أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الثلاثاء، 30 أكتوبر 2007

ده احنــا لينــا الجنــــة !!ا




في كل مـرة بطول القاهرة وعرضها لا يفتأ يطاردني ذلك الهاجس، ليس الغنى والفقر فحسب، فهناك أغنياء عاقلون، وهناك فقراء راضون !!، ولكن الترف الزائد ، والإمعان في الرفاهية، هو ما يغيظ/ يستفز أحيانًا، لا أبدًا ، لا تتعلق المسألة بالحسد(بل وربما ولا الغبطـة !!)، وإنما التعجب لوجود كل مثل هذه الرفاهية في حيـاة هي الـ(دنيـا) ... ، أحيانًا أيضًا تطرأ فكرة (أتمنى من الله عز وجل ألا يحاسبني عليها)، وهي أن الميتافيزيقا (الغيبيات) عمومًا من صنع الأغنياء لإلهاء الفقراء عن التطلع إليهم !! ( أستغفر الله) ..

زمان كانت 6 أكتوبر بالمصطلح الشعبي الدارج (الأملة)، وكذلك أخواتها " مدينة نصر"، والمعادي ، اليوم المدن الخاصة والمناطق السكنية المتميزة تفوق الحصر !!، خد عندك الربوة والصفوة والأشجار (حي)، والبساتين والفردوس ، والرحاب (كله كوم و الرحاب دي كوم) ، وعلى الجهة الأخرى فيه زهراء المعادي، و قال مدينة نصر الجديدة، والقاهرة الجديدة والتجمع الخامس ...
مدن جديدة بالهبل !!

الفكرة في إن لما واحد ف (الفردوس ) من دلوقتي ، أمال لما يموت هيروح فين ؟؟؟ ... وبعدين أنا مش فاهم، الناس دي فكرة الرفاهية فعلاً كده ؟؟ الأحلام أوامر، وشخبطة الأبناء تخطيط للمستقبل، والعربيات تحت الأمر، والتكييفات ليل نهار ، طب ما لسه الإنسان هوا الإنسان، ولسه ف مصر ؟!! يعني حتمًا ، ولابد هتقطع عليه المية يوم، ولا الكهرباء ، ولا وصلة الدي إس إل، ... يعني هيكون عندهم المزعوم (إنفرا)، والتحفة ( لاب توب)، إذًا سيسلط عيهم مايكروسوفت (الشهير) سياطه اللاذعة، مفيش كمبيوتر بعون الله (ابن أمه) ما بيهنجش ! ، وبصراحة يعني لما رجال الأعمال ( والناس الكمل دول) يبقى معاهم كمبيوتر بيهنج (إن شاللا مرة واحدة) ، يبقى بناقص بقى البي إم ( اللي راكبها قرد) اللي راكبها، و بناقص الفيلا اللي مش هيعرف يتوصل لها إلا ما يطلع عينه سواقين المكيروباصات الأعزاء ... ، وحتى المارة في الشوارع !
يعني رفاهية في دنيـا ماتمشيش، ودنيا مع رفاهية ما تتتعاشرش ، وجنة من غير ناس ...ما تنداس !!

أولئك قوم عجلت لهم طيباتهم في الحياة الدنيا ، مش كده ، ولا إيه يا مشايخنا، ماهو ربنا أرحم بينا من أمهاتنا ، ومش معقولة بعد كل الغلب الأزلي اللي بنغلبه ف الدنيا ده ما نروحش الجنة ؟!! ، ربنا أرحم بينا ( وده عن يقين) ، مش هندخل ف تفاصيل دينية، بس إحنا بنشهد ألا إله إلا الله وأن محمد رسول الله ، يعني، وإن شاء الله بنصلي ، وبنصوم ، وبنقول الحمد لله ! ...
والله الحمد لله ، ماهي السعادة (وده عن تجربة) مش بالرفاهية، محدثكم دخل فنادق الفايف ستارز (بالمناسبة ممكن أي حد يدخلها)، وكان أول ما بيصيبني فيها الملل ، والملل عدو السعادة ! ، السعادة ف راحة البال ! ، ممممممممم وبعدين مش ممكن بعد كل اللي بنشوفه ف الدنيا ده ندخل النار !! ، حقة لو ده حصل ، يبقى الواحد يستاهل يولع ف نفسه بجاز !! ، واهي النتيجة واحدة !! ... ا
بس لأ ، مستحيل ، أصل النار مافيهاش فايف ستارز*، كلها عذاب ! ا

لكن إحنا لينا الجنة ! ، الجنة هناك منورة على طوووول (منورة بيكو ) ، ولا فيه مية تقطع، ولا وصلة دي إس إل تبطأ ، أنا على يقين إن النت هناك سريع ! ، وبعدين لا مؤاخذة نت ليه ؟؟؟، هوا هيكون فيه الاختراعات البشرية الحمضانة دي ،،، دي الجنة يا ابني تطلب فيها وتتمنى ، وبعدين ربنا مريحنا ( مالا عين رأت ، ولا أذن سمعت، ولا خطر على قلب بشر) !! ،،، يعني (جنـة ) مش سمنة ولا حتة حلوة ف الأرض ، جنة بحق وحقيقي! ا

زمان وأنا صغير كنت عاوز (عجلة) ، وأبويا ( على عادة الآباء) مش عارف مكنش بيجيبها لي ليه، كنت كل ما تيجي سيرة الجنة أبقى نفسي ف عجلة م الجنة !! ، قطعًا مفيش عجل ف الجنة ، احنا بنطير هناك أصلاً !! ، وااااو !! ولا زحمة ، ولا تلوث، ولا إشارات ، ولا حرق أعصاب ، ولا حر ، ولا برد ، ولا أي حاجة !! ، هيا دي الرفاهية صحيح ! ، الجنـة !!
إن شاء الله لينـا الجنة !

أوقات بحس إن الجنة دي زي الحبيبة !
ف وقت ما يقولوا وانتا عملت إيه عشان تدخل الجنة ، مستشهدين بقول القائل: ا
ومن يطلب العليا لم يغلها المهر ! .... ا
بس لأ ، أوقات الواحد ( لا يغلها المهر) ، ويعمل ، ويسوي من أجلها ، و ف الآخر الجنة ف مجتمع ، والجنة ليها أب ، وأم !! ، بالتالي مستحيل تدخل الجنة !!؟؟
أنا مش شايف الجنة كده ، الجنة لينـــــــــــا إن شاء الله ...
مش قصدي مانعملش حاجة ، ونحط ف بطننا بطيخة صيفي ، بس نحاول كل ما نغلط نتوب ، ونرجع ، ....ممممم ، ونعترف بأخطائنا .... ، ما ربنا سبقت رحمته غضبه، وبعدين ماهو شايف اللي بيحصل فينا ! ، وبنى آدمين ، يعني خطاااااائين !! ، مممممممممم ، المهم بس يا جماعة نرجع بسررعة ، ونتوب كده ،،،
ونرجع بضهرنا لورا ، ونتخيل الجنة .... ، واااااو ، ساعتها اكيد حاجات كثيييير هتهون !

هندخل الجنة صدقوني ، إن شااااء الله كلنــا ، خلي أملكم ف ربنـا كبير ، وخلي طموحكم عالي ، إن شاللا ف الحته دي بـس ، الفردوس الأعلى ، أيوة ما يجيش واحد ويقول لي إن شاللا بس أعدي وأقعد تحت ظل شجرة ( رغم إن اللي هيقعد تحت ظل شجرة ده هيبقى ملك أصلاً ) ، بس خلي طموحكم كبييييييييير ، الفردوس الأعلى ! ، مرة واحدة .... مش بعيد قووووي على فكرة ! ا

ده ـ على الأقل ـ أقرب من احلامكم الدنيوية العبيطة ، نفسك ف إيه ؟!! ا

الدنيا مابتديش ، الدنيا بتقطع منننا حتت ، وترمي ! ، مش هتاخد إلا هنااااااااااك ف الجنة ، مش هتاخد على قفاك ، لأ هتاخد كووووول اللي نفسك فيه، واللي ما تعرفش يكون نفسك فيه إزاي أصلاً !! ا

الجنـة يعني الجنة ، مش تهريج ! ا
وأنا قلبي حاسس إني هدخل الجنة ، مش عارف ليه، أو استحق أو لا ، أصل الجنة مش بمجموع (والحمد لله)، ولا بواسطة !!، ولا بابن وزير ، وابن كلب ! ، الجنـة للي يقول يااااااااااااارب ! ا

وأنا بقول يااااااارب، عاوز الجنـة ،،، عاوزها قوووووي ، نفسي أرتاح ، وإن كنت مش فاهم الراحة دي أصلاً، لأني بقيسها بمعايير دنيوية عبيطة ! ، هناك أنتم فيها خالدون ! ا

أنا مش حلو قوي !، مش بعمل كل الحاجات الصح، بلعكس بعمل بلاوي، وانتا يااارب بتسترني، بس أنا كويس يعني ! ، مؤمن بيك جدًا، وبحبك ، وبحب الرسول صلى الله عليه وسلم ، والصحابة كلهم ، و أحب الصالحين ولست منهم !!، لعلي أن أنال بهم شفاعة !، وأكره من تجارته المعاصي، ولو كنا سواء في البضاعة !! ا
وعندي أمـل كبير إني داخل الجنة


يمكن عشان كده بقول نفسي أموت ! ..... ا


بس صحيح الجنـة فيها راحة تانية كمان، مش هنبقى محتاجين نكتب !!! ، يااااااااااه ، مفيش كتابة ف الجنة، ولا قراءة، ولا ورق ، ولا أقلام !! ، مش عارف ، أعتقد ملهموش لزمة ، أصل مفيش تعمير ف الجنة، ولا إصلاح، ولا شروط نهضة ، ولا تعليم !!!ا
.
الجنــــــــــة جنـة !! ا


هوامش :
ــــــــــــــــــــــــــــــــــــــــــ

*
دعـاء الجنـة . . . اللهم إني أسألك رضاك والجنة، وأعوذ بك من سخطك والنار
الجنــــة ...دعــــاء . . .
.
.
ادعوا الله وأنتم موقنون بالإجــــابة
.
.
ويقول الصالحون :
إن في الدنيا جنـة، من لم يدخلها لم يدخل جنة الآخرة، ويؤلها الصالحون ( أيضًا) بالسعادة التي يجدها المؤمن في ... العبادة .. و أؤلها بـ ـ ـ دعـــــــــاء



ــــــــــــــــــــــــــــــــــــــــــــــ
ا* بناسبة الـ(ستارز) من غير فايف، بفتكر أعظم وأضخم وأرهب (من الرهبنة اللي جاية من الرهيب ولا علاقة لها بالإرهاب ولا الراهبات!!) مول ( أو مركز تجاري)( أو مجمع تجاري) في القاهرة، وهو (ستي ستارز ـ مدينة نصر) .... ، هناك الناس دي بتبقى ع المكشووووف قووووي ، والحق إني من فترة عاوز أكتب عن المكان الغريب جدًا ده، والذي ما إن تطئه قدمي في مرة إلا وتتدافع سيول من الأفكار ... أنا لسه بكتب، ولا إيه
بس
كفاااااية
publish Post

هناك 12 تعليقًا:

مَلَكة يقول...

قول يارب
بننساها ساعات تصدق؟
ساعات بيتهيألنا ان حاجات عبيطة وملهاش لازمة على الارض هي اللي تبقى جنتنا وبتاع
هبل والله

بوست حلو ونعتذر على التأخير يافندم

Aloka يقول...

والله انتا معاك حق في كل اللي قلته ، فعلا فيه حالة من الإستهبال العام تسود أوساط الأغنياء واللي يهبل إنك تحس إنهم عايشين في الدنيا لوحدهم وإن الناس التانية دي خلقت علشان تخدم عليهم ، وفعلا بتلاقي فقراء راضيين ، ماهو نفس المعني اللي حضرتك بتقولوه قالوا قبل كده كارل ماركس قال إن "الدين أفيون الشعوب" وإن الجنة دي حاجة إختراعها الأغنياء علشان يضحكوا بيها ع الفقراء ويقولولهم ماتبصوش لينا وارضوا باللي انتوا فيه علشان تدخلوا الجنة ،
بس علي أي حال أنا بأضم صوتي لصوتك في إن مظاهر البذخ والترف بقت فوق الوصف ، وكمان معاك وعن تجربة شخصية وأنا دخلت أكبر الفنادق في منطقة الخليج ومحستش فيها براحة ولما بروح علي قهوة خلف عندنا في بورسعيد ببقي في ملك تاني يا عم ، وبرضه معاك إن ان شاء الله رحمة ربنا واسعة ونكون كلنا في جنة الفردوس ان شاء الله ، بس ده مش أفيون كارل ماركس، دي حقيقة

بحلم يقول...

ما تبطلوا حقد بقي علي مخاليق ربنا..
انت شيوعي يالا!!

عموما انا كنت لسة بتكلم مع اختي ف الموضوع دة، بقولها ايه يعني
انا مستعدة ادخل الجنة بعد الفقرا بسبعين..بميت سنة يا عم، بس اعيش عيشتهم دي
وبعدين هم يعني يعملوا كل اللي نفسهم فيه، وييجوا يتوبوا ويخشوها معانا
اللي يفقع بقي انها ردت قالتلي: اتلهي..مين قالك أصلا انك ضامناها، دة ممكن هم يدخلوها شان تابوا وانتي تعيشي طول عمرك واخدة مقلب..حاجة هم
قلبت علينا المواجع
بس بصراحة، أنا بكره قوي موضوع"سيبهالهم يتهنوا بيها، ما احنا لينا الجنة"..غلط علي فكرة، مش كدة
مخلوقين عشان نحلم ونحقق احلامنا يا استاذ..موجودين ع شان نصلح ونعمر، لما نسيبهالهم يشبعوا بيها..نعيش احنا فين بقي وهي بتاعتنا

رضوى داود يقول...

ايه الحقد الطبقي ده

بس فكرتني بكتاب لاحمد بهجت قريته و اننا صغننه كان اسنه صائمون و الله اعلم
كان فيه طفل بيحكي هو ليه عايز يصوم برغم ان باباه مش موافق على صيامه فا بيقول انه في الجنه ما فيش مدارس و لا واجب او تذنيب و اه صحيح ان الجنه فيها انهار من لبن و عسل بس هو ساعتها مش هايبقى مضطر انه يشرب منها على عكس الدنيا اللي بيشرب فيها اللبن بالعافيه فعلشان كده عايز يصوم و يدخل الجنه

بحس ان لكل منا امانيه الخاصه جدا في الجنه اللي ممكن يعتبرها الاخرين عذاب

و ان شاء الله ربنا يكتبهالنا جميعا

Noony يقول...

الدعاء مفتاح حاجات كتير أوي...أولها الراحة والسعادة...وإن شاء الله دخول الجنة
صحيح إزاي نرجع بضهرنا لورا؟؟

كدة أنا حضور..صح؟

نهر الحب يقول...

مش عارفة ليه بقف عاجزه دائما بعد قراءة ما تكتبه
مش بعرف اقول ايه؟؟؟

انت عندك حق جداوان شاء الله نكون كلنا في الجنة مع بعض ومع احباءنا
-دعاء-
نعم الدعاء احد الاسباب الاساسيه لدخول الجنه
ادعو الله لك ولنا بدخول الجنة مع احباءنا-انت وكل عائلتك-1

هبه الاسكندرانيه يقول...

يــا اااااارب

إبـراهيم ... يقول...

على رأيــك يا ملكة
.
.
.
تحياتي

ما تغيبيش

إبـراهيم ... يقول...

علوكا بيه ( فيه حد يبقى اسمه كده) نورت يا علي، ونورني تعليـقك، مرور أول، أتمنى ألا يكون أخيرًا ..هنـــا

مساكين بجد الأغنياء دول، فاكرين اللي هما فيه ده كل حاجة !!!، صدقني موهومين تمامًا

ربنا يوعدنــا بالسـعادة الحقيقية : دعـاء ( يااارب الجنـــة، يارب) ا

إبـراهيم ... يقول...

هناء من قلب الحلم


بالله عليكي مين اللي بيحقد بقى ؟؟

صدقيني جمش حقـد، ده وضع للأمور في نصـابها، ليس أكثر، وبعدين
ثم إني لم أقل ـ يا عزيزتي ـ نسيبها لهم، هيا إيه دجي اللي نسيبها، لما احنا كلنا سايبينها أصلاً ؟؟؟ ، مين قال دي دعوة للتقشف،؟؟؟ أبدًأ والله يا جدعااااااان
دي وجهة نظـر خاصة، واللي فيكم يشوفني ف بيت من قزاز يبقى يحدفني بالطوب

.
.
نورتي يا هنوووءة، واحلمي براحتـك ... لسـه الأحلااااام كثيييييير
بس انتوا (اتنيلوا) احلموا

Unknown يقول...

دعاء.. إن شاء الله جنتك ما علمها الله لك.. ولنا جنتنا وهبها الله لنا .. تحياتي يا مُبدع

Heba Al_Menshawy يقول...

ربنا يكرمك على البوست دا
صحيح الحمد لله ربنا مدينا حاجات كتير جميلة اوي في الدنيا فعلا.. بس الاهم اخرتنا مش دنيتنا واننا منخليش الدنيا هي اكبر همنا ولو اننا اوقات كتير بننسى
ربنا يكتبلك الجنة ويكتبلنا جميعا يارب.. ويجمعنا جميعا مع الرسول حول الحوض .. اللهم آمين
بوست قيم كالعادة:)
تحياتي

Ratings by outbrain