أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الأربعاء، 2 يوليو، 2008

لقاءات المدونين .. الحلم والحياة

من اسكندرية للمنصورة، يا قلبي افرح

محتاجين نقول شكرًا للمتهمين (بترتيب التورط) أحمد الصباغ ، والمستضيفين مها عمر وهناء صابر، ومكان اسمه " جميعة مصر للثقافة والحوار"، ثم "هشام علاء" طبعًا، ويوم جمعة تدويني مدوناتي حلو جدًا، لأ و إيه وفي اسكندرية، حيث تم استضافة الشاعر عبد الرحمن يوسف، وبعدين كان لقاء المدونين الذي أراه مميزًا جدًا، حيث تحدث عدد من المدونين عن تجربتهم في التدوين، وكانت إدارة الصباغ للحوار متميزة، وتحدثوا عن كتاب" مدونات مصرية للجيب" مميزاته وعيوبه، ولأول مرة (يعني حصريًا كده) يتحدث المصمم جدًا "حاتم بيه عرفة" عن وجهة نظره في الغلاف، واستمع بصدر رحب لانتقادات الناس، ووعد بأن يكون القادم أجمل، مممممممم ، وكان يوم حلو فعلاً...

نشكر مدوني الإسكندرية، وشكر خااااااااااص قووووي قوي لمصطفى باشا المغربي غني يابهية، ولأميرة سهر الليالي، ود.لماضة لأنهم كملوا معانا اليوم ....

أنا بقى كملته مع حاتم بيه، وإبراهيم السيد من القاهرة وقابلت سلمى البنا ....

حقيقي كان يوم جمعة مختلف ، ولذييييذ

بعد كده بقى نيجي على لقاء مدوني الدقهلية

حيث دعيت من قبل صديقي"محمد العدوي" لحضوره، وقعدت أقول له بلاااش، ومش عارف إيه، بس هوا أصر، وأنا نزلت على رغبته، لأني كنت عاوز أتعرف على ناس المنصورة، وحقيقي فوق إني استمتعت بمقدار الموهوبين اللي قابلتهم، وحسيت إني قاعد مع أدباء مش مجرد مدونين، فكان لقاء جميل جدًا وصغنتت وملموم ، وفطعًا سعدت بلقاء سارة رحيل، وأيمن باشا بدر "عرضحالجي" مدبري اللقاء ومنظميه، وبعد كده كوووول مدوني الدقهلية، حتى شادي وابن عبد السميع، سمعنا "محمد فكري" عدد من قصائده، وكذلك أمجد باشا القهوجي، و اللولبي الأتربي، وناس كثيييير كدهو، وكملنا جلستنا الأدبية الشعرية البتنجانية في مكتبة بوكس آند بينز ... وروحت عشان كفاية قوووي كده

لمزيد من المعلومات عن هذه اللقاءات الهامة جدًا والحاسمة، يرجى الرجوع لمواقع المدونين على صفحات الفيس بوك، سواء مدوني الإسكندرية، أو الدقهلية ....

وكل لحظـــة وإنتو بخير.

V.S: مممممممم ومن هنا نحيطكم علمًا إني هكون معايا بعون الله يوم الجمعة القادم (ده على طووول) لحضور حفل توقيع "السيء في الأمر" للكاتب الأستاذ ممدوح رزق، والذي سيقام في مكتبة بوكس آند بيـنز .... ممممممممممممم ، خلونا نشووفكووو

هناك 18 تعليقًا:

حاتم عرفه يقول...

حبيب قلبي هيما معايا ؟!
طبعا كان يوم جميل عشان كنت معاك..
لوحدك كان زمانك متلطم يا عيني بين سيدى جابر وبين سيدك بشر والمعمورة
ده غير طبعا تلطمك بين الجيزويتس وبحرى
إحنا قولنا بس نمشيك شوية.. بين سيدى جابر وبين سيدك بشر.. وكمان ركبنا التورماى كام محطة فى النص.. بس ياعينى
طلعت قهراوى فرفور.. وفرفرت منى فى السكة.. وقعدت تقول: "خالتىىىىى.. عاوز أروح لخالتىىىىى".. فاضطريت أحرمك منى.. وحدفتك فى أول أوتوبيس.. وفكرت جديا في إنى ماخدكش معايا حتة تانية.. بس يلا بقى خليها علينا المرة دى..
بس حلوة صدر رحب دى.. فعلا كنت باخد الكلام على صدري (رحب) وأنا منجعص كدة..
شوفتنى على اليوتيوب؟؟ أجنن على اليوتيوب مش كدة؟

الزيارة كانت ممتعة فعلا.. ياهيما
وياريت تتكرر كتير..
أحسن بقالى كتير ماتمشتش عالبحر والمرة الجاية مش هاعتقك (:

دمت بخير

رحــــيـل يقول...

هقول ايه هقل ايه هقول ايه؟
ههههه
اولا شكرا بجد على تواجدك معانا فى لقاء مدونى الدقهليه شرفتنا فعلا

اه وكنت عايزه اقولك ان مقدمة كتابك لذيذه بجد ومش ممله مش تقليديه عجبتنى قوى انا كنت لسه بقرأ فيه من شويه

الاكيد انها نصوص بجد ممتعه ومش ممله ومتنوعه بتنقل الواحد من حاله لحاله تانيه

تحياتى لك وتقديرى
اسفه جدا على التاخير والتقصير هى بجد ظروف الايامدى

Ahmed Al-Sabbagh يقول...

جميييييل جدا

والله من اجمل الاشياء فى اليوم ده

انك كنت موجود يا ابراهيم

بجد انت انسان حبوب ولذيذ جدا

وبوست رائع واسلوبك اروع

تحياتى لك

احمد

إبـراهيم ... معـايــا يقول...

حاتم يا ابني، ربنا يهديك، وادبح لك ديك!!.... أنا كنت مبسوط بما قيل عن تصميمك اللوذعي من آراء، وعجبني أكثر ردود الناس على اللي انتقدوك، حسيت إن الناس فاهمة، ومش بتجاملك ...مممممممممم ، حقيقي كان حلو وفارق ، أما شوية السياحة والسفر اللي بتعملهم سعادتك دول ، فمش علينا !!! ، انا شفتك يا ابني، ولا أعرفك من أصله ؟؟؟

إبـراهيم ... معـايــا يقول...

سـارة ...رحيل:
أنا اللي أشكركم على هذا اليوم الجميل، وأشكرك على تعليقك على الكتاب، وخـاصة المقدمة اللي خدت فيها تحديف طوب للصبح ، في جانتظـار رأيك لما تكملي الكتاب، وما تنسيش ذاكرة رحيل، نشوفوووكي على خير يوم الجمعة ... وكل المنصورية ، بعون الله

dina يقول...

اول حاجة الغنوة تجنن فى المدونة و منير طبعا دايما الكينج

تانى حاجة انا عجبانى جدا جدا فكرة تجمع المدونيين دى و انهم يتقابلوا و يتناقشوا فى حاجات كتير و بجد دى حاجة مميزة جدا
تحياتى

كيكى يقول...

عوووووووووووووووووووووووو انا جيت اتخديت
................................
يا بختك ياعم
عقبالنا...............
اكيد كان يوم جااااااااااااااامد طحن
.................................
عوووووووووووووووووووووووووو

اميرة يقول...

حبه غتاته
اسمها P.S
مش V.S

نونو يقول...

بوست حلو جدااااااا
وطبعا ححقد علييك علشان انت فى احلى بلد
اسكندرية بموت فييها
اهو قربت اجى واخلص من الحر والارف

princess dodo يقول...

ايه ده ؟؟
مش كنت تقول D:
كنت آجى معاكووو طبعااا
;)
...
ياريتنى كنت معاهم :)

.
.

سلااام

أحمد سلامــة يقول...

ياعيني يا هيما
حنسني والنبي اكتر واكتر
كمان كمان

يخرب بيت ام الامتحانت يا جدع
انا مرحتش
بس والله يا هيما كنت بفرح كل ما اعرف انك في اللقاء ده او في ده

إبـراهيم ... معـايــا يقول...

أحمد باشا:
ربنا يخليكي يا خال المدونين، ومندوب إعلامهم، الحقيقة إننا افتقدناك في الدقهلية، لكن تتعوض يا باشا ....


شوفت بتنور إزاي لما تيجي :)

**************

دينـا: مرورك الأول هنا تقريبًا، نورتي ،،، بزيـادة، ونتمنى نشوفك ف لقاءات المدونين القادمـــة

خالص تحياتي :)

إبـراهيم ... معـايــا يقول...

كيكي:
المرة الجاية هتخض بجد:) ،،،، فيـنــك يا بنتي؟؟؟ إيه الغيبة دي كلها ؟؟؟

***************

اميرة، أو رضوى:
والله عاملها مخصوووص عشان أشوف الناس هتاخد بالها ولا لأ :)
تخيلي إنتي بـــــــس :)

هبة المنصورى يقول...

كان نفسى اسمى يبقى مكتوب
بس يلا خيرها ف غيرها.. والجايات أكتر م الرايحات.. وكل الكلام اللى بيتقال عشان نصبر نفسنا ع الغلب
باعتذر ع المرتين.. ولو إن المرة الأولى - اللى هو كان يوم المدونين- مانزلتش من بيتنا أصلاً.. بس التانيه كان فيها نيه مبيته طغت عليها مشاوير عائلية مؤجلة من بتاعة يوم الجمعة دى.. التالته أكيد هتبقى تابته.. وشكل المنصورة عجبتك ورجلك خدت عليها.. مش كده؟

همسات يقول...

اتشطر بقة ياهيما واعملنا لقاء هنا فى القاهرة

أما نشوف شطارتك

عين ضيقة يقول...

ايه رايك فى المنصورة بقى؟
قول قول ماتتكسفش


طبعا ياابراهيم متفقة معاك فى كل اللى بتقوله
ايوة ايوة
عارفة انها اجمل بلد فى الدنيا

الله يخليك ياعم

المرة الجاية وانت بخير نعمل معاك واجب ان شاء الله

سلام

محمد فكري يقول...

لقاء مدوني الدقهيلة :)
كان جميل ما شاء الله..
وغلب عليه الشعر..
...............
وجودك أسعدني بجد يا ابراهيم :)
ان شاء الله قريب لينا لقاءات تانية..
.....................
سلام

hesham يقول...

حبيب قلبى

معلش بعق متاخر عند بس و الله اليويمن اللىف اتوا اخوك هش بيمر بتجربة قاسية عشان الاكاونت بتاع الفايس بو اتهبش منه

هههههههه

ما علينا

نورتنا فى اسكندرية ياباشا و مالحقناش نعمل معاك الواجب الصح بس انشاء الله نظبط ايام تانية كتييييييييييييير

خالص تحياتى و محبتى

هش

Ratings by outbrain