أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الأحد، 24 فبراير، 2008

حالة ..امتلااااء، ويمكن فرااااغ، ويمكن مش حالة أصلاً !!!

حالة ... امتلاء !!

الدنيـا ، كثييييييير قوووووي الأفلام والمسلسلاات، والحكايت والقصص، والروايات والأشعار، والأغاني ، والكليبات، والمحطات، والقنوات، والتلفزيونات، والصحف ، والمجلات، والكتب، والأوراق، والمؤلفات، والناس ، والعالم، والرؤساء (لا هؤلاء قلة!!) ، الكتاب ، والروائيون، والشعراء، والكذابون، والمنافقون، وحتى الصادقون، والعمال، والأطباء، والحدادون( والذين سيقفزون هذه السطور إلى ما يليها .. الآن !!) ... كثيييييييييييييير قووووووي

كثير بجد، كثير لحد التخمة، الآن لم يعد كتاب الرواية فقط هم الكثر، بل كل الكتاب، وكل الأصناف كثييييرة، ومتعددة قوووووووووي ، أصبحنا في عالم متعدد فعلاً، متعدد كل شيء، أصبحت الأصابع العشرة غير قادرة على الإمساك بكل شيء!! ....

كثيييير قووووي، وعشان الواحد يركز ف حاجة من الكثير، بيطلع له ألف كثير ف الحاجة !!

حالة تخمة غير طبيعية، كلنا كتاب، وكلنا شعراء، وكلنا مدونين،وكلنا أصحاب قضايا، وكلنا ذوي آراء، وكلنا مختلفين، وكلنا متفقين !!! وبعدين ؟؟؟

أعتقد زمان كانت الدنيا أحلى( بالضرورة زمان بيقى أحلى) ، ماكانش فيه ف الأول إلا راديو .........

.

.

ممكن نقعد نركز شويتين ثلاثة، ونرجع بضهرنا لورا خاالص، ونغمض عنينا !! راديو، فقط، وتتحدث خالتي عن انتظارهم، ومتابعتهم لمسلسل(واحد) يعرض في وقت معين، في الراديو، وترقبهم له، وتركيزهم فيه، وانطلاق الخيال في تصور أشكال أبطاله ... وكنت أقول لها إن الرواية المقروؤة تفعل شيئًا قريبًا من ذلك ... (لكن سيبك) ... محطة، أو محطتا راديو .... ثم تلفزيون ... طفرة مفزعة ... الآن البشر بشحومهم ولحومهم على الشاشة الصغيرة !! .... مش عاوز أكون ممل ... الآن 200 قناة تلفزيونية ؟!!! أي عبث ؟؟؟؟

مش بـس التلفزيون ، كل حاجة بقت بتزيد بشكل جنوووني، ويجعل الإنسان يشعر إن القيامة لاااااااااابد أن تكون قريبًا، لأنه إن لم تحدث لحدث إنفجار !!

.

كلنا شعراء، كلنا كتاب، كلنا مدونين، أمال مين بيعمل حاجة تانية ؟؟؟

أوقات بحس إنه إذا كان (اليوم) عدد فئة معينة ألف أو مليون ، فكمان شوية، ومع سيطرة أفكار الفرد الـ(سوبر مان) أو الأسطورة، الذي يفعل كل شيء، فسيكون لدينا عام 3000 كل خارق !!!، ودي كارثة أعتقد !!

ده المكان اللي بيبقى فيه 10 سباكين كويسين بتبقى مشكلة، فما الحل، لو كلهم سباكين، وكلهم نجارين، وكلهم حدادين، وكلهم أطباء، وكلهم مهندسين، وكلهم محاسبين ، وكلهم علماء، وكلهم كتاب، وكلهم بيفهموا !!! ساعتها مش هيبقى فيه عدم فهم، يعني إيه؟؟؟؟ لما كلهم بيفهموا أصلاً مين اللي مش هيبقى فاهم؟؟ وهيعملوا إيه بفهمهم، وبنجارتهم، وبسباكتهم، وشعرهم، وراواياتهم؟؟؟

لأ ، غلط، أنا خلطت العام بالخاص !!!

أنا لخبطتت الدنيا

أنا كان قصدي ف الأول إن بقى فيه حاجات كثيييييييير ف القصص والأفلام والمسلسلات، والروايات، والأشعار، والمسرحياات، والمجلات، والصحف، يعني فيما يزعم الإنسان أنه يبدعه، في حين أنه يستنزفه!! وأن ذلك الكم الكبير "غير صحي" على الإطلاق، وأن الزيادة فيه ضاااارة "بكثييير" وليست نافعة !!، ومن هنا طرد (المغفور له) أفلاطون الشعراء ( النموذج الموجود في عصره ) من مدينته الفاضلة !!! لأنهم يصنعون أشياء كثييييرة كلها زيف وضلال !! وبعدين مش كده بـس، دول بيكثروا وبيتسرطنوا، وينشروا طريقتهم في الكذب والإدعاء على إنها إبداع، وجمال (الله ياخده) !! فيصبح لدينا من 10 شعراء إلى 100 شاعر ، يعني اللي قدامك شاعر، واللي وراك قاص، واللي حواليك روائي، وانتا نفسك مش عارف بتعمل إيه ؟؟؟ هيبقى الشعر كلام الناس، ساعتها مش هيبقى للناس نفسها قيمة ف كلامها !!!

مش صح، حالة الزخم الفظييييييعة دي، وحالة الرطرطة ف الأفكار، ووأد كل المعاني الجميلة، ده لو لسه فيه أصلاً ، على لسان وأفعال ناس، ملهاش علاقة بحاجة، وفقد كل براءات التجارب، التي ربما تكون جميلة جدًا، لأنها فقط أصبحت مستهلكة، وشائعة، بل ربما مبتذلة !!!!

وبعدين لامؤاخذة يعني، لا وصلنا القمر، ولا اتكتب أفكارنا لحظة التفكير فيها، ده إن ما اتقالش إنها متاخدة من كاتب كولومبي مات من سنتين !!! ، يبقى إيه لازمة كل يوم 17 جرنان، وألأف كاتب، وعشروميت مقال، ومليون قصيدة، و43 قصة، و77 رواية، وألأف وثمانية مسرحية !!!

مش عارف شكلي هيست، طب ما أنا بشارك ف العبث ده بشكل أو بآخر، ما أسكت خااااااااااالــص ، واتكتم، وأريح العالم من شروري، أو حسناتي حتى، فالعالم لديه ما يطكفيه، ويفيييييييييض، وبجد قوووي ، ماعادش حد هينقصه ، يعني لو مات بكرة تسعوميت كاتب، ولا الهوا !!! ولو ألف مفكر الدنيا شغااااالة ، والقنوات شغاااالة، والدنيا مااااشية، وبسرعتها الطبيعةي، لو مات حتى100 مغني، مش هنلحق نعزي فيهم، ولو مات 1000 ممثل، معدش فيه كبار وصغيرين، كلو بيمثل، وكلهم أبطال، لو مات 100 سمكري، واتحرق أكبر مول ف العالم، ولا الهواااا ، الدنيا ما بقاش عندها عزيز ولا غالي، الدنيا مصابة بتخمة في كل شيء !!!... ومش محتاج أاكد الكلام ده حقيقي قد إيه ،

ممممممممممممم (بفكر) فيه حد واحد بـــــــــــس لو مات ممكن مشاكل الناس تتحل، والأرض تعمر، ويبقى فيه جدوى من كل الأشياء، واحد بـــس، مش مهم دلوقتي (عشان التركيز ف الدعاء) ابنه، أو حاشيته الحقيرة، لما اللي اسمها إيه دي هتقوم مش هتسيب ولا هتخلي، بس يموت !! ، سكتة قلبية دماغية، ماية شاي ، صرع، برص، جذام، برد، أنفلونزا، إيدز حتى، أي مرض إن شاللا شلل رعاااش يااااااااااااااارب حادثة قطر، بحر، جو، تسمم، جنون، تخلف عقلي، يقع من السلم حتى، واحد يغزه مطوى، بسكينه تلمة ، بأي حاااجة، ساعتها لا هنملى الشوارع فرحة، ولا حاجة، بس ممكن نحس بطعم حاجة مختلفة !!!

طولت عليكوووو

وأنا كنت ناوي ...ما أطولشي

إدعوا معايا : اللهم انتقم منه، وانتقم منه، وورينا فيه يوم واحد !!!

هناك 32 تعليقًا:

إيما يقول...

أول تعليق!!
رائع:)
رائع كمان البوست
يمكن عشان وجهين لعملة واحدة باهتة التخمة من الأشياء حد الممل!!
مبقاش فيه قيمة لحاجة بالسلب أو الايجاب
بس تفتكر موت الشخص هيحل كتير؟؟ اعتقد الموضوع بقي أكبر بكتير منه ومن ابنه ومن كل اللي حواليه
لكن مين عارف !!
يا رب

إبـراهيم ... معـايــا يقول...

إيما، خللي بالك إنتي قلتي (يارب) يعني دعيتي عليه، وشكلك بتتكلمي عن حد بعينه !!، أنا كنت بتلكم عمومًا ، وأرجوكو ما تودونيش ف حتة !!!
***********
يقول إبراهيم :
ينشر هذا الموضوع الآن .. وبسرعة ، في الوقت الذي ينتظر موضوع عن ملتقى الرواية المثول في وقت موازي، ولأن الحياة أصبحت بها تخمة غير عادية بالموضوعات والأفكار، دل الموضوع ده، وتم تأجيل الآخر، وكذلك تأجيل عدد من الأفكار المطروقة المطروحة !!!
ولهذا وجب التنبية
**********
شكرًا إيمي ، شكرًا إبراهيم

نيران يقول...

ممممممم..

شعور غريب و انا باقفز بين السطور و باجري و انت بتعدد الحاجات.. قريتها بسرعة اوي، و انا باقراها جت في بالي كل الصور لكل الناس الكتير اوي اللي بيعرفوا كل الحاجات الكتير اوي..

هم ليه بقوا كتير اوي، عشان تقريبا كل الناس كترت اوي

يعني زمان كان في شارعنا جيرانا.. عارفينهم كلهم.. دلوقتي شارعنا بقى مش شارعنا.. و جيرانا اللي عارفينهم بقينا مش عارفينهم كلهم..لا دا احنا تقريبا مش عارفينهم.

كنا لما نلعب في الشارع بنخاف لحسن يقولوا لأبونا و أمنا اننا كسرنا شباك عم محمد بتاع السوبر ماركت، و عم محمد له كلمة مسموعة عليهم عشان هو اللي ببيبع لهم الشكك..و طبعا ماحدش يقدر يزعل عم محمد..

لكن دلوقت عم محمد عنده هايبر ماركت..
لهو عارف ولاد الحتة، ولا اهاليهم..ولا هو اصلا عاد عنده شباك..

زمان كان احلى.. اه.. بس ليه.. مش عارفين..

هو لو مات هاتتحل المشكلة، ولا هاتتمشكل الحلول؟

هو مين اللي شايل الليلة اصلا دلوقت..؟هو؟؟ في سنه دا..

ولا في ماما من بعيد بتعلمه الصح(بتاعها) و الغلط (بتاعها) و طبعا هو واللي جابوه و اللي تحت ايده(بتوعها)؟؟

ابراهيم.. خلاصة القول لحسن انا باخرف..

اللي انت كتبته.. حلو اوي..

و من قلبي باقول يارب الخير.. عايزين الخير.. عشان بجد بجد كتير اوي الحاجات الكتير اوي في زمن الكتير اوي

تحيات كتير اوي

نيران

حسن ارابيسك يقول...

الحقيقة
دائما أحترم فيك أمانتك مع نفسك قبل الأخرين
دائماً أدواتك في التعبير هي الفيصل
تحياتي

نهر الحب يقول...

صحيح فيه ناس كتير قوي

لكن للاسف يه ناس قليل قوي

علس العموم ربنا يستجيب لك

وانت ونيتك

walaa يقول...

احنا لاشعرا وبنمثل اكثر من حاجه فى حياتنا ما هو الا تعبير ما يجيش فى نفوسنا لا اكثر ولا اقل
احنا بنمر بتجارب سياسيه اجتماعيه عاطفيه
الناس بتكتب عنها وبتحاول تعرف ايه راى الناس ممكن تديها خبره
فى ناس بتحب تفضفض يمكن بتفضفض معانا
فى ناس عندها رساله بتحاول توصلها للانسان
وهى فعلا ادوار الحياه كتيره
تحياتى لك
ولاء

maha zein يقول...

يبقه انا لما قلت الباجور كان احسن من كل حاجة..والزمن الجميل الهدوء كان احسن من كل حلجة...ولما محدش كان يعرف يعني ايه مدونة ولا نت ولا بتنجان كان احسن من كل حاجة...صح سعات النور يقطع عندنا...ونعد ساكتين مستنين النور..ولما الكشافات تقطع والضلمة تطول...نتجمع كلنا فى اودة وحدة ويعد كل الي عنده قصه يحكيها من الملل مهو لا في تلفزيون ولا نت ولا راديو حتي...نزهق من الحكاوي والاقي الكل خلقه داق وكله هيضرب بعضه نقوم قايمين ننام احسن من المغرب...عرفت ليه الناس كانوا يستنوا حفلة ام كلثوم فى الراديو بفارغ الصبر وهما مش مصدقين حالهم والراجل بيعلن عن بداية الحفل...انا مقدرة الزحمة الي بتتكلم عنها...بس حاول تفضي دماغك شوية وتريح نفسك من كذا حاجة ممكن تكون شغلال اعد ما نفسك وضلم الاودة ولو عندك باجور شغله(ههههههه) اكيد معندكش..بس صدقني لو النت فصل عندك يومين مش هتستحمل وهتنزل في اي سيبر تدور علي الزحمة بنفسك...صدقنى لانك لو مصدقتنيش مش هصدق نفسي.
بعدين يا جدع دخلت عندي وعلقت علي "يا عم ورانا غسيل" واعدت تقول تحفة وهم وكنتي فين من زمان...وهمتني وقلت انك مش هتقفل الدمونة...الاقيك اتاريك زهقت ومليت من الزحمة وقررت الاعتزال...لا بقولك ايه زهقان زحمان جعان مليش دعوة هستناك عندي تهدا شوية

only spot يقول...

السلام عليكم
اعتقد ان البوست متناول اكتر من فكره بس عندى ملاحظه هو ان التنوع مش وحش وفكرة التنافس برضه مش وحشه لكن تنافس مش تجحش وتوحش وهو ده الى حاصل دلوقتى االى يقدر يزحل التانى عشان يوصل لا يجد حرج من ذلك والنقطه التانيه من الواضح ان حالة الاكتئاب وصلت بس متحاولش انها تستمر عندك كتير
النقطه الرابعه للاسف سواء فضل عايش او مات فيكفيه انه قتل احلام وزهور كان ممكن انها تتفتح بغباءه هو والى حواليه
خالص تحياتى

maii bahaa يقول...

طبعا معاك في موضوع الزحمة البشرية والفكرية و..و...و.. دانا حتى دلوقتي مابعرفش الناس من بعض...زمان كنا نعرف أسامي المغنيين مثلا..وهما مجموعة معروفة..حاليا والله العظيم بيعدي عليا في كل حتة وشوش بتغني ولا اعرف حد فيهم..مابالك بأه الشعراء والكتاب..عندك حل وااااحد..تركز مع اللي يهمك وبس
انا شخصيا باعمل كده يعني الاحق على مين ولا مين...هي هي هي هي هي

تحياتي على البوست
:)

بيسوو يقول...

شكلك زهقان جدا...بس عادي كلنا زهقانين مش انت لوحدك..واصلا اصلا الزهق بقى مرض العصر زيه زي السكر والسمنة

شكلك زهقان جدا...بس صدقني لا الدنيا ولا الناس شايلين هم التخمة دي ولا في بالهم اصلا...بحس احيانا اننا مبقاش لينا لا عزيز ولا غالي..كله عادي وكله ماشي


شكلك قرفان منه ومن الي حواليه والصراحة لقيت دعواتك عليه مبتكرة جدا جذام وبرص وسكينة تلمة..حاجات عجيبة...بس ياريت تتقبل

مش عايزاك تبقى زهقان قوي كدة...دور على حاجة جديدة لسةالتخمة موصلتلهاش واعملها..وبسرعة

إبـراهيم ... معـايــا يقول...

نيران :
ببساطة لما قريت تعليقك الجميييل ده كلله، افتكرت فكرة(برضو يعني) كنت ناوي أنفذها عندي، وأهو تبقى اكسكلوسفايا، وهي إني أمنح جائزة( حقيق وبجد) لأفضل تعليق، وأعتقد إن تعليقك ده أفضل تعليق جالي من مـدة حقيقي ...
وطبعًا مش محتاج أقول لك إنك عندك حق ف كل اللي قولتيه ....
حقيقي أنا اللي متشكر ع التعليق المتميز ده
و أنا بعلن أخخ إن ليكي جايزة أفضـل تعليق :)


وما تبقيش تقطعي التعليقات

إبـراهيم ... معـايــا يقول...

الجميل حسن أرابيسـك، يسعدني شهادتك على ما أكتب، وتشعرني بأن لي قيمـة

أشكر متابعتك جدًا
و أتمنى أن تزورنـا ...كل شويـة

********
الجميلة نهر ... أفهم ما تعنين تمامًا ..


ببساطــة : هذا الزحـام ..لا أحد !!

دي مشكلة أخرى
دمتِ بود

3ala asm masr يقول...

هو مين ده؟؟؟؟
لاء اوعى تكون عايزت تقول على .........
طيب وليه ما الطيب احسن

شادي فايد يقول...

ربنا ياخدة
وياخد كل اللي زية وبيفكروا زية

ولا اية؟؟

انين الحزن يقول...

اول زيارة عندك ومش هتكون الاخيرة ان شاء الله


بس هو مين هاه اوعي تكون بتفكر في الا انا بفكر فيه او الا الشعب كله بيفكر فيه

ربنا يتولنا وانا معاك في الدعاء بس هزود عليه كل الا قالوا عادل امام في المسرحيه


سلامووووووووز ..... وزة

maha zein يقول...

مش عوزة ابان رخمة وغتتو ومبرضاش بس احب اوضح نظرية بس...انا اصلا بكتب جد علطول وده يدل انك متصفحتش المدونة والبوستات القديمة بس هسامحك...بعدين بقه جو السخرية والهزار الجديد ده جو جديد علي يعني افتكرت كام موقف تعبانين كده وحبيت بس احكيهم ليكو...لكن انا في الاساس مكنتش بكتب كده خالص...بس جو الامتحانات كئبني بعيد عنك...بعدين لما عملت استفتاء لقيت ان الناس بتحب النوع ده من الحكاوي واقعي وبالعامية...فقلنا نريح الزباين...انا هرحمك عشان زهقان وملان بس لكن اكيد هيجيلك يوم كده وتقرا حاجة من القديم وتكتشف الحقيقة.
بعدين يا جدع اوعه بقه تنسا المدونة بتاعتي تاني خلاص احفرها في الذاكرة بقه مش كل مرة افكرك بيها ...انا زمئانة انا وحسة بزحمة عندي مش هفتكر ارخم عليك تاني واقولك متقطعش الزيارات

مها يقول...
أزال المؤلف هذا التعليق.
مها يقول...
أزال المؤلف هذا التعليق.
مها يقول...

ابراهيم
انا بعت التعليق مرتين بس كل مرة مش باشوفه.. بيتهيألى إنى دوست Delete غلط
قلت لك مبتدئة تدوين وانت مش مصدق .. صدقتنى بقى!
معلش بقى .. عديها المرة دى.. أنا عارفة إنك شهم وهتقدر موقفى ..
مش ناوى تقدر برضه؟

Heba يقول...

أنت عندك حق في حالتة تخمة فظيعة في كل حاجة

إلا في الفلوس بصراحة هي الوحيدة اللي بتعاني من نقص حاد وهبوط في الدورة الجيبية

المهم ما اعتقدش إن موت الشخص ده هو اللي هيحلها

هيا يمكن الناس تفرح لها شويتين تلاتية أربعة

بس حالة التخمة هتفضل هيا هيا

ده غير أننا هيجيلنا شخص جديد غالبا هيكون أسوأ من اللي قبله

تقبل مروري

مها يقول...

أجمل حاجة فى البوست ده يا ابراهيم التلقائية البريئة اللى فى كل كلمة فيه .. كأنك بتفكر بصوت عالى و"بتقول اللى ف نفسك" كدة خبط لزق!
فى رأيى المتواضع فكرة التعددية فى حد ذاتها مش كلها شر .. فى عصر إيقاعه سريع بقينا بنمل بسرعة ودايماً عايزين تغيير .. تغيير فى القصة وفى المناظر .. القصة اللى كاتمة على نفسنا من سنين بنفس المشاهد واللقطات والسيناريو والحوار والأبطال وحتى الموسيقى التصويرية .. والمناظر التعيسة الكئيبة اللى احنا معتقلين في إطارها برضه من سنين .. يعنى تعددية آه .. لكن لازم يكون عندنا قدرة عالية على الانتقائية فليس كل المتاح جيد ( على فكرة بقوا 480 قناة مش 200 )..
كمان تغيير آه .. لكن الأهم "مين"؟؟
لأن أى تغيير والسلام ممكن يؤدى لما هو أسوأ .. لكن على أية حال انت بجد خلتنا نحلم معاك واحنا بنقرا البوست ده.. ومشهد النهاية الرائع اللى انت كاتبه متنى م الضحك .. باتخيل لو فعلاً أى احتمال من دول حصل وبعدين صاحبك رايح قايل : نشنت يا فالح .. وبعدين اتكل .. هههههه
بس يا ترى مشهد النهاية ده فى أحلى فيلم ولا أحلى حلم ؟؟

دمنا فى تواصل

kafrawy يقول...

هههههههههههههههههه

ياعم احنا مالنا و مال التخمة دى بس
الارزاق بالله
خلى الناس الغلابة عايشة مستورة
ليقضى الله امرا كان مفعولا بتلك البلاد

camellia يقول...

أنا معاك ان مسألة التخمة وان العدد يبقي في الليمون دي مزعجة أوي بس علي في نفس الوقت مؤمنة ان في الآخر برضه القيمة هي اللي بتفرض نفسها
يعني لو الشارع في عشروميت سباك هتلاقي الناس برضه بتتعامل مع واحد أو اتنين اللي بيشتغلوا بذمة وقيس علي كدة في كل حاجة
يمكن دلوقتي فعلا الناس كلها بقت روائيين وشعراء وبين كل عشر مواطنين ممكن تلاقي كاتب بس تعالي كدة بعد عشر سنين مين اللي هتفضل تقراله ومين اللي هتلف ساندوتشات عيالك في كتبه ومين اللي مش هتفتكر اسمه أصلا
(فأمّا الزبد فيذهب جفاءً وأمّا ما ينفع الناس فيمكث في الأرض)صدق الله العظيم
أمّا بقي الحاج أبو جمال فيارب يارب يشرق وهو بيشرب الشاي النهاردة
طولت عليك
معلش

صباحك قشطة

mohmmed يقول...

ياعمونا خلي الناس تهيص وخلي الناس تكتب وخلي الناس تقول وتقول يمكن في الزحمة تتوه عقول
خلي كل واحد براحته يجوز يحصل حاجة، واللي بتفكر أنه يموت قدر يوصل الشعب ان موته معجزة من معجزات الزمن.. وأنه باق للابد ..
صحيح عجيبة يا مصر
خالص تحياتي

Rosa يقول...

يوم واحد بس !!!!!!!!!!!!!
مش شوية تعذيب في الأول؟؟
ولا لأ حرام تعذيب الدنيابيخفف تعذيب الآخره
خليه بس يومين لا لا تلاته بوص هوا شهر و مش هنزود
لا برده مش عدل
اقلك بس يورينا وخلاص مش مهمممممم
----------
اما بقى عن الحاله الي بتتكلم عنها .. قولييا ابراهيم كام واحد شاعر حقيقي كام فنان فنان بجد
مشمهم كم الكتابه ولاكم المسلسات . مين فيهم ليه تأثيره و قوته مين فيهم حقيقي بجد
مش بالفرض او لوي الدراع
الحقيقي و المميز هيفضل قيقي و مميز حتى لو في هبو على رأي أخويا حوليه
-------
اما عن الراديو ماما كانت بتوصفلي الموضوع ده فعلا كان بيحرك الخيال , كل واحد يرسم شخصياه زي ماهوعايز ينسج ملامح والوان و اشكال .. كان فيها ابداع
لحد تالت اربع سنين كل فتره كنت اتابع مسلسل في الراديوعلى استحياء وكان بيخلق فيا الحاله دي
---------
في حاجه كمان ... مش لازم كل الي بيتكت بيكون ابداع او حاجه ذت قيمه يكفي انها تكون متنفس لصاحبها وخلاص .. خاصة التدوين اهو مكان بتطلاع رأيك فيه .. مهم مشمهم بس احصل ماتنضغط اكتر و تفرقع و تموت او يدوسك قطر زي مابتتمنى لناس
----------
الخلاصه .. دي آخرة العولمه في غياب المضمون
:D
بوست مميز كالعاده ياابراهيم

إبـراهيم ... معـايــا يقول...

ولاء... نورتيني ، وإن كان شكلك ما فعهمتيش قصدي بالضبط، أنا لا أتحدث عما يفعله القصاص والشعراء، أو المؤلفين، والمخرجين، إنما أتحدث عن الكم الهاااائل المهول، والزخم الفظيييييع ....

أعتقدت أن ذلك كـان واااضحًا !!
... على كلٍ ..نورتيني، وما تبقيش تقطعي :)
*************
مـهــا ... أكييييد طبعًا عندك حق، ىوده يفكرني بموضوع آخر له علاقة بالتكنولوبيا، وأضرارها، ومدى قتلها لحاجات كثيييير، واضح إن المواضيع"منفدة" على بعضـها ،،،،
أمـــــــــا بخصوص مدونتك، فأنا أصبحت ضيف دائم :) ... وسعيد بمتابعتك، وتعليقك

خاااااااالــــص تحياتي

إبـراهيم ... معـايــا يقول...

شيكوووو .. نورتي، للمـ{ة الأولى، ولا دي التانيـة ؟؟ ...عل كلٍ ..جميل غلمامك بأفكار الموضوع على بعضيها، لأن مش الكل بيعمل ده :) تقريبًا تقريبًا فرق بين التنوع والزخم، أنا مش شاااايف أصلاً ، يعني عامل زي ما يكون عندك الأحمر بدرجاته، مش فكرة إن عندك الألوان كلها ، مش حابب أرغي ف الموضوع ده أكثر من كده !!!
وأخيرًا : يمووووووت بــــس يااارب، ولا يصاب بداء البله أو العته !!، ونبقى نفتح إحنا الزهور اللي فاضلة !!
خدي لك وردة :)
***************
الأستأذة مي ، الاتفاق في الرأي .. أيضًا لا يفسـد للود قضـيـــة

مودتي :)

mohamed يقول...

تعرف انا معاك نوعا ما ، اصل كل ما الأختيارات تكتر ممكن تقع منك حاجات وما تختارش الأفضل وانت مش حاسس ، من كتر الكركبة ، بس لو زمان احسن من النهاردة ، يبقى اكيد النهاردة احسن من بكرة ، الحمد لله انى فى النهاردة مش فى بكرة
ارجو زيارة مدونتى ونبقى اصحاب
mobkhat.blogspot.com

غير معرف يقول...

أبراهيم ...

اختيارك للأغاني متميز... كأني أسمعها لأول مرة .. أكيد في إنه في الموضوع

حالة الامتلاء تودي معناها حالة الفراغ ، في الأخير هناك حالة من التوقف. ولو قليلاً ...

تتدفق كشلال يا صديقي .

م.ش
صنعاء

إبـراهيم ... معـايــا يقول...

بيســــوووو :
الأول سيبيني أقول لك حمد لله ع سلاااامتـك، المدونة كانت بتشتكي لي منك بقى لك كثييييير مااعديتيش .....
و الثاني : الزهق من شيم الحيـاة دلوكيت ، لكن أنا كنت عامل نفسي برصد ظـاااهـرة برضووو ....
ثالثًا أدينا بنتكلم ، ورااانــا إيه ؟؟ قدامنا إيه ،،،،
نورتيني
********************
على اسم مصر ، وشادي :

أبوس إيديكم ما تدوونيش ف داهية ، هوا إيه اللي مين وفين وإمتى ؟؟؟؟
الموضوع مش مستاهل ذكاوة، ربنا ينتقم بقى

نورتموني

سلمى البنا يقول...

ابراهيم انا مش قلتلك منك لله قبل كده
وقلتلك تبطل تفكر في نفس الحاجات اللي بفكر اكتبها الايام دي
اهو برده اللي انت كاتبه ده يدخل تحت بند اللي انا قلته دلوقتي
كلنا ممكن تجيلنا نفس الافكار
مش عيب
وخليني اقولك من الاخر على حاجة (لازم اقولها لنفسي قبلك) انا حاكتب او ارسم عشان اعبر عن نفسي وبسسسسسسسسسسسسسسسس
واللي يطلع قديم يطلع واللي يطلع معاد يطلع واللي يفهم يفهم واللي يعرفني يعرفن- وفكرة يويتوبيا الفن وانه يأثر في حد ده
او يبقى جديد لانج زي الغسيل لما يتغشل بتايد بظبط
عمره ما حيكون
عشان مستحيل ان يكون الابيض ابيض مطلق
ليس هناك شئ مطلق الا الله عزوجل
بص الحقيقة انا الايام دي صايباني حالة احباط من الللي انت بتتكلم عليه ده

حابقى اقولك بعدين بس ابقى فكرني

جسر الى الحياة يقول...

,الله عسل يا هيما انت اللى زحمت دماغك بكل الافكار دى بس احلى حاجة انك دعيت دعوتين فى الاخر ربنا يجعلهم من نصيب صاحبهم امين يا رب

Ratings by outbrain