أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الاثنين، 10 يونيو، 2013

اكتب تاريخ العالم ! ج1


.
 حبيبتي، إزيك؟! واحشاني قوي قوي قوي، افتكرتك فجأتن، وافتكرت غيابنا اللي طال، فقلت ما بدهاش، أنشك رسالة من إياهم، واحشاني بجد ووحشاني حقيقي وواحشاني صحيح، وواحشني الكلام ليكي .. شوفيه موزون ومتزوق إزاي، كإنه عارف إنه جاي لك .. يوووه بقى! أنا قلت بس هكتب، وزي ما عمنا يوسف إدريس قال، الكلام هيتنتور على الورقة، فاكرة يوسف فاكرة البيضا .. طب فاكرة اللي شراها (هيهي هااهاه) يخرب بيتي دمي خفيف، عارف والنيعمة عارف وحيات سنانك اللولي اللي ما يقدروش يستخبوا عن عيوني عارف، وبتموتي فيَّا بالعافية وبالغصب :P   ما علينا، لسنا بصدد بيان مقدار حبك لي الآن، ولكننا بصدد أمر آخر أهم، وخطب آخر جلل، هو كتابة كما قلت لكِ في مقدمة هذا الخطاب تاريخ العالم، فاكرة العالم، عارفة بنبقى باصين له إزاي وإحنا لوحدينا؟! فاكرة لما قلت لك زمان إني طول الوقت بتفرج على فيلم أنا بطله الوحيد! بس كده، قشطات ... بدأنا كتابة تاريخ العالم من هذه اللحظة الفارقة والفاصلة، من اللحظة اللي بدأ التاريخ ياخد فيها بعد تاني، بعد وجودك في حياتي وهو مش بعد بالمعنى السلبي وإنما هو قرب أصلاً، يبقى ممكن أقول قرب وجودك في حياتي، الذي يجعل للأشياء كما تعلمين لونًا وطعمًا ورائحة، بيبدأ يا حبوبتي كتابة تاريخ العالم ده بقى من لحظة الوعي، وهي لحظة دقيقة في عمر الزمان لا ترى بالعين المجردة، ولايمكن رصدها، وإنما نشير إليها إجمالاً كأن نقول لما شفتك ولمًا عيني جات ف عينك وابتدى بيننا الكلام، أو لما ارتاحت روحي وأنا وياكي ولقت نفسها معاكي، إلى غير هذا الكلام الطويل المبتذل (لا لسوئه) لكثرة ما تردد في الأغاني والأفلام، بعد تلك اللحظة الفارقة وكل اللحظات معكِ فارقة، يبدأ العالم في التشكل، تخلق سماوات جديدة، هوووب بصي لفوق فيه سحابة، عليكي واحد ولا سحابة ولا بتاع إنها الشمس الصفراء العظيمة يبقى مش إشكال، نفهم من كده إن الحكاية مش حكاية قلب حب ولا كلمة صادقة كانت ولا كدب! الحكاية إن الدنيا بيبقى لها طعم جديد، هوا في الأول بنمارس شعور الطيران، ولا أعلم لماذا الطيران تحديدًا دون غيره من المشاعر والحركات الحيوانية (إنتي عارفة يا حبوبتي إن الطيور بتطير والحيوانات بتتمشى) لكن أهو ده اللي بيحصل، القلب لمَّا بيرتاح بيشوف الدنيا كدهون، المهم، فبيبدأ العالم يتشكل، شكلك هتزهقي من أم الكلمة دي، نقول كلمة تانية، أنا أصلاً كنت جاي أقول لك بحبك، وشوية تحابيش .. الحب مالوش أسباب زي ما كلكم عارفين، إنتو ياللي هناك سامعيني؟!
أنا عارف إن نفسك يبقى فيه كلام كتير جميل ورومانسي ودباديب وقلوب وهلم جرًا، لكن الفكرة زي ما كلنا عارفين مش ف الكلام يا قطتي، وإنما في الإحساس، أيون، هوَّا الإحساس ده، هوا اللي بيكتب تاريخ العالم، العالم اللي بيبدأ عند نقطة أولها أنا ولا تنتهي بكِ، لإن معاكي العالم بقى بيشتكل تفاصيل كتير وعيال بتتنطط ومصاريف ودايبرز وما إلى ذلك، هوا ده العالم، العالم اللي بنشوفه من عنينا، اللي هوا زي ما قال شاعر معاصر (الأرض جميع الأرض.. وهذا الكون وكل الأكوان .. شيئان .. عينان)* بس كده، من خلالهم بتتحدد رؤيتنا للعالم .. وبنكتبها ..
 ما تيجي نكتبها ..
المهم برضو إنك كنتي واحشاني قوي، وأتمنى تكون رسالتي دي فتحت لك آفاق من السعادة غير المحدودة، مش عارف ليه وإزاي، بس أهه، رسالة أحسن من مفيش وكلمة أبرك من عشرة، وعشرة طاولة والطاولة هتتكسر على دماغنا ويهيهيهاهاها يخرب بيت فقري !

نتقابل ف الرسالة الجاية ...
قبل ما انسى: اعملي شيرس ف جوجل على (اكتب تاريخ العالم) واستمتعي بالنتائج .. لااااف يووو  تيك كير .. تيك إيت إيزي .. هاف أنايس داي .. جود باي 

.
.

ــــــــــــــــــــــــــــــــــــــــــــــــ
* درويش الأسيوطي

هناك 6 تعليقات:

إبـراهيم ... معـايــا يقول...

الرسالة الجاية، هتبقى بعنوان ثلاث أشياء جميلة .. أو ثري ثينجز بيوتيفول

Muhammad يقول...
أزال المؤلف هذا التعليق.
إبـراهيم ... معـايــا يقول...

نفسي أفهم إيه علاقة الجواز أو المتجوزين بأي هراء حصل في التدوينة السابقة يا محمد؟!!
...

Muhammad يقول...

never mind

إبـراهيم ... معـايــا يقول...

على فكرة كان ممكن أرد عليك رد أقسى وأوجع من ده ...


بس قلت
The Honest Is better

إبـراهيم ... معـايــا يقول...

وبعدين حذفت تعليقك ليه ؟؟؟
أنا كده شكلي وحش :(

Ratings by outbrain