أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الثلاثاء، 29 أبريل 2008

في الشـاااارع ....

مبدئيًا التدوينة دي، أو الموضوع ده تم التفكير له وإعداد صوره(تخيلوا بقى!!) من الصيف اللي فات !! ....

بدأت الكتابة فيه، بعد حالات الاستفزاز عالية الجودة في 12/ 3

كان حلو قوووي إن امبارح وأول امبارح، وتزامنًا مع المهرجان القومي للسينما، تكون أجازات، ويبقى وسط البلد فاضي بهذا الجمال والروعة !!

تعمل إيه بقى ف الشـارع ؟!!!

اللي يعرفوني من قريب شوية، يدركون إني حد مش بيتوتي 100%، ومن فينا هذا الرجل؟!!، في حين إني لما برجع البيت ببقى مش عاوز أنزل أجيب عيش حتى !! ....

ولكن فيه شوارع مصر (بصفة خاصة) ومافيها من حركة، وكتمة، وزحام، شيء خاص ، وسحري !!

شيء ممكن يجوعك!!، فتضطر تاكل !

هتاكل إيه ؟؟؟

ف الشارع المصري ....

ممكن تاكل سنتدوتش جبنة بـ 1.5 !!، ما تقلقش هيغلفهولك كويس، ويحطو فيه جبنه هيبان لك من طعمها إنها طازجة!!/ وهيركزوها ف المنتصف (وده اللي محدش عارف مبرراته حتى الآن)، كي لا تقلق، مش هيسموه سنتدويتش، هيسموه (باتيه)، وهتفضل تسأل نفسك كثييييير بعدما تخلصه، هوا أنا كده شبعت ؟؟؟

الحيـــــــــاة غالـــــية ....

ف الشارع ممكن تاكل حاجات كثيييير، لدرجة إنك ممكن تاكل نفسك م الغيظ!! مممممممم، الصيف اللي فات كنت بفكر أكتب عن إزاي تاكل أكثر بفلوس أقل ف الشارع، وعليه طلبت من العدوي تصوير الآتي : عربة تين شوكي، عربية بطاطا، وأخرى للكبده لا سيما عبده تلوث،عربية فشار، مقلة، بياع ذرة نضيف.... بس للأسف مفيش صور للذرة المشوية ولا حتى لعمو بتاع (البطاطا) لا سيما المستقر أمام ساقية الصاوي بعد الخامسة يوميًا ( ودي مش دعاية) ....

وذلك لأني المفروض أتكلم عن كل حاجة من دول، والفرق بينهم ف الطعم، والسعر، وبعدين ف الوصول لحالة الشبع المرغوبة، .....

وممكن ساعتها تيجي سيرة (بابا عبده) في التحرير، واندهاش أحد أصدقائي(تقريبًا اسمه وليد) من إننا بنحط كبده على المكرونة، وكان عاجبه الموقف لحد الإذبهلال .....

بعد كده يمكن تيجي سيرة التكعبيبة، ذلك المكان العادي العجيب !!!

.... وعشان خــاطر الحـــر ، نقول على ميدان العتبة الجميييل قووووي ، الشـهـيـر ، والصورة دي لولد بيبيع عرقسوس وعناب وتمر هناك ......


وساعتها ممكن نأتي على سيرة ما نشربه في هذا الحر الحارق، وأتذكر مقولتهم الخالدة عني: "كان كلما مرَّ على قلةٍ ..شرب منها"

وإن "عصير القصب"ساعتها مش بيبقى رفاهية، ومعه (بالنسبالي) عرقسوس ... وكده

كل هذا، وأكثر ... في الشارع

في الشارع أيضًا ممكن تحرق دهون :)

بالمشي من رمسيس إلى كوبري الخشب ، مثلاً

في الشارع ممكن تعمل حاجات تانية، أكثر ،،، بالتأكييــــد



*الصور : مع الشكر الخااالــــص للعدوي، صورتي في مديان العتبة، مع كوب عناب بارد محترم

هناك 18 تعليقًا:

ابو على يقول...

هههههههههههه بولوبيف بولبيف:d
انت ايه ياعم الى فكرك بالشارع دالوقت ماتخليك ف الايركونديشن احسن
بس بجد عندى مشورع جنان طق ف دماغى دالوقتى
الصيف الى جاى هانزل بعربيه كبده ياريت تصورنى من غير ماحس زى الكاميرا الخفيه وتيجى تعملى داعايه هنا
ليك عشرين ف الميه من المكسب والخساره كلها عليك:p
تحياتى يا مثبتاتى

مصطفى السيد سمير يقول...

شوارع القاهرة فيه سحر
تنومك تنويم تغطاطيسي
لما باروح القاهرة مابيجيليش نفس اروح
بس حرص شوية من اكل الشارع يا مان

نهر الحب يقول...

حمد لله علي سلامتك

المهم حقولك معلومه خطيره جداااااا

تخيل ان اسعد لحظات حياتي وانا ماشيه في الشارع...... وانا بسمع صوت العصافير.....تخيل كمان ان دي اللحظه الوحيد اللي بكون فيها لوحدي بجد وبفكر فيها في الناس اللي بحبهم

ملهوش علاقه باللي كاتبه صح

المهم عدي عليه

نوري يقول...

عارف انا مفتقده ايه
مفتقده قوي غزل البنات
بتاع الكرنيش
ولا حمص الشام الحراق قوي وسخن
لدرجه متعرفش تكله
ولارين لما بنكله
ع الكرنيش برضه ونلحوس الدنيه
ونمشي بشوكالاتيتنا كده
لحد منروح نستحمه
ياااااااااااااا
زكريات والله يا ابراهيم
الله يسمحك قلبت المواجع

بس يلا بقي لنا الله
(بست وشز فور يو)0

أسما عواد يقول...

انا نفسي أقولك اني عاملة رجيم وبحتار قوي وانا في وسط البلد آكل ايه
اوقات عشان احل الأزمة دي كرد فعل نفسي لا أقل اقعد أحلم اني فتحت مطعم في وسط البلد للكتاب الغلابة اللي زينا
وأفكر اني هسميه بيتي
وافكر انه هيكون لذيذ جدا لأني بعمل اكل لذيذ وصحي
وكمان هيكون رخيص وينفع للي عندهم السكر او الضغط او اللي عايزين يعملوا رجيم زي حالاتي
المشكلة ان حتى من غير رجيم انا بحتار
آكل طعمية مقلية في زيت عربيات قديم
ولا شاورما لحمة كلاب وحمير
ولا شاورما فراخ ميتة
ولا كفتة بالتكسوبلازما
وتنتهي غالبا بالكشري ..أقول لنفسي ان أخرة الكشري سوسة
موش تسمم لا سمح الله

إبـراهيم ... معـايــا يقول...

أبو علي :
الدماااغ الكبييرة، الإيركونديشن ده بنسمع عنه زيك تماااام، وزي ما قلت لك لما تنزل بس قول لي ...........

تحياتي يا بتنجاني

*************
مصطفى بيـك، كويس إنو مطلعتش أنا لوحدي اللي بقول كده،،،، بــس بالنوسبا لأكل الشارع ، فعلى رأي المثـل ... هيا موتى، ولا أكثر ؟؟؟ :)

إبـراهيم ... معـايــا يقول...

نهر الحب :
على اعتبار إني كنت ف الشارع، وجيت :) عمومًا الله يسلمك يا ستي، فعلاً الشارع بيخلق (أوقات يعني) لحظـات حلوووة قوووي
و ع فكـرة ، أنا بعدي عندك عططوووول

منوراااني

**************
نوري: حلوة الحاجات البنانيتي اللي انتي مفتقداها دي ، غزل البنات ده جنايني شوية، أما حمص الشام فمرتبط بالشتا أكثثر ، ولارين طبعًأ مرتبط بالمنيل :)
دي تصنيفات الحاجات اللي إنتي ذكرتيها، وعليه فهي ليست شوارعيه :)
تحيااااتي، وفي انتظـار رسالتك

محض روح يقول...

الشارع
حلو البوست
فعلا فيه حجات كتير اوي
انا بحب التسكع مع صحابي على قصر النيل والذره السخن
ياه
جو تحفه
:)

ابو على يقول...

طب انت بتسمع عنه طب انت بتقول زيى ومش زيى ليه..... على فكره انا بتكلم عن نفسى دايما ابل ماتكلم على غيرى ويا سيدى لو مزعلك الاير كونديشن خليك واقف ف البلكونه اهى طراوه

غير معرف يقول...

لو أنا في الشارع
و اشتريت بجنيه من بياع ترمس على الكورنيش
و كانت التدوينة دي مكتوبة في الورقة اللي عمل منها قرطاس للترمس
و انا خلصت الترمس و فتحت الورقة اقرأ اللي فيها كعادتي
و الراجل سألني " مين كتبها دي يا أبلة ؟ "
هقوله من غير تردد ثانية " ابراهيم عادل "
:)::))
لا تكتب في ورق يمكن ان يصبح قراطيس فيما بعد عند بتوع الترمس على الكورنيش :))

بحلم يقول...

القاهرة بالليل..وسط البلد..ابن اللذين النيل..ياااه يا هيمو..سحر حلال

نور يقول...

بالرغم من انى نفسى اسيب البلد دى واهج بس انا متأكده انى هشتاق مووووت لشوارعها و الناس اللى فيها و الجو بتاعها مش عارفه زى ما مصطفى قال فيها سحر
حلو التقرير ده و سلام مؤقت

ريحانة يقول...

احلى حاجة انك ماشى فى الشارع مركز اوى مع اللى يتاكل
طب ازاى تنسى الترمس؟
مهم اوى



التدوينة بجد حلو
اقولك؟
انا بحب اسلوب الكتابة هنا اوى
تسلم:)

آية مش هنا يقول...

يبدو انك استغرقت وقتا طويلا لتحليل الشارع :)
مش عارفة ..
بس الشارع لا يعني لي شيئ غالبا إلا في مواقف التطرف المزاجي ..
يعني لما اكون فرحانة اوي او زعلانة اوي ...
لما اكون وحيدة اوي او ونسانة اوي ..
غير كده الشارع شاااارع ..شااااااارع

تحياتي :)

إبـراهيم ... معـايــا يقول...

أسمــا : آآه، ريجيم ، ومين سمعك، الريجيم أوقات بيبقى مادي أكثر منه معنوي!!، ساعتها الخيارات بتبقى صعبـة فعلاً :) ....... وعلى فكرة تقريبًا تقريبًا كرهت الكشري خلاااااص :)
فكروووني أكتب تدوينة عن البطاطس يا جماعة، لأني حياتي من غيرها !!! ما تسواااش :)

***************

دينـا : إيه التسكع دي ؟؟؟ بصراااحـة كده، طب قولي المشي ، الذهاب ...
عمومًا مفيش أحلى من قصر النيل طبعًا
تحياتي ، ونورتي

إبـراهيم ... معـايــا يقول...

أبو علي :
جميلة عودتك مرة أخرى، لعلمك الوقفة ف البلكونة نعمة فعلاً ، بس نعمل إيه قفلوها عندنا :)
نورت يا جميــــل
مانتحرمش :)

***************
يعني، غااالبًا عارف مين، بس متشكرين للإشارة إلى ماورد في المسحوق والأرض الصلبة، وابقي اظهري بقى :)
**********

بحلم : نوءة ، مش كده برضووو *****
نور ، نفسك تسيبي البلد ليييه ؟؟؟ ماشربتيش من نيلها، طب جربتي تسيبلها؟؟ ....
بلدي وإن جارت عليَّ عزيزة
عارفة عزيزة :)

مــ(نور)ة

حازم سويلم يقول...

ايه ده يا برنس, جبنة وتين وبطاطا وتمر هندى ومن العتبة للتحرير, انا رجلى وبطنى وجعونى بصراحة

تحياتى فى اول زياراتى

إبـراهيم ... معـايــا يقول...

ال.. ريحانة:
مش عارف صحيح إزاااي نسيت الترمس، رغم إنو أساسي جدًا ....وليا واحدة صاحبتي كانت بتتهبل عليه :) ...
سعيد برأيك وبإن كتابتي بتعجبك، يااارب دايمًا ....
ما نتحرمـــش :)

**************
آيـة ...
واضح إنك مش هنا خااالـص، الشارع شارع، والحارة حارة، إنتي بتبصي ع الشارع من فوق الظاهر !!
الشارع حالة إنسانية بنعيشها معانا كثيييير
يمكن بس إنتي ما جربتيهاش

تحياتي
وفروالة بالزبادي

Ratings by outbrain