أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الثلاثاء، 22 أبريل، 2008

شـــغــل .. بيـــت !!!

الذين يكتبون يوميًا يجب أن يكافئوا بنوبل يوميًا !!

الذين يكتبون يوميًا لا يرهقون القراء فحسب، إنه يرهقون أنفسهم أولاً، ويظلون منزعجين من الأفكار التي لاتكتب بمجرد التفكير فيها !!!

الذين يكتبون يوميًا مثلي، ومثلكم جميعًا ... لهم الله !!

الذين يقرؤون يوميًا لا غبار عليهم، إنهم يتلقون، ثم ينسون تباعًا كل ما تلقوه، وليس كالأكل يتخلصون منه، إن ما يذهب مما يقرؤونه إلى (لاوعيهم المزعوم) أقل من أن يزعجهم !!

هذه كتبتها .هـ ـ ـكـذا :

شغل .. بيت !!

أولاً: من غير تريقة، ولا طرقعة، ولا فرقعة ... سأتحدث عن شغل البيت !!

ثانيًا: مين قال إن الموضوع مقتصر على الـ"بنات"، أحيانًا يضطر الأولاد في بيئات متعددة لممارسة هذا الدور:)

ثالثًا: الموضوع ممتع، وليس كما يصورونه لكم على الدوام !!، وسيأتي تفصيل ذلك فيما يلي .

الفكرة الأولى في الحقيقة ليست من اختراعي المحض، بل قالتها أختي الكبرى، ورددتها علي كثيرًا حينما كنا صغارًا ونذاكر (تخيلوا كم كنا أبرياء!!) كانت تقول: ياليت المذاكرة زي " الترويق" ( تقصد شغل البيت)، وتعقد مقارنة بسيطة دالة، وملفتة، فتقول إن الترويق يبذل فيه مجهود كبير أو صغير، إلا أن النتيجة دائمًا تظهر بسرعة، وهي نتيجة مرضية في كل الأحوال، فعلى قدر الجهد تكون النتيجة !!، أما في المذاكرة فقد نبذل أوقاتًا كثيرة فيها، ثم يأتي يوم الامتحان الخاص، وقد نعتقد أننا أدينا فيه كل ما علينا، ونظل ننتظر النتائج، حتى تأتينا نتيجة نحن في كل الأحوال غير راضيين عنها !! ...

وأنا أقول ببساطة ياريت فعلااً المذاكرة زي شغل البيت !!، ربما تأخر شغل البيت، ويظل "مكركبًا" كما يحدث دائمًا، لكنك في اليوم الذي تقرر أن تفعل .. فيه، تتغير الأشياء فجأة، وتظهر النتائج المبهرة، والمريحة تمامًا!!، قد تنتهي خائر القوى منهك العضلات، لكن المكان من حولك يبتسم بكل رضـا !!، في حين أن أي جهد آخر قد تتراخى عنه قليلاً يصعب عليك العودة إلى ماكان فيه من جهة، ثم إنك لاتضمن نتائجه أبدًا !! ... فتبًا لذلك ...

الفكرة الثانية: التي تحضرني كلما "غسلت المواعين" أنه على الفتيات والسيدات تعلم الدرس البسيط الذي تمنحه لهم هذه المواعين، وهي أن ما يتركونه يومًا أو يومين تتراكم عليه الدهون أو بواقي الطعام، ثم نتذكر فنغسله يستهلك في كل الأحوال وقتًا أطول، من حال لو كنا أتعبنا أنفسنا وغسلناه فور تغيره، وكذلك الإنسان، وعلاقتنا بالبشر، فقد تخطئ مع أحدهم، وتتركه، إما تجاهلاً، أو لشعورك بأن الأمر لا يستحق الاعتذار، ولكن ما يحدث أن الدهون تتراكم، وقد يصعب إزالتها بعد ذلك !!

أشياء كثيرة في حياتنا يفسدها التراكم!!، ربما من هنا نصحونا بألا نؤجل عمل اليوم إلى الغد، كل عمل اليوم، اعتذار اليوم، كلمة اليوم، نصيحة اليوم ... كل ما يشير إليك بأن عمله اليوم أفضل لا تتوانى عنه، ولا تسوف ، فالتسويف مرض قااااااتــل !!

الفكرة الثالثة

أنا وأنا وشغل البيت .. دي شهادة للتاريخ والجغرافيا، ودرس في تطور الأشياء والأحياء، وحابب قووي أذكره، مش بس عشان أعلم بيه العزاب الجدد، ولكن لكي يكون عظة وعبرة لمن يأتي بعدي، ولو حتى من أبناء المرحوم ...

..... في البداية كنت لا أفعل شيئًا(هوا الاختصار المخل لما بعد هذه الجملة، أن أقول، والآن أصبحت أفعل العديد من الأشياء، ولكن ما هكذا تسلق البطاطس!!)

علمتني الحياة كأعزب، إن مالاتروقه اليوم، ستضطرك الحياة لترويقه غدّا ( شوفوا لنا حد ف المجمع يفصح لنا ترويق دي، على وزن تزويق!!)، وإن الأكلة اللي ما تعملهاش، بلااش منها!! ربما يذكر بعضكم أني عملت( سد الحنك) ذات ليلة لم يطلع فيها القمر، ولكن مالم أٌله أني (بطلت) تقريبًا، وفي مجال الحلو(الذي ما يكملش)أنتج مطبخي العامر (بليلة) من النوع الراقي، ولي معها ذكريات جديرة بالتسجيل، حيث أني في المرة الأولى كادت أن تحترق مني، لولا لطف الله، واكتشفت بعد غسلها أن الأمر لا يعدو كونه ماء بني اللون، ما إن"غيرته" حتى تبدل الوضع، وكانت شهية جدًا ... (اتفضلوا طبق) ... كذلك قمت بعمل الشعيرية باللبن، بس هيا مرة واحدة برضو، سدًا للذرائع !!، أما على مستوى الطبيخ، فلم أخط عتبات هذه المغامرة حتى وقت الناس هذا، ومازلت أتسائل إيه لازمته وجع القلب ف الطبيخ، مادامت المكرونة (رغم إني بقالي كثييييير ما عملتهاش) موجودة، هي وأختها البطاطس (مقلية ومسلوقة بالبيض) ...

وعلى سيرة الأكل، فقد كانوا علمونا زماااااااان إن فيه حاجات بتختفي ف الشتا، على اعتبار إنهم بيحترموا الشتا، فبيقوموا بما نسميه(البيات الشتوي)، ولكن ثبت في منزلنا العامر، إن النمل لا يأبه كثيرًا بالبرد، وإنه بمجرد ظهور أي بوادر (هريسة) ينقض عليها، ويحولها مستعمرة نمليكية نادرة :)، ياللا بالهنا والشفا، وإنشاللا ما كلنا احنا !!

***********

ده ف المطبخ، بالخارج أنعم الله علينا بشقة (ترد الروح) تتوافد عليها الأتربة دوريًا، مما يجعل الحياة مع الغبار واقعًا لا خيالاً فيها!!، والموضوع بيستمر لمدة شهر (بكثيره) حتى أقرر أن أنفض الغبار عن بعض الأشياء، التي تهمني في واقع الأمر، ولا أقوم بمغامرة المسح المرهقة إلا مرة كل شهرين (تقريبًا) !!، وهذا يحتاج درس في النظافة التي هي من الإيمان !!!، بس الواحد هيلاحق على إيه ولا بيه ؟؟؟

من جهة أخرى أخذت درسًا ذاتيًا بسيطًا في الخياطة، له أبعاد اضطرارية أدركها أنا جيدًا، ولا حاجة للتوسع فيها هنا، حيث تظل المدونة رغم شخصانيتها الشديدة، وتفردها الغريبة مساحة يطلع فيها البعض على البعض الآخــر!!...

إهـــداء صغنون لسـارة الإسكافي (عشان التنفيض)


هناك 30 تعليقًا:

اميرة يقول...

ياااااااااااااه يا ابراهيم
فكرتني بشغل البيت و الترويق
فعلا الموضوع ايام ما كنت بمارسه كان ممتع جدا جدا و مش بيحتاج على فكره وقت كتير

كنت داخله اسلم

فا

سلام

اشوفك على خير

نهر الحب يقول...

انت متتصورش قد ايه صعبت عليه قد ايه

الغريب بقه اني ديما كنت بتخيل انت يا تري بتعمل ايه لوحدك وبتاكل ايه

و كل مره تصعب عليه واقول طيب بلاش الاكل اكيد بياكل بره

اقول طيب الغسيل والترويق


ربنا يريحك ويرزقك ببنت الحلال

بس خير حتلاقيك متعلم وحتساعدها

مراقب عام يقول...

سعادتك الموضوع مكتوب من شهرين، لسـه فاكر تنزله دلوقتي ؟؟؟
.
.
تاريخ الإنشاء 52/2 ،، يااا مفتري !!!

هبة المنصورى يقول...

على فكرة يوم التنضيف ده- مش يوم معين بس لما المزاج يحكم- له فوايد كتيييييير.. غير إن الواحد بيحرق سعرات وبيفرغ شحنه -بالذات ف غسيل حوض أو مسح أسطح زجاجية أو مرايات- كمان ممكن تصيف مع المواعين وتعيد ترتيب مفردات البيت فيطلع بنيو لوك يجنن

أنا شايفه إن غسيل المواعين ف اليومين الحر دول أحلى حاجه تتعمل.. بيدى الواحد مساحة يفكر ويسرح ويدعك ويدعك ويدعك لحد ماحد ييجى يقولك ارحم الكوبايه ولا الطبق... والله بقى كمان على مزيكا ف الخلفيه.. باحس إنى شاديه ف "نحن لانزرع الشوك"..

sosa يقول...

يعنى يوم ما تهديلى حاجة تهديلى بوست عن التنفيض والترويق
ماشى مقبولة منك يا ابراهيم
فكرتنى باللى بحاول انساه ليه:(
واضح انك خبير فى شغل البيت جداااااااا
مستنية كتابك الجاى يكون لك سيدى رب المنزل
اهه حاجة جديدة وتنفع شباب اليومين دول بدل قعدتهم على القهاوى

بيسوو يقول...

مبحبش التراب..ولا الغبار..ولا النمل..ولا بحب اسيب حاجة في الحوض اكتر من ساعة...وطبعا بنمسح اكتر من مرتين تلاتة في الشهر

بس تصدق فعلا ان الترويق اسهل من المذاكرة..تحس كدة انه لكل فعل رد فعل..يعني مثلا لما تشيل حاجة من الارض هتتشال معاك..ولما تمسح غبار بيتمسح.كدة يعني

انصحك تبعد عن المطبخ..واضح جدا انها مش لعبتك يا ابني..ربنا يسترها معاك

إبـراهيم ... معـايــا يقول...

ال أميرة هانم :
مرحبًا بكِ ، وبسلامك، .... مش عارف يعني إيه أيام ما كنت بمارسه دي، عاوزة تحسسينا إنك بطلتي؟؟ ولا إيه ؟؟؟
.
.
آآآه، دكتورة بقى ، وبرستيييج
*************

نهر الحب:
يا ستي ما يصعبش عليكي غالي :) ....
بلعكـــس لهذه التجارب سبع فوائد، واسألي المتجوزين يقولو لك :)

نورتي

آية مش هنا يقول...

ابراهيم ..
على قدر كرهي لكلام الستات عن الطبيخ و الترويق و الرجالة و الغسيل و القرف ... على قدر حبي للرجال عندما يتحدثون في نفس الامور ..أشعر بالمساواة ربما ..و الشفقة احيانا.. و في كل الاحوال يشعروني دائما بعظمة الانثى :)

*سمر* يقول...

:)
كان الله فى العون بجد ..
بس جميل اوى ربطك لشغل البيت بمواضيع عامة ..زى نتائجة السريعة ..وتراكم الدهون..
زمان انا كنت بخاف اوى من الطبيخ والترويقو الحاجت دى ..وكنت فاكره نفسى مش هفلح ..لكن اول لما بدأت لقيت الموضوع سهل جدا ...
بس التدوينة جميلة جدا

نور يقول...

شغل البيت بالنسبه ليا مزاج يعنى على حسب المود اللى انا فيه
اما الطبيخ فهوايه عندى بحب افنن فيه
بس على فكره انت احسن من ناس كتييييييييييير انا اخواتى مالهومش فى الحاجات دى خالص
و كل حاجه يا اما انا يا ماما دا انت نعمه والله
بس بالنسبه للمطبخ اعمل معروف وابعد عنه واضح انك مش اوى فيه
تحياتى وسلام مؤقت

مصطفى السيد سمير يقول...

يا سلام على الدروس اللي الواحد ممكن يتعلمها من المواعين
ما انا كل يوم باغسل وفعلا بتقابلني مشكلة التاخير دي
لكن عمري ما عملت حالة صداقة زي كدة

تحياتي
وشد حيلك

د\أسماء علي يقول...

يبدو أن شغل البيت نعمة
واللي يكرهها يعمى
عامة شغل البيت عندي اضطراري جدا خالص اوي
عشان باكره الكركبة
انا مش باستمتع بالتنضيف اتشلاقا موتشلقا
لكن باستمتع بالطبخ جدا
وعامة باهرب من التنضيف والترويق على اد مااقدر
...
موضوع المواعين وتراكم الدهون والاعتذار المتأخر
في حاجة أحيانا الواحد بيبقى عارف انه المفروض يعتذر بس بيصبر لغاية مايشوف الشخص وجه لوجه عشان بيعتقد ان الاعتذار كده هيبقى افضل من تلفون او ماسينجر
وعامة ف الآخر فكرتك هي الصح ان ساعتها بيبقى الموضوع أصعب ..
...
وكل ترويقة بين وانت جايبلنا بوست في ايدك كده ..

نوري يقول...
أزال المؤلف هذا التعليق.
نوري يقول...

طيب ايه الي جبرك
ع وجع العضل ده
مالها الست ام محمد الشغاله
وام حنفي وبنتها كمان
ممكن ابعتهملك
بعشرين جند في الاسبوع
تطلعلك العرس والقطط الفطسانه في البيت وتشلك الغبار وتطبخلك اكل الاسبوع وكل حاجه
ويلا بقي انشالله ماحد حوش
ده فعلا يا باشا
الشغالات دول نعمه
من نعم الدنيا
يارب زدنا ولا تحرمنا
ولو بجد احتجت وحده منهم كلمني ع الموبايل ورقمي هو
صفر تلات تصفار وصفرواحد
وانا ابعتهملك فريره

يلا بقي(بست وشز فور يو)0

إبـراهيم ... معـايــا يقول...

مااااشي يا عم المراقب، بعد كده تبقى تركز وإنتا بتكتب التاريخ ، اسمه 25/ 2
ووبعدين ماانتا شاااايف الحالة عاملة إيه :)


***************

هههههههههه
هبة خانو، تمااام ، هيا شادية ف نحن لا نزرع الشوك، من ذكرياتي عن الترويق برررضه بس العائلي بقى، يوم كان اسمه الأربع ، مميز قووووي ، حيث إم بي سي إف إم ، على آآآخرها ، وصوت المكنسة ، وغسل المواعين ، أنا طبعًا كان بيبقى عليا أوضة واحدة، يااااااااااه
أيام يا هبة !!

نورتي على كل حالات

إبـراهيم ... معـايــا يقول...

سوسااااا:
هلكتيني م الضحك، هيا وصلت لدرجة عزيزي رب المنزل !!! يا نهار ألوان ، لأ الكتاب ده ابقي اكتبيه إنتي يا ستي ، متنازل لك عنه :)
نورتي كالمعتاد، وده أفــل واجب

**********
بيســـووو ، قصدك إيه، أنا أي نعم مش طباخ ماهر، بس بقالي كثير، ومش حاسس إن الواحد محتاج يكون كده ، تقريبًا الغبار والنمل ليهم سيرة ، مش فاكر كان مين اللي كاتبها :)

تحيااااااتي ، وابقي ظبطي مواعيدك بقى

إيما يقول...

هو المطبخ ممتع بصراحة إنك تعمل حاجة جميلة أمتع من طعمها نفسه :) شغل البيت بأه علي حسب المزاج بس عجبتني جدا نظرياتك التي استخرجتها من المواعين :)

تحياتي يا فندم

صحفية روشة يقول...

بوست جامد بس جيت على الوجع وعصرت ليمون
فكرتنى بشغل البيت فى الاعياد
____________________________
للى عاوز يزور لوحه شرف يدخل مدونتى وهتلاقو لينك لوحة شرف فيها
لوحة شرف هى لوحه شرف لكل من دون فابدع وينشر بها افضل بوستات كتبها البلوجرية
____________________________
ميفوتكش البوست الجديد (اوزه سينى هدوم اروسه)

إبـراهيم ... معـايــا يقول...

آيــة ،،، اللي هنا:
كويس إنه عجبك، بس مش لدرجة عظمة الأنثى يعني سعادتك ، الله يرحمك يا صلاح، كان بيقول مهيش كمالة عدد ، دلوقتي العدد بقى × اللمون
.
.
نورتي :) ،،،،،،،،،، وما تبقيش تغيبي برضك
**************
سمر : نورتي قوووي ، نورتي جدًا ....


هوا الترويق مش مسألة عويصة بالتأكيد
بس سيبك إنتي .....
إنتي منورة برضك

ابو على يقول...

ممكن صحن بليله بس اتوصى بالثكر يا ثكر

ملكة يقول...

كان لازم والنبي تفكرني بالهم ده؟
مذاكرة وترويق ومسح وتنفيض وطبخ؟!!
خرب بيت كدة
احب اقولك انك عريس لقطة يابني،عملت كل الأكل ده لوحدك؟
والله انت لازم تستغل احسن استغلال
لازم تبقى عبرة لمجتمع الرجال علهم يتعدوا منك

شروق ..مدونة تحت العشرين يقول...

رغم كل مميزاته
مش بحبة
بكرهه جداً

أصل بصراحة و بيني و بينك و بين كل الناس اللى بيدخلوا البلوج بتاعك
أنا همجية و مش منظمة تماماً بشكل عام
آه و الله
يعني مش بحب أطبق الهدوم و أرص الكتب مكانها و الكلام ده
لا لا أنا أصلاً لو عملت حاجة من شغل البيت بتكون عشان النضافة مش النظام
أنا فعلاً بكره شغل البيت
أما عن الطبيخ فلو حدث و لا حرج و طبخت فالأكل غالباً بيترمي بس ماما مش فارقة معاها لإنها مقتنعة بمقولة جدتها الله يرحمها " خيبي طبختك و لا تخيبي بنيتك " و رغم إن الأكل بيطلع محروق أو ني أو محتوط بدل الملح سكر إلا إني مش بكون زعلانة بالعكس ساعات بكون مبوسطة و أنا باطبخ و ساعات بحس بالجنون و متسألنيش إزاي

أما عن غسيل المواعين فبصراحة مش بستفيد منه غير إنه بيخلي أيدي بيضة و حلوة من غير كريمات رغم إن بابا جاب لنا غسالة أطباق بس لازم بردو الصحون تتشطف الأول قبل ما تدخل الغسالة

بس حكاية يا ريت المذاكرة زي شغل البيت دي مع أختك حق فيها
:)

حاسة إني قلت كلام كتير مالهوش لازمة
بس مش مهم مش البلوج بلوجي بردو يبقي أقول اللي أنا عايزاه D:

غير معرف يقول...

التراكم بيصيب البني ادم بالاكتئاب
سواء كان تراكم مذاكرة او مواعين او اي شىء اخر، الا اننا لو نظرنا للموضوع من وجهة نظر اختك هنلاقيها عندها حق جدا فى ان ياريت المذاكرة كانت زى الترويق ،فالترويق وغسل المواعين - فضلا عن نتائجه المبهره - فهو قد يتيح للمرء عدة اشياء يعملها في وقت واحد ، يخلّوه مايحسش بتعب أو ملل الترويق، حيث تعطينا فرصة للسرحان والتفكير فيما نشاء(أوحتى فصل المخ وعدم التفكير خالص)، وبحرية تامة ومطلقة، ودون ارهاق المخ في حفظ مواد منيلة بستين نيلة ،أيضا الترويق يكفل حق الغناء للقائم على هذه الأعمال والترويح عن النفس المكبوتة( غالبا اللى معاك هيقدروا حالتك فهايسيبوك تطربهم براحتك )أما المذاكرة فدورها الأساسي والمحوري ينحصر في كيفية إرهاق النفس البشرية وكبتها ، وهي السبب في كل الأمراض السيكلوجية والفسيولوجية كمان ولذا قد يبدوا لنا شغل البيت في بادىء الامر انه أمر ممل وشاق، لكن لوقارناه بالمذاكرة هنلاقيه - بالتأكيد - نعمممممة
أما بالنسبة للطبيخ ، فأعتقد انه كفاية عليه اوى لحد كده ،
يعنى كل حاجة بتتغير والزمن بقى غير الزمن ،مش فاهمة هنفضل نطبخ لحد امتى ؟ يعنى صحيح مش طالبة وجع دماغ

نيجى عند المسح بقى ...اللى كل شهرين ده
هههه
عندنا واحدة جارتنا بتنفض وتمسح وتقلب الشقة كلها حوالى 3 مرات في الاسبوع ، تفتكر ده مرض ؟ ولا فضى ؟!! ولا ده عادي يعنى ؟
بس هي طبعا مش تعبانة ف حاجة ، ماهي بتجيب واحدة تعملها كل حاجة كعادة ستات هذا الزمان....
ربنا يعينك
ويعيننا جميعا

وسلام
نـضـال

إبـراهيم ... معـايــا يقول...

نور : لإزيك، ده مرور أول ، منورة ، سعادتك أنا كنت زي إخواتك لوقت قريب
وبعدين أنا لو عاوز أبقى شيف هبقى ، بس أنا اللي مليش نفس

**************
مصطفى باشا
أهلاً بك يا رجـل هنا ، وسط مجموعة الناس التانيين
شفت بقى ، اتعلموا حاجة للزمن
نورت
*************
دكتورة أسماء،
الترويق فعلاً متعب ... ، بس الطبيخ بقى موال تاني، وبعدين كده نبقى عاوزين نعرف وصفات سعادتك بقى لمطبخ شهي
نورتي يا فندم

kafrawy يقول...

هههههههههههههههههههه


على فكرة شعر اغسطس

هو شهر الباذنجان

م ف ر يقول...

ياااااااااه

يا أخي فكرتني بأيام لا أعادها الله...

موضوعك استثارني لدرجة إني لم أقاوم رغبتي في التعليق (مع العلم أني لم أعلق على مدونة منذ أن وجدت المدونات على ظهر البسيطة- ليس غرورا أو تكبرا عياذا بالله وإنما كسلا أجارك الله - )

على كل حال كثيرة هي المرات التي كنت تتحفني بها بزياراتك أيام المحنة - أقصد أيام العزوبية - ولم تتعلم الدروس والعبر - والسعيد من اتعظ بغيره. ويدور الزمان دورته وأكون السبب في حالة البؤس العزابية التي تعيشها ولا حول ولا قوة إلا بالله.
َ
على كل حال شدة وتزول يا عمنا،أمال انت عايز تحكي لأحفادك ايه يعني بعد ما تتحال للمعاش ونلبس الجلباب.

وبالمناسبة أنااقترح بكل جدية انك تعكف (حلوة تعكف دي) على إخراج مجموعة كتب تنشرها مكتبة جرير وممكن تكون العناوين كالتالي:

- دع القلق واغسل المواعين (يعني هو كارنيجي أحسن منك في إيه)

- الأطباق من المريخ والمعالق من الزهرة

- كيف تروق البيت في 10 أيام فقط

- إتحاف العزاب بوسائل طرد الذباب

- القول الفصل في القضاء على النمل

- نزهة أولي الألباب في تنقية أجواء المطبخ من الهباب

إبـراهيم ... معـايــا يقول...

نووري :
مساء الفل ، أم مجحمد وأم علي إيه بس؟؟؟ لالالالا ، أنا معنديش الحاجات دي ، مش عارف ، حاسس إن ماحك جلدك برضووو إلا ضوافـرك يعني !!!
فما بالك ببيتك، ومواعينك وشقتك :)
عمومًا تشكري

*************

إيما ، أي خدعة ، تحيااااتي و فراولة بالزبادي :)
**************

الصحفية الروشة :
سلامة الجرح ... واللمون

تحياتي لمجهوداتكم :)

إبـراهيم ... معـايــا يقول...

أبو علي :
داخل على طمع إنتا
عمومًا اتفضـــل، بــس ماتاخدش على كده
**************

ملكة:
نركز شوية، منين عريس لقطة، وعبرة لمجتمع الرجال يتعدوا مني ؟؟؟
أعتقد رجاله كثييير النهاردة بتشوق بشغل البيت خير قيام، لا سيما في ظل قانون الطواريء اللي احنا عايشين فيه
تحياتي يا فندم
**************

الفنانة الصغيرة ..شروق :
أيوة، أيوة، فاهمك أنا، كل الفنانين كده، اسأليني أنـــا، ستجدين حولي كل شيء مبعثرًا !!!، أنا بس كنت بفضفض عن لحظات نادرة في الوجود، ولكنها تحدث أحيانًا...........
و غشالة الأطباق دي هتشككني فيكي

والبلوج بتاعك طبعًا يا ساتي
ونورتيني

إبـراهيم ... معـايــا يقول...

نضال ، مش التراكم بس اللي بيجيب الاكتئاب، دلوقاتي المية والهوا بيجيبوه كمان
نورتي قووووي بتعليقك المطول اللظيظ ده

وآآآسـف على تأخر الرد يا جمــاعة

********************

محمد باشافتحي
يا نهار ألوان ....
إنتا بجد دخلت وعلقت، إنتا عارف إنك بذلك حطمت الأسطورة اللي بتقول إن الناس مش بتعلق :)
نورت بجد حقيقي قووووي ا محمد ، لا سيما إنك حد مشترك معايا ف الموضوع بالثلث ، ولولاش سفرك كان ليا كلام تاني معاااااااااك إنتا وأختي حبيبتي
ما علينا ، مش هنسيح ، حـاضر
عناوين كتبك هلكتني من الضحك ، بس دي فكرة هبقى أوعدك أعمل بيها لما آخد منحة التفرغ
دع القلق وادخل المطبخ قاااال


تحياتي يا جميـــل
وابقى علق ع البوست اللي بعده :)
إنتا برضك ليك ف الشارع صولات وجولات
تحياااتي

Rana يقول...

بوست جميل بجد
بس انت هايل في شغل البيت وتعرف حاجات احنا منعرفهاش يعني ممكن تدينا كورسات
كمان...
أنا معاك في حكاية تراكم الدهون في قضية المواعين
انا عشان لما بتتراكم بيبقى صعب غسلها بسيبها على ماما أو أختي :))

أما الترويق فقضية بايخة جدا محدش يألني عليها
المسح بقى بيبقى حلو في الصيف عشان نديها مية تدينا تراوة :))

لا بجد بوست جميل قوي

Ratings by outbrain