناجي الليل، واضحك لوردة حلوة (أو زي الوردة الحلوة) .. وممكن الموضوع يتطور لإني أراقب مقعد وحيد في الحديقة  أو حتى أربي حجرًا في بيتي  : )**

..

ها، عاوز تقول لك إيه بقى يا أوستاذ إبراهيم؟!

عاوز تقول لك ـ مثلاً ـ إنتا صح؟! وبرافو عليك؟! .. وهيا دي طريقة التعامل الصحيحة؟!

طب ما إنتا مش محتاج تقول كده لنفسك؟!

تقوله لحد تاني يتفق معاك فتحس إنك "لست وحدك" والكلام ده كله؟!

 طب لو خيِّب ظنك ؟!!

مش خيب ظنك عامدًا بالمناسبة، لأ .. عادي .. اعتبرها على طريقة (اللي يكون حاسك قوي ده مايحسكش) فاكر؟!

يبقى هترجع ليك، وتقول لك وتأمِّن على نفسك ..

 قشطة

 إنتا كده صح ...

 عارف صح إزاي ؟!!

 صح وش : )

ــــــــــــــــــــــــــــــــــــــــــــــــــــــــــــــــــ

* مجموعتي القصصية القصيرة .. والإشارة هنا إلى القصة التي تحمل عنوان المجموعة 

** رواية الطاهر شرقاوي الجميلة :)