أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الأربعاء، 18 يوليو 2007

بــدون ..تعليق !ا

فجأة أتخد( أنا) قرار رقم 7328 بأن أكتب فكرة من 933 فكرة تأتيني بين اليقظة والمنام، ولكن يبدو إنه (والحمد لله) انشغل المدعو( أنا) لدرجة إنه( أنا) لم يعد قادرًا على أن يكتب أفكار( أنا) الآخـر!! ، وتقريبًا أنا .. و أنا .. زعلانين من بعض دلوقتي !!
قلت أكلمكم عني بما إني زعلان مني، بس "والله يا جماعة غصبن عني"، ما أنا شايفني مشغول ف الشغل لشوشتي، وواضح إنهم اكتشفوا فيا قدرات وهمية خيالية، بدأوا يستغلوها بذكاء وفعالية لدرجة إني بقيت أخرج من الشغل ع الشغل، وأروح الشغل ألاقيني ف الشغل، وأوقات أرجع من الشغل ألاقيني شغاااال !! ، الناس طبعًا هتفتكر تهريج تهييسي ده بيحصل !! لكن الواقع لما يقع بنقول له سلامتك، و" حوش يا حبيبي اللي "وقع" منك" ، من هنا بعلن لي إني كنت هموت وأكتب عن وسط البلد، بل تقريبًا كتب ف عقل مخيلة وعيي الباطن كيف أن شوارع مصر أصلاً بطبعها ملهمة !! ،وكيف إني فكرت إن الناس اللي ساكنة ف الأماكن دي المفروض تكون(بطبعها) مبدعين، بل إنه استوقفني قووي منظر واحدة( للأسف كانت واحدة) واقفة ع البلكونة بتبص على تمثال عبد المنعم رياض من بيتهم !!، طب تخيلوها إنتو دي !!
ده هام، الهام التاني قفشتني بفكر برضه، ولمدة من 3: 4 مرات أكتب عن الصانوية العايمة مهنئًا مباركًا جمالاً لإخواننا المتخرجين من (عنق الزجاجة) (( كانوا بيقولوها لنا كده زمان دلوقتي يمكن بقت فتحة البطرمان ولا حاجة !! ))، والذكريات الكدابة، و الأشواق الكدابة!! ، وآآدي الليل بعذابه وناره !!، وأول مرة شفت كلية الآداب فيها، وأحلامي الطوباوية المستحيلة بكلية السحرة المشعوذين(الهندسة) !! إلخ إلخ !! وفكرة كليات القمة والقمامة ، وما إلى ذلك من هواجس وظنون!!
كذلك لقيتني إمبارح وبدون لاوعي سياسي بقارن بين ابن الجزماتي وابن الحلاق وابن الدكتور ، وابن ...( ربنا يجعل كلامنا خفيف عليهم !! ) ، بس خليه ده على حين روقان
*
*
المدونة مغلقة للتحسينات

هناك 31 تعليقًا:

أميرة البلطجية يقول...

تصدق معرفش انك عندك مدونة اسمها انا وانا؟
هههههه
يله كويس
انت اللي ليك الاسبقية طبعا
عموما حنستني المدونة تفتح تاني
باىىىى

عاشقة الوطن يقول...

هو ايه اللى بيحصل هنا
عشان ابقي فاهمة بس
المهم انك ترجع بسرعة والتحسينات تخلص اوام اوام

مستنينك بقي
ربنا معاك ويفك خنقتك ديه وتكتب تانى وتخلص الشغل اللى انت فيه على طول

يالا سلاااااام

نهر الحب يقول...

عارف يا ابراهيم انا كمان ابراهيم كنت زعلانه منه و نهر كانت زعلانه مني عشان انا زعلانه منه

هاهاهاها

بجد ضحكتني

الاغنيه اكتر من رائعه بعشقها بس شوفلك حل لما التعليقات بتيجي الاغنيه بتروح

ابقي زورني ماشي

محمد العدوي يقول...

هههههههههههههههههههه

هو دا اللي بيقولوا عليه سمك لبن حاجة ساقعة ..


السقالات اللي انت حاططها دي هتتشال امتى ..

محمد مصطفى يقول...

انت بتهرج على فكرة
ارجع يا عم لعقلك

Lemonada يقول...

اي دة يا عم
بقالي فترة مش جاية
وانت بقالك فترة مش جاي على مدونتي
والاقيك بتكلم نفسك
هههههه
عارف لي بضحك
اصلي بكلم نفسي انا كمان اوقات
عشان ما فيش حد حيفهمني اكثر من نفسي انا
هههههه
حتى ولو في تحسينات في مدوتنك
دة مش حيمنع انك تزرني
صح
بانتظارك

The Alien يقول...

فكرتني باللي أنا فيه
أخرج م الشغل ع الشغل
أرجع م الشغل الاقيني ف الشغل

أتمني ترجع بسرعة
تحياتي

§a§a يقول...

ياراجل احمد الله على نعمه الشغل فى غيرك منهمكين فى الفراغ ليس لديه وقت للشغل كل وقته البحث عن شغل


هههه

إبـراهيم ... يقول...

أهلاً أميرة ... معلش اتأخرت عليكي :) بس الغريبة إني كنت أعرف مدونتك من مدة ، بس شكلي معلقتش عندك ، عمومًا حصل لنا الشرف
************

و.
.
.
المدونة تستقبل الزوار

إبـراهيم ... يقول...

ياااااااااااااه يا رودي، إي الغيبة الطويلة دي كلها ؟؟؟.
.
أنا موجود أهه يا ستي ، بس انتي ما تغيبيش

منورة
*********************
نهر الحب : يااااا قهلاً و سهلاً يا ستي ، أنا بقول لك ما تزعليش مني أهه
وويارب منوراااني كده على طووول

******************
العدوي العزيز : أضحك الله سنينك ، بس ده بيقولوا عليه سمك لبن عنااااب ، مش بحب أي حاجة ساقعة ...

يعني إيه (سقالات) ؟؟ اللي هما إيه؟؟
منور يا دُكتــر

إبـراهيم ... يقول...

مادو ... للتحسينات،، مش نهائي يا شاعر ... اطمئن لساااني بجناني

*************

ليمونااااادة المنعشة المنعنشـة ، أولاً نورتيني جدًا ، فينك يا بنتي من زمن ، ثااانيًا صحي جدًا إنك تكلميكي ،،،، صحيح ، ياريت تبقي تسلمي لي عليكي كثييير ،،، أكيد هعدي
:)

محض روح يقول...

شكل الحياه عندك زحمه
حبتين ربنا معاك يافندم
ياريت متتاخرش
:)

shahrzad_storry teller يقول...

ايه يا ابراهيم ليه كده الصلح خير صالح انا التاني وارجع بسرعة
بص اركب تاكسي يا سيدي ماتخافش على حسابي بس اوعي تتوه

مَلَكة يقول...

طب ده من ايه ولامؤاخذة يعني؟
سؤال معلش
انت بعد ما هتخلص التحسينات هتفتحها محل كشري وهتعمل افتتاح ودي جي وكدة يعني؟
عامة لو كدة قولي ع معاد الافتتاح عشان ما اكلش قبلها بيومين

إبـراهيم ... يقول...

بشوي :

كلنــا في الهم ..عرب ...

خااالص تحياااتي ... يا رفيق :)

******************
صاصـا بيه ،،،، منور

تعرف يا مصطفى المشكـلة فعلاً إن محدش عاجبه حاله ، بس هوا أبو العلاء الله يرحمه كان قالها زمااان : تعبٌ كلـها الحيــاة

دمت بود .... و استغل وقتك كويس ، لغاااية ما تتشغل

reri يقول...

الثانويه العامه
علي
عبد المنعم رياض
علي إبن الدكتور
علي إبن....علي الشغل
إيه التداخل بينك وبين اللي معاك ده
هم كام واحد
مستنيه التحسينات تخلص

سلامااااااااااات

إبـراهيم ... يقول...

ديــنـــا ::
منورة ، الدنيـا عادةً .؟.. زحمـــة ...


لن أتأخـــر ... هـذا وعد :)


تحيـــة
**********

شهرزاد ، عاش من سمع حكاياتـك ، فينك يا بنتي من زمااااااان ، ما تخافيش .... أنا مصالحني ، من غير وسائل مواصلات ، يا بنتي أنا .. معـايا .. أسيبني إزااااي بــــس ؟؟؟

ابقي تعالي عططول :)

إبـراهيم ... يقول...

ملكـة : طال غياااابــــك ... أضحك الله سِنـِــك ... مش هقلبها محل كشـ{ي ، ... بس مفيش مانع من الـ دي جي .. عشان خاطر عيونــك ...

نورينا على طووول

تحياااااااتي
********
روبي : إزيك يا صيدلانية المدونين ... إزيك ، الدنيا كلها لخبطـة يا بنتي اليومين دول

ولا ما وخداش بالك ....

ما تبقيش تغيبي جوي كده بجى

Radwa يقول...


مشغول ف الشغل لشوشتي، وواضح إنهم اكتشفوا فيا قدرات وهمية خيالية، بدأوا يستغلوها بذكاء وفعالية لدرجة إني بقيت أخرج من الشغل ع الشغل، وأروح الشغل ألاقيني ف الشغل، وأوقات أرجع من الشغل ألاقيني شغاااال
ايه الاشتغاله دى كلها انت بشتغل ايه بالضبط علشان اللبخه اللى احنا فيها دى

§a§a يقول...

هممممممممممم

ربنا يقويق ياريس

معذرة بقى على التأخر على اللى طلبتو منى

بمناسبه طلباتك انا للاسف مش لاقى اى حاجه عن الموضوع خالص

غير معرف يقول...

حفلة أيامنا الحلوه يوم 27 يوليو الساعه 8:30 فى ساقية الصاوى
اكبر تجمع بلوجرى اوعى يفوتكو
Blogger Radio Station

Foxology يقول...

هو فى ايه ؟؟ انا حاسس ان فى حاجة غلط يا اما انا مش فاهم يا اما فعلا الواحد ممكن يوصل للدرجة دى وانا الحقيقة اليومين دول فى قمة الحالة دى

بس يا ابراهيم متقفلش المدونة احنا هنصلحهالك على حسابنا بس اوعى تقفلها

Noony يقول...

تخرج من الشغل تروح على الشغل ازاي؟
وبعدين هم اللي اكتشفوا القدرات الوهمية الخياليلة وانت لأ لية؟
اية التهريج دة؟

مستنيين التحسينات
:)
نوني

إبـراهيم ... يقول...

سندريلللا ...: منورة المدونة ، فينك يا بنتي من زماااااااان ،،، قالوها كلمة حكمة ، الذي لا يعرف ، يقول بسطرمـــة

***********
تعبٌ كلها الحيـاة .. فلا أعجب إلا من راغب

*************
صاصا : ولا يهمك يا باشا ، يقويك ..غالبًا بالكاف ... ف الآخـر يعني ، منور أجين
**********
الحياة حلوة ... بس نتنيل على عيننا نفهمها
**************
وينكي : شكرًا بجد لإعلانـك ، وكان نفسي أقدر آآجي ............. منورة برضووو

حسن ارابيسك يقول...

عزيزي ابراهيم
صدقنى اللي يشوف البوست للوؤهلة الأولى يعتقد أنه أمام لوحده جداريه نُقش عليها لغة هيروغليفية لإجدادنا الفراعنة
ولكن لا تلبث أن تبدأ في قراءته حتى تتكشف لك طلاسمه شيئاً فشيئاً واضح انك داخل تجربة صعبة والأرض غير ممهدة والخطاوي ثقيلة ومتعبة والنفس منهكة
ولاكن لا تشغل بالك بالأفكار فالأفكار تأتي إلينا ولاكنها تأتي طواعيه لنا إن أرادات وشعرت ببلوغها وإكتمال عناصرها وأعضائها
فعلاً وحشتني كتاباتك وأسف على التقصير لمدون لها منا كل التقدير والاحترام

Reemo يقول...

هو أنا جايه متأخر أوى كده
طيب المفروض اجى الاقيك رجعت بقى ولا ايه
بس لما ترجع تانى تسيب انا بتاعتك وتيجى لوحدك
انا قلتلك قبل كده انى بفهم نص الكلام بس والباقى بتاع انا التانيه دى مبفهموش يا ابراهيم
متتأخرش بقى
ربنا يكرمك يارب
تحياتى

micheal يقول...

أنا جي أمسي عليك يا ابراهيم
ازيك و ايه اخبارك
تحياتي لك

رضوى داود يقول...

سلامات يا ابراهيم
انا كنت معديه قلت اسلم

kafrawy يقول...

اححم احم


يعنى ع الالهام

عاشقة الوطن يقول...

ازيك ياإبراهيم ايه اخبارك

كل ده ولسه مخلصتش التحسينات فى مدونتك
مدونتك وحشتنا
وعاوزين نشوف جديدك ان شاء الله

سلاااام ياابراهيم

إبـراهيم ... يقول...

أستاذ حسن أرابيســك:
أضأت جنبات المدونة بوجودك ... أعجبتني هـذه : ((واضح انك داخل تجربة صعبة والأرض غير ممهدة والخطاوي ثقيلة ومتعبة والنفس منهكة))
تسلم يا فندم .
.
.
لا تغب عنَّــا كثيرًا إذًا ...

دمت بود ...
****************
ريموووو: عـاد الضوء و الضـيـاء بقدومك ، تخيلي نسيت إنـك بتفهمي نص الكلام دي !! ، ما العتب عليكي بقالك قرن ما بتعديش .... عمومًا أطمنك ...(دونت ووري) كله تمام ... بإذن الله
.
.
.
دمتِ بخير

Ratings by outbrain