أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الأربعاء، 4 يونيو، 2014

لدواعٍ أمنية .. حقائق مجردة


كتبت منذ أيـام معلومات هامة جدًا، أحببت أن أنقلها هنا للضرورة .. 

كل أصحابي كل أصحابي ثورجية، واحد واحد وواحدة واحدة، سعادتك أنا تقريبًا ما أعرفش ف اصحابي واحد فلول يوحد
 الله !! 
فيه ولد واحد الحقيقة فلول، بس مش قوي، مش هقول على اسمه دلوقتي هوا وحيد أصلاً فماينفعش نقول اسمه كده، المهم سيادتك يعني، عندك قائمة الفريندز دي، انسفها كلها، والنبي، سعادتك، عايز أصحى ما ألاقيش منهم حد، ولا سبت (نياهاها ها ـ بضحَّك معاك) .. ا
لأ، بالحق وبالأمانة يعني، الأقدار ـ أي والنعمة الأقدار ـ ساقتني لأن يكون دول اصحابي، سعادتك أنا لا اختارتهم ولا نيلت، طب إنتا جرَّب كده سعادتك اعمل آكاونت باسمي، هتلاقيهم نطوا لك ، م الشمس م الهوا .. مش عارف!! 
المهم سعادتك، ما أطولش عليك،، عشان إحنا ف ساعات مفترجة، 
العيال دول علموني كل طرق الرذيلة اللي تتخيلها واللي ما تتخيلهاش، بدءًا بالهتافات للمظاهرات للمسيرات للاعتصامات لـ الحاجات البشعة دي كلها، 
وأنا كنت بجاملهم وأقول بكرة يرجعوا لعقلهم .. 
ويعرفوا إن رئيسنا مفييش زيه، وإن حكومتنا نظيفة وشريفة ولطيفة وأصاااالة كمااان ... (هيهيه .. سيادتك، بضحَّك معاك تاني) .. وبالتالي 
يوم الثلاث 25 كنَّا نازلين ف وقفة ماكانتش مظاهرة حضرتك، وإنتا سيد العارفين، بس العيال السسيييس اللي معاهم آآي باد، وآبائهم وأمهاتهم شغالين ف دول الخليج ، وبيدخلوا ع النت من الحاجات دي، كانوا عاملين تواصل مع بعض آآي والله، فيه واحد كده طول بعرض، لاقيته بيقول للعيال اللي واقفين قدام دار الحكمة ده الأعداد كبيرة ف جامعة الدول، والناس هجمت ع الأمن المركزي ما اعرف فين،
قوووم إحنا خدتنا الجلالة واتحركنا ف القصر العيني ..
ثورة إيه ياباشا؟!!
هوا فيه ثورة بتتعمل كده؟!!
ده هوا البعيد الأهبل كان خايف، والبعدا اللي حواليه استعيلوا، يعني معلش لامؤاخذة لو خدت راحتي ف الكلام مع سعادتك، مش حركة عيال اللي عاملها سي حبيب بعد كده دي؟!!
ده اللي يشوف جبروتهم يوم 26 الفجر، ما يشوفهمش يوم 28 !!
لامؤاخذة يعني يا باشا وإنتا أكيد كنت ف الخدمة وعارف، حركات عيال!!
 ما تصدقش اللي يقول لك ثورة وكلام فاضي،  ..
 وفي الهاية أحب أوضح الحقيقة التالية: 

فيه نغمة سائدة، سواء على فيس بوك أو بين الناس، وفي الميكروباصات وسواقي التاكسي، والمعلقين على الأحداث السياسية الأخيرة، ومش عارف ليه فيه إجماع ـ أو شبه إجماع ـ إن وصول الرئيس (عبد الفتّاح السيسي) لرئاسة الجمهورية هو عودة لنظام مبارك!!!
وأنا في الحفيقة مش فاهم التحليل العبقري ده على أساس إيه؟!
......
"السيسي" ده إنجاز من إنجازات الثورة، ووصوله إلى الحكم ده إرهاص من إرهاصات 30 يونيو (لاسيما للي معتبرينها ثورة) .. و 25 ينـاير (للي فاكرينها) .. حيث تم تعيينه وزيرًا للدفاع على يد أول رئيس مدني منتخب بعد الثورة.
..
"عبد الفتاح السيسي" زيه زي "محمد مرسي" و"عدلي منصور" بالضبط ..
رؤســـاء اللحظـات الفارقة .. بالصدفة، أو بالإجماع الشعبي، لا فرق ..
ولكن يجب أن نتذكر أنهم جميعًا لم يكونوا ليصلوا إلى هذا المنصب لولا هذه الثورات وهذا الحراك الشعبي .. العظيم  ......
 أتمنى يكون كلامي واضح ومافيهوش أي لبس أو غموض، 



 وأشكر المرور الكريم على حسنن تعاونهم 

هناك تعليقان (2):

Carol يقول...

حلوة عجبتني :)

إبـراهيم ... معـايــا يقول...

مرورك أحلى كارول، بس السؤال اللي بيطرح نفسه دلوقتي، إيه اللي عجبك بالضبط؟

Ratings by outbrain