أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الثلاثاء، 17 يونيو 2008

مــنـيــــر .. مش قووي يعني !!

....

"" سمعت شريط منير الجديد"؟؟ ...

ف الأول بتجاوب ع السؤال عادي، بأن "نعم" آآه يعني، أو لأ " لسه مثلاً !!

لكن لما يتكرر، ويتردد مع كذا حد ف كذا حوار، وحد يقول لك "ماسعمتوش لغاااية دلوقتي ؟!!" ، ده (خلل) !! .... (آآه والله !!) .. يبقى الموضوع فيه إنَّ .. و أخواتها !!

..... ،< طب ماشي ، نسمع منير يا حضرات ... ، أنا مش بكرهه خلاااص ، بلعكس، أنا بقيت بحبه، حتى لو قال ( سووو يا سوووو ) والبركة ف ست داليا :).....( هوا فيه حد يغني حبيبي عايزله سكر منين أجيب له سكر !!!!) بس الفكرة مش ف كده، الفكرة إنه منير ف "طعم بيوته" بيطاردني !! ، و إلا بماذا تفسرون مقالات الملك ف الدستور مؤخرًا ! >>>دي و ..غيرها

وأناالحقيقة ليا "قصة" تُروى مع الـ"كينج"، حيث كان لي زميل دراسة ف الثانوي، واسمه"حسن" الولد ده كنا ناقر ونقير معبعض على طووول ، وتقول الروايات عنه : وكان يحب منير ! ....

في الوقت اللي أنا كنت فيه لسه مستكشف"كاظم"، وببرر حبي ليه لغناؤه بالفصحى، كان صعب عليّا أؤمن بذلك الأسمر النحيل، اللي كان بيغني أياميها "نعناع الجنينة المسجي في حيطانه..شجر الموز طرح !!" وأفتكر إني كنت بسمعها شجر "المسترح"!!، وطبعًا مافاهمش معناها !!....، ولا ( في عشق البنات أنا كنت نازل يوم !!!) وكان "حسن" يرى في منير شخصية إنسانية بكل ما تعنيه الكلمة من معاني، فلما أنتقد له أنا حركاته يقول لي أصله تعبان، طب والحركات الغريبة بتاعته، يقول لي مش عارف إيه النوبة كده، طب ودي كلمات اللي بيغنيها دي، يقول لي ده تراث !! .... مكنتش بقبله !!، ومايحاولـش !! ....

بعد 100 سنة (تقريبًا كده) .. وجدت نفسي متلبسًا بطائفة أخرى من نادي "محبي محمد منير" ، أرجوكم محدش يقول لي معقولة دفعتك كلللها مكنش فيها حد بيسمع منير، أنا كنت بعرف عمرو على شيرين بالعافية !!، المهم ، فيه داء كده أصيب بيه بعض خريجي كليتنا، والكليات المجاورة (ولا زال أثره فاعلاً) اسمه بعيد عنكو الـ FGF، أو لحماة العربية" جمعية جيل المستقبل"، ومش عاوزين نجيب × السياسة، كانت أياميها ثورة روبي (الله يرحمها) وأخواتها، وكت لسه الست نانسي مشعللة، وأفاجئ بطائفة من البناتيت اللي أنا بطلق عليهم مجازًا (هاي كلاس) حيث بابي وماما، والعربيات، واللبس و .."الذي منه" ، أفاجئ بإنهم بيحبوا الـ (كينج) ، وعاوزين أغاني الكينج، وحافظين أغاني الكينج، وحفلات الكينج !!، أنا اصصراحة كانت صدمتي حضارية !!، إذ لم أكن أتقوقع إن الجدع ده(وهوا شعبي وقلبه أياميها كان مساكن شعبية أصلاً) يروق لهذه الطبقة الفايف ستارز!!، دول كبيرهم تامر حوستي، والجيل اشتكى من شعره !!، بس واضح إن ليس كل ما تعرفه يقال !! ....

قلت وماله، محمد منير ، محمد منير، ماهو ساعات برضو بيقول حاجات حلوة، أكيييد يعني، لاااازم !!! ....

شيئًا فشيئًا بدأ الوعي المنيري يتدرج إليًّ ويغزوني، وكان كفاية قوي أسمع (صوتك) ولا(لما النسيم بيعدي بين شعرك حبيبتي بسمعه ) !!، ولا كارثة اسمها (خااايـف أوعدك مااوفيش!!) ساعتها توقفت عنده طوييييلاً ، وأدركت إنه كان فيه حاجة غلط ف طريقة تعاملي مع أغاني الهيد المنيرية، بس عادي برضووو ، عدت .....

لكن الحقيقة إن شريطه المره دي، وبعدما سمعته أكثر من مرة وف أكثر من مكان (لاسيما عمر بوك ستور: هناك على طوول مشغلين منير، لما بروح بخليهم يشغلوا طعم البيوت، لايكون فايتني حاجة) ...حسيت يعني إنه مش قوي كده، مش مشكلة فيه يونس ف بلاد الله، وفيه مش محتاج أتوب حلوين ، بس مش اللي هوا جامد طحن يعني J

أشوفكووو على خير ....

كان ليا واحد صاحبي (أو قريبي مش فاكر) بيقول لي فيه ألبومات أول ما تنزل ما تأثرش، وبعد كده تفضل على طوووول، وفيه ألبومات تنزل تكسر الدنيا، وبعدين تتنسي بسرعة !!

مما كتب عن طعم البيوت متأخرًا: ف أهرام الجمعة كتب أشرف

وشادي زلط × الدستـور

لتحميل ألبوم شيرين الجديد : بطمنك :) ..اضغط هنا

H.S: امبارح قمت بتجربة في غاية الغرابة، حيث دخلت ع النت وتصفحت مواقع، وانتقلت من مواقع لأخرى عن طريق البحث، وذلك باستخدام الفأرة فقط، وبدون استخدام لوحة المفاتيح أصلاً !!، كان شيئًا ممتعًا حقًا ..

......................................
تم تغيير بنـط الخــط ... بناءً على رغبة القارئين ... ونأسف للإزعاج يا جمــــاعة ( أنا)

هناك 35 تعليقًا:

نهر الحب يقول...

عيب اوي اكون اول تعليق ومسمعتش الشريط

تعرف انا كمان مكنتش بحب منير خالص

حبيته من
انا بعشق البحر

وصوتك.....طبعا

ونفسي اسمع الشريط .....ربنا يسهل اصل انا بوصل متاخر ديما

خمسة فضفضة يقول...

السلام عليكم ورحمكة الله وبركاته

مش عارفه هاتقولوا عليا ايه لما اقولك اني عمر منير ماكان مطربي المفضل
وبجد باستغرب جدا من الناس اللي عندها هوس بيه

هو بالنسبة لي زيه زي اي مطرب تاني اغانيه فيها الهايل وفيها الكويس والنص نص واللي مش اد كده

اما موضوع البنات الهاي كلاس اللي كان عندهم هوس بيه فلانهم بيعتبروا ان ده مكمل ن مكملات الشياكه بالظبط زي العربيه الاخر موديل والموبايل الاحدث حاجه واللبس اللي مش عارف ماركة ايه
لازم كمان يبقوا بيتابعوا منير اللي مش بيعتبر مطرب الغلابه ،لا بيعتبر مطرب الطبقه المثقفه واللي ماينفعش واحد مثقف وبيفهم يبقي مش بيسمع له
يبقي لازم نكمل الشياكه ونسمع منير

ده رايي مش عارفه يمكن يكون صح ويمكن غلط
------------

معلش طلب غلس شكل الخط اللي مكتوبه بيه التدجوينه متعب جدا في القرايه تعب لي عيني جدا
يارت ماتختار نوع تاني يكون اسهل في القرايه شويه


شكرا

هدى يقول...

هو انا عايزة اقول اني ما عرفتش اكمل التدوينة من شكل الخط اللي كاتب بيه

غير الخط يا ابراهيم

Unknown يقول...

مسمعتش ولا هسمع لأني مليش فيه خالص
المهم بالله عليك ينفع كده مشوفكش تاني ع المدونة أبدا ولا نسيتنا يا سيدي أنا شلت صورتي من المدونة يا ترى هتفتكر انا مين ولا ذاكرتك ضعيفة يا عم إبراهيم

The Alien يقول...

طب كملها:
حبيبي عايزله سكر .. منين أجيبله سكر .. باب الحكومة مسكر .. حبسوني وحبسوه

تحياتي

Doaa Ebrahim Aaql يقول...

ازيك ياهيما

انا بصراحه كنت بخاف ااقول انى مش بحب منير
لأنى مرة تجرأت وقلت كده فى الكليه
وكان يوم نقطة سودا فى حياتى
بس بما ان هنا محدش شايفنى
ولو حد حدف حاجة مش هتيجى فيا
ف انا اقدر اقول انه مش بيستهوينى للدرجة يعنى
ولو حصل انى بسمعه بالصدفه
فى مكان ما او مع حد
بيكون على مضض

وسمعت عن الضجة اللى حصلت دى
عن ان الشريط تحفة وجامد وفظيع
ويجنن اخر حاجة

قلت اسمع اشوف يمكن اغير رأيي

لقيته مش بس عادى
دا.........
حتى اغنية طعم البيوت اللى عجبنى كلماتها
لو كان غنّاها حتى هشام عباس وهو بيتنطط كده
كنت هحسها منه اكتر

ودلوقتى بحفظ كلمات الاغنية
عشان هغنيها انا
D:

يلا المهم
ان عينى وجعتنى اووووى من الخط
ياشريييير
ولا بتردّها؟

وميرسى على لينك الالبوم
بطمنك عليا (;

وسلاااااام

غير معرف يقول...

علي فكرة أنا كنت زيك .. مش بحبه ..

ومبتدتش احبه غير مؤخراً جدا .. لما سمعتله اغنية شيء من بعيد بتاعت فيلم النداهه

وبعدين لما النسيم .. وصوتك وأحمر شفايف ..

انا سمعت مقاطع من شريطه الاخير ..

معجبنيش اوي علي فكرة ..

وكنت متخيله طعم البيوت اغنيه هادية طلعت اغنية غريبة الشكل والمنظر ..

أممم

ابراهيم يا ريت تفكر تظبط الخط في مدونتك لاني مش ناويه البس نضاره اوكي

هبة المنصورة يقول...

اسمع ف الشريط الجديد "لو كان لزاماً" وايه كمان.."كان فاضل" و "طعم البيوت"-كلمات مش لحن.. ف القديم بقى "المريله الكحلى" و "يااسكندريه" و "قمر صيفى" و "من أول لمسة" و "الفرصة" و "الفرحة" و "يالاللى" و "بننجرح"..... ده إعتماداً ع الذاكرة اللى بايظه اليومين دول م الحر.. بس هو بصراحة مالوش يمثل + الحفلات بتبوظ الأغانى خالص
مش حلو أبداً لما تتهبل على مطرب أو ممثل واحد.. حاول تشجع اللعبه الحلوه وخلاص

عين ضيقة يقول...

انا لسه ماسمعتوش عشان اقرر بصراحة


لما اسمعه هقولك رأيى

ومستنية راى سعادتك فى القصيدة علشان ماتسألنيش انا فين


سلام بقى

اهو ده عيبه يقول...

ازيك يا براهيم ايوة هى بتتقال كده

بص انا مسمعتش الشريط لغاية دلوقتى بس انا مش مع فكرة ان طالما حد فنان كبير او مشهور يبقى ناخد كل اعماله على انها لا يشوبها نقص او خلل

اكيد مرة هيكون عالى ومرة هيختار غلط وبالنسبة لمنير انا بحبله حاجات وحاجات وهو ليه لون مميز عن غيره ودى ميزة كويسة

عموما المساله اذواق لكن ده ميمنعش ان منير مختلف بكل معنى الكلمة حتى لو باحساسه

ينوبك ثواب يابراهيم تغير خط الاندلس ده ولا ما عارفه ايه لحسن جالى عمى حيسى

تحياتى لك

محمد عادل يقول...

طيب أنا كنت بتكلم عن موضوع انحطاط مستوى الابتذال ، بتاع أ/ رضوى وقلت ان المسألة مسألة أذواق بشكل عام ، وان رب قبح عند زيد هو حسن عند عمرو ، أنا شخصيا بحب المدعو " منير" - أحيانا يعني - وبحب شعبان عبد الرحيم كمان ، في نفس الوقت مش بلوم أي حد مبيحبوش ، وأكيد مش باعبرها جريمة.تمام زي الأكل واحد بيحب البطاطس والتاني بيحب الكوسة ، فلا ينكر هذا على ذاك
* * *
بالنسبة لموضوع الشريط ، فالظروف اللي طلع فيها وجالة الترقب اللي كانت قبله وكمية الدعاية ، خلت الشريط مينفعش ما ينجحش ، حتى لو كان فيه كلام جرايد ، أنا لسه ماسمعتش الشريط ، وأكيد مش هاشتريه طبعا لأني مش غاوي ، الحل الوحيد ان ربنا يرزقني بسواق ميكروباص يكون سميع ، يشغلوهلي ساعتها ممكن أقول رأيي
* * *
اممممممممممم
نشوفك علي خير

إبـراهيم ... يقول...

أولاً: أشكركم جمييييعًا ...حقيقي سعادة غامرة، لما الواحد يرجع المدونة يلاقي 11تعليق، كل واحد أحلى من التاني، لأ و الأحلى إني ما اتحدفتش بالطوب، وده المفاجأة الجميلة بالنسبالي فعلاً :)

عمومًا أنا منتظـر ناس تـانية هتحدفني بالطوب ،،، بس قلت أشكر أصحاب أول 11 تعليق دول عشان دول هيبقوا الـ 11 الصفوة :) ......

وإليكم التعليقات بالتفصيل

إبـراهيم ... يقول...

نهر الحب: ماتسمعيهوش، مش فارقة كثير

سعيد بوصولـك مبكرًا ... و ..منورة

*************

فضفضـة : ربما أتفق مع رؤيتك هذه كثيرً، لأنه بصراحة بيبقى فعلاً مش لايق عليهم، لكن كمالة البرستيج ....
تم تغيير الفنط يا فندم، بناءً على رغبة الجماهير كللها ....

نورتي، وكويس(على فكرة) إنه مش مطربك المفضل

إبـراهيم ... يقول...

هدى: فيه حلول كثييير للقراءة .. للراغبين يعني، وعمومًا غيرنا الخط يا ستي :) بطلوا بقى الحجج دي

*****************
سـي براهين أيها الكاتب، تخيل يا أخي إنك لسه جاي على بالي، وعاوز أعدي عليك، بس يبدو إنك أسبق، بس تعاااالى هنا، يعني إيه ملكش فيه ؟.؟؟؟ ، طب قول الأغاني حرام !!!، إعمل أي منـظر :) .......

نورت
****************
بشوي:
أنا عارف إنك منيري من الدرجة الأولى، بس صدقني ما قصدي تريقة، قد ماأنا قاصد أرصد موقف، وحالة وذكريات وكده
وبعدين أنا بحب اللعبة الحلوة (عشان هبة الحتة دي) وإنتا عارف إن منييير كثير بيلعب حلو

نورت برضوووو

غير معرف يقول...

المهم انى قريت البوست دى وانا بنزل الشريط ..
من ساعة ماخدت الاجازة وانا عمالة احايل في النت عشان يشتغل عدل واقدر انزل الشريط
يمكن منير هو مطربي المفضل دلوقتى الا انى مش متعصبة خالص ليه ،الحقيقة أن كاظم كان هو أول حب ف حياتى :)
وفاكره انى لما حبيت منير حبيته برضو لما سمعت خايف وربك لمايريد وهون ياليل وبقيت شريط في عشق البنات كنت في 6إبتدائي ساعتها ،وبعد كده كنت بسمعه لكن مش من الفانز يعنى
بس لما بدأت اسمع باقي اغانيه حبيته اوى يمكن عشان بعد كاظم حنيت اسمع صوت مصري أصيل وصادق ..صحيح أنا مش بحب أتأثر بغيري في أراءهم ومحبش اسمع مغنى لمجرد ان هو الكينج وان في فئة معينة بتسمعله بس يمكن ده خلانى اخد بالى من منير
لحد دلوقتى ماسمعتش غير طعم البيوت هى يعنى مش فظيعة اويمكن اللحن مش حلو بس كلماتها عجبتنى
عموما انا هقفل واسمعه حالا لأنه اتحمل اخيرا
وربنا يستر
نضال

جسر الى الحياة يقول...

يا هيما مش شرط تحب كل اغانى منير جميل ان اغنية مثلا من اغانيه تمسك وتحب تسمعها من وقت للتانى انا اكده اه ممكن احب مطرب واحب صوته لكن مش شرط اعجب بكل اغنياته لاننا بنستقبل اللى بيشبه حالتنا من الاغانى لو زعلانين بنحب الاغانى لونها غامق ولو فرحانين بنحبها مزأططة ومبهجة ده عادى
تحياااااااتى

ريحانة يقول...

كان نفسى اعلق ع البوست ومودى يسمح اقول
اقول كتير قوى

عارف؟
منير ده ا/نا/حنا/نتم/كلنا

بيقولوا ايه
طمى الارض
خيرها
اللى لسة متخلطش



امممممممممم
طيب

كان فاضل بس يادوب ان البس توب الدنيا واتوب عنك

يمكن الهنا متدارى فى صبرى عليه


مش عايز بكرة يفوت وانا لسة بموت والليل عمال يجرح



معاكى
بضحك بصوت عالى ومش خايف وانا عارف قلبك من الحزن مش خالى


امممممممم
الشريط كله
اقول تانى

المشكلة انه بيقول احاسيس جديدة صعب حد يفهما غير اللى عاشها
ساعتها بيبقى عايز يصرخ ويقوله
صح عرفت منين


كان نفسى احدف بالطوب
بس مش قادرة اشيل دراعى من مكانه اصلا



طعم البيوت
اروع شريط لمنير
اروع اللى عمله على الاطلاق
وان كنت انا منيرية خالصة لو حاجيبلك لمنير مش حاخلص


اعتقدده اطول تعليق كتبته فى اى بلوج


اطردنى من هنا


:)

قلب يحترق يقول...

الفرصة بنت جميلة
راكبة عجلة ببدال
شعرها بيطير قدامها
بيداري علينا جمالها
والعاقل لو يلحقها
يتبدل بيه الحال

ادي لنفسك تسمع كلمات اغاني منير القديمة و الجديدة كمان يعني

طبعا الفرصة دي رائعه من روائع الكينج منير غير كتير زي حاضر ومن اول لمسة
و عنقود العنب و القدس و وشئ من بعيد
و الفرحة و ايديا في جيوبيو خايف و عصفور و بحر الحياة و ممكن و حواديت
و و و و و و

وطبعا دول علي سبيل المثال لا الحصر

وكلامي عن منير مش علشان هو بلديات مثلا

انا غالبا بميل لكل ما هو شامي

فيروز......... كاميليا جبران ...... لينا شماميان ...... مرسيل خليفة

بس بجد منير رائع و شريطه الاخير كلمات الاغنيات قمة في الروعة

ومشكلة اغنية طعم البيوت لحنها لأنه معجبنيش لما سمعتها

بس الشريط رائع

وبعدين العملية اذواق

يعني في ناس شايفاه مش قوي و ناس شايفاه هو الكينج

واختلاف الرأي لا يفسد للود قضية

يعني مفيش طوب

zahra يقول...

فى الأول استغربت منير جدا
حركاته و اسلوبه و كلماته الغريبه
لكن حبيته قوى لما كبرت و قدرت افهم كلماته
ركز معاه هتلاقيه بيقول كلام مينفعش حد يقوله إلا منير
بيغنيه بإحساس مش هيطلع إلا من منير
ساعات كتير بيتهيألى انه بيكتب اغانيه بنفسه لإنها كلها طابع منير
اكيد التفرد شىء يحسب ليه

Unknown يقول...

حكايتي مع منير..
ناا كمان ليا حكاية معاه .. و صدقني انا زعلت اوي اوي .. اني ماكنتش متابعاه من الاول .. زي عمرو دياب مثلا لأني متابعة عمرو ديبا من ايام ماكنت طفلة .. و حسيت ان فاتني كتير اوي عشان ماتابعتش منير من أوله .. او عشان ماكبرتش عليه و حسيت بكل غنوة ليه في وقتها ..
زمان .. ايام ثانوي و ماقبلها ، كنت باحس ان منير دة بيقول أي كلام .. و اني مش ممكن اضيع وقتي اسمع الكلام دة بالذات ..مع اني كنت بضيع وقتي مع ناس عجيبة و بيقولوا كلام اعجب .. اي و الله !!
بعين جت اغنية واحدة .. الاغنية دي غيرت نظرتي لمنير .. أغنية برة الشبابيك ..
برة الشبابيك كانت عبارة عن مجموعة من الاحاسيس اللي اتحدى انها مستحيل تكون ماوصلتش لأي حد سمعها حتى بشكل عابر ..
من ساعتها .. و منير مزاج خاص ..
أي حاجة بيقولها بتعجبني و بحبها ..
بحبها فعلاً ..
و كل البوماته .. كل غنوة فيهم ليها طعم و مفيش واحدة منهم شبه التانية ..
أحييك يا إبراهيم على المقال الجميل دة ..
فعلاً .. منير جميل.. جميل بجد .

basma saghir يقول...

بص ياسيدي كون انك كنت مستغرب حركاته وانت صغير ده ميمنعش انه انسان ذكي جدا من ناحية اختياره لاغانية..صحيح احيانا ذكائه بيخونه زيه زي اي حد..بس في الغالب هو ذكي جدا وبيعرف يوصل للناس ازاي...روح حضرتك في مرة كدة حفلة ليه في الاوبرا وانت تعرف انا قصدي ايه...وبعدين ياسيدي تغاضى شوية عن الحركات اللي مش عاجباك دي وركز في الكلمة ولا في اللحن

في حاجة كمان..اغنية نعناع الجنينة دي فعلا فلكلور نوبي واللي غناه منير جزء بسيط جدا من الاغنية الاصلية لان الاغنية الاصلية فيها اكتر من 100 كوبيله وهو في كل حفلة من حفلاته بيغني كوبيله مختلف

عايزة اقولك ايه تاني.....اه..ركز شوية وانت بتسمع وبلاش تسرح ولو ركزت ولسة الالبوم معجبكش ابقى متسمعوش تاني..وخليك مع شيرين...على فكرة صوتها هايل :)

إبـراهيم ... يقول...

برنسيسـااادودووو:
ف الأول نورتي بالقوي، وآخر ما كنت أتخيل أن يصل الأمـر لهذا الحد، عمومًا أنا هبقى أبلغهم :):) ..........

اللي بيحبوا منير، بيشوفوا الشريط تحفة وجروعة وكده، أنا منكرش إن فيه كذا أغنية حلوة، بس ف العادي برضو، ممممممم، ومشكلته أنا أغاني الرئيسية مش بتبقى حلوة !! ....
على كلٍ .. اسمع اللي يعجبك، والبس اللي يعجبك برضووو .....
والباب اللي يجي لك منه الريح، واربه ،،، يجيب طـرواة :)

إبـراهيم ... يقول...

جوماني:
نورتي مبدئيًا، أنا كمان زي ما قلت عجبني حاجات مختلفة ليه ..، وغيرنا الخط يا فندم ، وده مايمنعش إنك تلبسي نضـارة برضووو ، احتمال تبقي أحلى :)

*******************

إززززززززيـــك يا منصورية، ع فكـرة أنجا سمعت الشريط كله، وعجبني منه حاجات، وأنا فعلاً بحب اللعبة الحلوة، ودايمًا بقول للناس كده، أي أغنية كلماتها حلوة بتبقى حلوة حتى لو غناها الخنشري ، و الحمد لله الخنشري بطل يغني من زماااان .........
فكرتيني بموضوع تاني كنت عاوز أكتبه عن مغني مفضل، وفكرة المطرب الوحيد ...

يمكن أبقى أكتبها بعدين

شووو أخبارك إنتي ؟؟؟
*****************
عين ضيقة: في انتظـار رأيك، وقريت القصيدة مرتين ثلاثـة ....

منورة

***************
داليا:
برافو عليكي ، هوا الخط الأندلسي، أنا قلت أغير لكووو شوية، بس واضح إنكو ضد التغيير .......

فعلاً منير محظوظ لأن ليه اختيارات حلوة قووي ، ومميـزة، على الرغم من إن اللي بيكتبول هبيكتبوا لمصر كلها، بس أهي أرزاق .....
منووورة ياااا أهو ده عيبه

محاولة لكسر الصمت يقول...

بصراحة عمري ما حبيت منير.....مع اني كان عندي ابن عمي بيحبه جدا...وكنت بسأل ليه يعني؟...ايه المميز فيه للدرجة دي؟...بس بصراحة لما سمعت صوتك ولما النسيم حسيت ان الراجل ده بجد مميز......صوتك دي اغنية بجد راااااائعة...وحبيتها اوي..جينا السنة دي لطعم البيوت...ماسمعتهوش كله بس حبيت اغنية من غير كسوف....يعني ممكن نقول اني اخيرا عرفت هما ليه بحبوا منير.........
أول زيارة.........تقبل مروري

باسم المليجي يقول...

في رأيي إن منير ليه سمتين ما نقدرش نختلف فيهم
الأولى أنه حد له اسلوبه الخاص
التانية إنه حد بيحب شغله فاهمه وبيتعب فيه
متهيألي إن واحد نجاحه مستمر للفترة ديه-مش عارف من أد إيه، لكن بالتأكيد من كتير- مجاش من فراغ
كتير من الناس بعد فورة نجاحها الأولى بتكرر نفسها لحد ما الناس تمل منها.. اعتقد ان منير غير من نفسه وفي نفس الوقت-وده الغريب-حافظ على اسلوبه الخاص
كلام غريب.. الفكرة أنه في فترة ابتدى يغني أغاني لناس تانية.. أنا بعشق البحر،حكايتي مع الزمان.. وحتى حاجات من التراث غير النوبي زي يالالالي من تراث القناة-الفترة دي أنا شخصيا محبيتهاش
المهم بعد كده دخل في منعطف-حلوة منعطف دي-جديد بمدد يا رسول الله بلحن من التراث الصوفي، ولحد دلوقت مسبش النوع ده
وفي نفس الوقت مسبش أغانيه الجديدة
الفكرة اللي عاوز أقولها هنا.. إنه في كل الأنواع دي كان هو منير. مفقدش شخصيته أو خصوصيته
الأجمل إنه بتنقله ده عمل التجديد اللازم عشان الناس متزهقش منه
فاكر كاظم الساهر كان عامل ازاي أول ما طلع؟ بالتأكيد فاكر
طب إيه اللي حصل له؟
جمد نفسه عند القصائد بالتحديد قصائد الحب بالتحديد القصائد النزارية وبقى ده الشائع عنه حتى لو عمل حاجة جديدة الناس خلاص-لا مؤخذة-كرفت عليه
حساسية التجديد والحفاظ على الشخصية هي اللي بتحافظ على استمرار نجاح الفنان
الشيء التاني اللي بيموت معظم الناس-والغريب ان منهم بيكون شباب كتير-هو فقدان الاهتمام بالشغل وتجويده. بعد فترة النجاح الأولى مبيبقاش في حرص على حسن اختيار الخامة وفريق العمل

عارف اني طولت عليك
بس عاوز منك حاجة مهمة.. قصيدة الأبنودي اللي نزلت في الدستور..ياريت تبقى تنزلها
أهو الراجل ده برضك من العلامات الجميلة اللي ياريت يكون عندنا منها تاني

بحلم يقول...
أزال المؤلف هذا التعليق.
بحلم يقول...

الغريبة اني وانا بسمع الالبوم دوة جه ف بالي نفس جملة صاحبك:فيه ألبوم بينزل مش قد كدة ومع الوقت بتكتشفه، وفيه ألبوم بينزل يكسر الدنيا وبعدين متفتكرش منه حاجة
بجد بحس ان منير بيعيش
يعني انهاردة مش عاجبني من طعم البيوت غير "يونس" و"مش محتاج أتوب" و"من غير كسوف"..لكن عارفة ان فيه وقت تاني حكتشف فيه بقية الاغاني
مش عاوزة اقول منير حالة ومحتاج عشان تسمعه تعيش حالة معينة..يعني حيبقي كلام مقتول
لكن بقول اني اتعودت أسمع شريطه مرة واحدة، وأحبه علي فترات
انما الحاصل، ان الراجل اللي بقاله أكتر من عشرين سنة بيغني دة..لسة ملك
ولسة انسان
واللي مش عاجبه....
يسمعه:/
بالنسبة للبنات الكلاسي اللي انت مستغرب من حبهم لمنير، فأنا مستغربة بقي من نظرتك دي انت بالذات
مش قاعدة علمية ان كل حد مرفه يكون تافه وسطحي
بطلوا حقد بقي

إبـراهيم ... يقول...

محمد باشا عادل: أيها المغمور المطمور، فييينـك يا ابني ؟؟؟؟، هل أخذتك الدنيا جمنَّا إلى هذا الحد، أنا أيضًا أحب منير أحيانًا،،،،،، وعلى فكرة مش من نادي كارهي منير، ،،، وفي انتظـار سماعك للألبون وتقييمك الشخصي ..............

*********
نضال: هااا ، إيه الأخبار دلوقتي ؟؟، أعتقد إنك هتتفقي مع الجميع إن " يونس" حلوة، وكان فاضل، وتحت اليسمينـا ...
حلوة برضو ذكرياتك عن كاظم ومنير ...
نورتي ، وخلينـــا نشوووفـك
***********
جسر الحياة:
أنا معاكي ف ده جدًا، عندك حق طبعًا ... وشكرًا على مرورك وتعليقك

إبـراهيم ... يقول...

ريحـانة: إنتي عارفة طبعًا إنك جأحد أهم وأخطر أسباب كتابتي للتدوينة دي، وعلى فكرة أنا حبيت بعض الأغاني دي فعلاً ،
( مش عايز بكرة يفوت وأنا لسه بموت،، والليل عمال يجرح )...
بس أنا لسـه عند رأيي .. إنه ( مـش قوي يعني ) :):)
وجهـات نظر
نورتي يا جميــــل، وأشكرك على تعليقك المطول ، ومااجدرش أطردك ...
***********

و أخيرًا وقعنا ف نادي محبي محمد منير ....
الست هوباا اتعود بعد غياب 100 سنة

أخييييرًا يا هبة، يعني كنت لاااازم أكتب عن منير عشان ألاقي تعليقك ؟؟؟

نورتيني فعلاً ، وأنا معاكي طبعًا إن جمنير كده وكل حـاجة ، وليه أغاني (تعجب الباشا) زي ما بيجولوا .....
و جمادام المسألة وجهات نظر يبججى مفيش طوووب

نورتي قووووي خاالـص يعني

و ........
بــــس

************
زهرة الياسمين : فعلاً أوقات كثير بحس إن أغانيه واختياراته منيرية بحتة، وأكيد ده يحسب له ، بس ما قلتليش بالنسبة لطعم البيوت ، دقتيه ؟؟، ولا إيه :)

منورة يا زهـــرة

تحياتي

Rosa يقول...

رحله ممتعه لقصتك مع منير
:D
هو مختلف بكل ماتحمله الكلمهمن معنى صعبتسمع صوته واغانيه وماتميزهاش بعكس كتير من الموجودين حواليه
فيستحق
----
مبسوطه للجوله النتاويه الاستخدمت فيها احد مدخلات الكمبيوترالحديث :D
:)

Rosa يقول...

اه و مرسيعلىالبوم شيرين الجديد

عًٍمًرٌٍوٍ آلنْوٍبٌَِى يقول...

السلام عليكم ورحمة الله
طبعا وبدون تردد من اسمى كده لازم تعرف ان انا من عشاق محمد منير لاء مش بعشقو وبس ده انا مش بسمع مطرب غيرو ولا هفكر اسمع غير منير ده حدوتة مصرية
منير حكاية مضاى وحاضر ومستقبل بيحكى ويتحاكى بالبلد دى
اقولك الفرق بين منير وغيرو من المطربين اية .. منير فنان شامل بيغنى لكل حاجه فى الدنيا غنى لفلسطين سنة 82 اغنية افتحو يا حمام كراريس الرسم .. غنا للعمال فى اغنية شتا .. غنا للحب .. وللناس .. غنى عن السياسة والفساد .. غنى للحرب .. عمل من مصر حدوتة وسماها حدوتة مصرية .. غنى بالنوبى وبالصعيدى وبالفلاحى .. وغنى بالتونسى والجزائرى .. يعنى من الاخر هو مدرسة فى الغنى .. لو احنا بنفتخر بأم كلثوم وعبد الحليم .. فلازم نفتخر بمحمد منير الفنان الى لغاية دلوقتى مرداش يركب موجه اغانى الحب والروشنة زى غيروو وغيرو برضو فنانين كبار بس كبرهم فى اغانى الحب وبس زى ما تقول مفيش غير الحب نغنيلو ..
منير وبأختصار شديد جدا جدا جدا هو كينج الاغنية العربية هو ملحمة انسانية قدر يعبر عن شعبو بشوية اغانى يمكن الاغلب بيتريق عليها زى التريقة الى شايفها على اغنية سو يا سو اتمنى انك تفهم معنى الاغنية وانت هتعرف انو مش كلام قابل للتريقة

تحياتى ليك

واسمحلى اكتبلك جملة قالهالنا منير فى حفلتو الاخيرة فى الاوبرا .. لما كانو مطلعين علية انو مغنى البسطاء ..

قال منير ..
يعني إية بسيط ؟ البسيط هو إللي مخة بسيط بس أنا عمري ما كان جمهوري بسطاء المسألة مش رقم المسألة إنك تكون راقي ومش بسيط بعقلك مواطن وبتحب بلدك مش ببساطة لأ بعمق ..

هو ده منير الكينج

إبـراهيم ... يقول...

شيماء قهوة:
محتاج أشكرك قوووي جعلى الأقل لإنك أدركتِ إني مش من نادي كارهي منير، ولا حاجة، وإني فعلاً بحب له أي أغنية حلوة .....
. . . . .
مش عارف ليه الناس فاكرينني كارهه، ومش بطيقه :) ، نورتي يا شيمـاء

**************

بيســـووو : النوبية الجميلةممممممممممممم ، تعرفي كفاية عليا ف التدوينة دي انها استفتزتكو للكتابة بالشكل ده، أنجا شكلي هنزل تدوينة كل شوية عن منير عشان تعلقوا عندي :) :) ....... نورتيني
و الشريط بيطاردني فعلاً ، حتى ف اسكندرية!!!، مش معقول يعني !!
و فعلاً فيه حاجات حلوة، وأنا ركزت معاه من زمان
نورتي
***************
دواير: نورت أول زيـارة، وأنا زيك كده، زي ما انتا ملاحظ ، وهوا حلو ف حاجات كثير

تحياتي

Soooo يقول...

على فكره يا باراهيم

منير في اغنية سوو يا سوو مش عايز يدي سكر لحبيبته

ادخل على الموضوع ده وانت هتفهم كوثر مصطفى قصدها ايه
http://soooo-30.blogspot.com/2008/01/blog-post_20.html

وقيس على كده كل اغاني منير
اغاني منير مش معناها ظاهر
اقولك حاجه .. اسمع اغنية امبارح كان عمري عشرين .. وقوللي ايه اللي انت فهمته منها


سلامووووووووووز

sara rabie يقول...

مممممممممم طيب ليه يا ابراهيم يا ابنى تعمل فى نفسك كده :)))

الدنيا "اببيس " من كده

بتفتح على نفسك فتحه ههههههههه

انا منايرية لحد النخاع وبكل الدق والخبط الى فى القلب..احب منير جداااا وكبرت معاه ومع اغانيه
وكل اغنيه شايله معاه حته منى..ذكرى فى يوم..صور ..تشابيك احاسيس

وبالنسبه لى انا بدات اسمعه من وانا فى ابتدائى والفضل يرجع لاخويا الكبير هو الى عرفنى على الكنز ده
ومن يومها "الكنز مش بيخلص"
و يوم عن يوم يززززيد و يزززيد

مش هكتبلك كلام اتعاد ناس حلوين كده قالوا كل الى عايزه اقوله..
بس الى لفت نظرى ان الناس بدات تسمع منير من صوتك و لما النسيم
جربوا يا جماعه وادوا نفسكم فرصه ترجعوا للقديم حبه
برئ
شيكولاته
بنتولد
وسط الدايره
كده يعنى ..الالبومات القديمه

"حدوته" هتلمس قلبوكم وتعجبكم


منير..نبض عالى فى قلب "النيل"

وبعيدا عن اختياراته الفظيعه وانتقاءه للكلمه واللحن..واحساسه وصوت الى مالوش مثيل
وتفرده انه حاجه واحده مش هيجى زيها

الا انه بيعجبنى فيه..تجديد الاغانى القديمه
زى انا بعشق البحر..شئ من بعيد ندانى
وما الى ذلك
على الاقل ادى فكره لشباب وناس كتير مش بتسمع قديم انها تسمع وتفهم وتحس شويه بحاجات متعرفهاش



انه "يونس" الى جاى من "بعد الطوفان" فاتح "شبابيك" كتيررررر على قلوبنا



سورى يا عم انا رغيت:))


مساءك جنة يا فندم

Ratings by outbrain