أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

السبت، 9 أغسطس، 2008

جـــريـدة إبراهيم ... لكل إبراهيم



أخييييرًا، وبعد طول انتظــــار ، يطل عليكم الحدث الثقافي والأدبي الأهم في مصر والشرق الأوسط ....

ولأن الأحلام تتحقق، و لأن الخير في البلد كثيييييييييير، ولأن لسه الأحلام كثيييييرة بس انتو تحلموا ، ولأن القراءة للجميع، والكتابة للجميع، ومصر لينـــا كلنـــــــــــا فقد تقرر ... وأخييييــــرًا إصدار الجريدة الأولى التي تحمل على عاتقها هم الشباب العربي من المحيط إلى الخليج، التي ............

جريدة لم نفكر كثيرًا فيم سيكون اسمها، الاسم الذي فرض نفسه علي منذ البداية، الاسم المفروض علي أصلاً ، منذ أول يوم لي في الحياة، لن أسميها بأسماء غير حقيقية، غير منطقية، غير واقعية، بديل ومصري ودستور وطريق وحقيقة وكذب وجمهورية وغد ووفد وأحرار وعبيد، وشباب وكلمتنا واحنا وهما وأنا وإنتا !!، لالالالالالا، ولا اسم من هذه الاسماء البراقة الخلابة، اسم حقيقي أكثر، وقريب من الواقع ، واسمي في الأول وفي الآخر....

الجريدة الوحيدة التي ستصدر (بالمفتشـر كده) لتعبر عن صاحبها، وعن لجنة تحريرها، ونشـرها ....

نعم إخواني القراء الأعزاء، أخواتي القارئات العزيزات .... جريـــدة (إبراهيم) .....

و " إبراهيم" بـــــــــــــس ، هكـذا ، مطلقة بلا تقييد، لا عيسى فيها ولا نافع ولا سعده ولا حجازي، ولا غيرهم

الجريدة الوحيـدة التي ليس لها مجلــس إدارة، ولا أعضاء تحرير ونشر، ولا عدد محدد من الأوراق ....، ولا تمويل، ولا إعلانات، ولا رأس مال ، ولا بلاوي سودااااء !!

جريـــــــدة "إبراهيم" ... أو إبراهيم " على طول " من غير جــريدة .....

الجريدة الأولى والوحيدة التي تتحدث عن " إبراهيم "، وتتناول " إبراهيم"، وتتفقد أحوال " إبراهيم" ، وتنتقد" إبراهيم" ، وتتابع " إبراهيم" ، وترصد " إبراهيم" ، وتحيطكم علمًا بكل كل كل ما يفعل "إبراهيم" ما يعرفه ولا يعرفه رجل الشارع المصري عن إبراهيم، ويكون" إبراهيم " الرأي والرأي والرأي الآخر ، والثالث ، والثاني ، والذي بينهما، و إبراهيم "ع الأصل دوّر" ، و" إبراهيم" بيحترمك فاحترمه لو سمحت، و " إبراهيم " همك هو همنا ، وبلاويك بلاوينا ، و إبراهيم مصدر السلطات ، وإبراهيم فوق الحق والقوة والحرية ، إبراهيم ... اقرا وإنتا مطمن ، إبراهيم الصحافة اللي بجد، إبراهيم .... واللي ما يشتري يتعلق !! إبراهيم .. صحافة بدون خطوط "أصلاً" .....

طيب تسألوني وتقولوا يعني إيه ؟؟؟؟؟

معقولة جريدة واحدة ، هتبقى بتتكلم عن شخص واحد ؟؟؟

هقول لكم ، ويعني إنتو عاجبكم حال الجرايد اللي بتتكلم عن 100 شخص ف نفس واحد ؟؟؟ ، فين التخصص، فين التفرد ؟؟ ، فين التميز ؟؟؟

هوا " إبراهيم" ده ، مش واحد من الشعب المصري، وحركته داخل ألإراد الشعب مش انعكاس للموقف من الحياة والتاريخ، ركوبه الميكروباص مش دليل على تكاتفه مع أبناء الشعب الكادح، عدم انصياعه للعدد المهول من التكاسي مش موقف من سيطرة رأس المال ؟؟؟، عدم تصييفه هوا والأسرة الكريمة هذا العام ، مش دليل على التدهور الفظيع الذي لحق بالأسر المصرية في العشرين سنة الأخيرة، رأيه في التوريث مش عاكس لرأي فئة مغمورة من المجتمع ، عدم مشاركته في النوادي الرياضية مش يعكس موقفه من اللياقة البدنية !! ،،،،،،،

الناس فاكرين الموضوع بسييييط ، رغم إنه في غاية الخطورة والتأثير والفعالية

يعني إيه صفحة سياسية مثلاً في "جــريدة إبراهيم " ( وخلينا نسميها "إبراهيم" على طوووول )

يعني شاف أخبار إيه انهاردة، إيه الخبر اللي عجبه ، وهوا بيقلب، ولا معندوش وقت يعرف أخبار العالم، واتفلق من اللي بيجرى واللي بيحصل !!! يا ترى عارف المشاكل التي تدور داخل أروقة الأحزاب المعارضة، ولا مكتفي بأخبار الحزب الحاكم ؟؟؟ ، يا ترى عاجبة تصرفات أعضاء مجلس الشعب ؟؟ ، يا ترى ( وده المهم) شارك بنفسه وبصوته ولسانه وبقه في انتخابات، ولا كان مشغول يوميها بالسودوكو ؟؟؟؟ كل ده عاكس للموقف السياسي، وممكن يملا الصفحة السياسية .....

بس و اللي خلق الخلق هيا صفحة واااحدة يا ولاد الـ ( تييييييييييييييييييييييييييت) ...... ، مش أكثر، ولا أقل ، ولا فيها أي صورة لزعماء عرب، بس رأي إبراهيم (لو كان فيه ) ( ولو كان فاضي يتفرج على أخبار، أو لو حصل بينه وبين حد مشادة سياسية عابرة ) .....

في الصفحة الاجـتماعية تغطية واسعة لأهم الأحداث الاجتـماعية التي عاصرها، أو شارك فيها (إبراهيم) جواز بقى ، طلاق ، خطوبة، مشـادة كلامية، اثنين لمون ...فض اشتباك ، توطيـد علاقات ، معاهدات صلح .... إلخ إلخ إلخ ......

وأكيد سيكون لهذه الأمور ومتابعتها دافع وحافز لباقي المواطنين، فمنهم من يتأسى، ومنهم من يقتدي ، و منهم ...........

وهناك اهتمام خااااااااااص جـــدُا طبعًا لإبراهيم بالصفحات الأدبية والثقافية وااااااااااااااااو

أخيرًا تصدر إلى العالم العربي، والشرق الأوسط، صحيفة أو جـريدة أسبوعية واحدة تضم أهم الأحداث الثقافية والأدبية في القاهـرة الكبرى، ملحقة بتغطيلات غير مسبوقة، وتسيل بالحرف والكلمة لكل ما يدور بين الأروقة الشبابية الأدبية بشكل خاااااص ، انهاردة إبراهيم في جـلسة ثقافية بالأوبرا ، وبعديها بيومين في مركز طلعت حرب، وبعديها ف قصـر الأمير طــاز، والأحداث تتلاحق، والمتابعات تترى ( يعني اية ورا بعضها) امبارح إبراهيم ف حفل توقيع ف البلد، وبكـرة ف عمر ستور ، ويوم الأربع ف لقاء أدباء الصاوي، ويوم الخميس مغمورًا مع المغاميـر ....

إمبارح إبراهيم كان بيقرا رواية لعزت القمحاوي، وبعديها قلب على قمر على سمرقند، ومرة واحد نفسه هفته على أحلام مستغانمي ، وهكذا دواليك

من يومين ابراهيم ومعدي جنب واحد من صحابه لفت انتباهه خبر في أخبار الأدب، واللي بعديه كان في البديل، دي هنضمها لصفحة خاصة اسمها " صحف بين يدي إبراهيم" ، ويبقى يا هناه، ويا سعده اللي يعير إبراهيم كتابًا أو مجلة أو جـريدة ..............

وكل ده إبراهيم وسط أصحابه وأصدقاؤه ومعارفينه


ذلك أن جــريدة إبراهيم أيضًا من الشباب وإلى الشباب ، و وهكذا

.....................

بالمناسبة نفتح باب المشاركات لكل من يريد أن يساهم في وضع (بانر) إعلاني لجـريدة إبراهيم ، ولمن يود أن يشارك في تحرير وصياغة وكتابة (إبراهيم) من جــديد

لا يوجـــد حـدود، ولا قيود ، ولا سيطرة لأحد على أحد، في إبراهيم ، اكتب فقط ، وأنت الحكم، ونحن القارؤون ................

أخيييييرًا جـــريدة واحدة تحقق كل الطموحـــات

بالمناسبة، مفتوحة باب التوقعات للأبواب الآتية :

الأبواب الفنية : سينما ومسـرح وتلفزيون ، إيه الفيلم اللي عجـب إبراهيم، وليه و، وإمتى وإزاي ؟؟؟ ، يا ترى إيه المسلسل الخنيييييييييق اللي لما بييجي إبراهيم بيفكر يولع ف التلفزيون ؟!! ، إبراهيم بيهتم بإيه ف الأغاني بتاعة اليومين دول، وإيه أكثر برنامج ممكن يسيب المدونة عشان يتابعه !!

الأبواب الرياضية: نوادي وماتشات ومصارعة حـرة ، إبراهيم كمـا يعلم الجميع أهلاوي، لأنه بني آدم، وإنسان، رغم إنه أصلاً ملوش ف الكورة، ما هي مشاركات إبراهيم الرياضية لهذا الأسبوع ؟؟

الأبواب التسلية والمرح : ألعاب بقى وسلم وتعبان وبنك الحظ، وخلافه ....


بعد صدور العدد الأول من (إبراهيم ) ، الناس هتمشي ف الشارع تكلم بعضها كده :

قريت " إبراهيم:" امبارح ؟؟؟ ، جبت "إبراهيم" انهاردة، لو سمحت " اثنين " إبراهيم ( دي لبتوع الجرايد) ، ابراهيم امبارح كان تحفة ، شفت المقال اللي ف إبراهيم ، لأ تخيل فاتني إبراهيم الجمعة دي !!!

قرارات إبراهيم بعد نفاد الطبعة الأولى كل يوم الضهر من الجريدة :

أعداد مجانية لكل واحد اسمه إبراهيم ف البلد ( تسليم إبراهيم لإبراهيم بالبطاقة ...)

وبعد ذلك بشـهـــر اللي اسم أبوه " إبراهيم "

وبعديها بسنة اللي أخوه اسمه إبراهيم ( هيتنشر الاسم ده في العائلات المصرية، وربما يغلب محمد، وأحمد !!!) ..............

يوم بعد يوم ، تغطي (إبراهيم) على كل الصحف الحزبية، والرسمية ، والعارضة ، ويفكر " مصطفى" جــديًا إنه ينزل جـريــدة جـديدة ، تتحدى إبراهيم، ويمسها بنفس الاسم !!!

هناك 28 تعليقًا:

فاتيما يقول...

مش عارفة ليه و إنا عمالة أقرى إفتكرت أفلام عبدالحميد الترزى
بتاعة ثلاثى أضواء المسرح
فكرة ألمعية بجد
بس المدونة بتاعتك سبقتك
و خدتها خلاص
و أنا و أنا
بقالها مصداقية لدى القراء
و جريدة إبراهيم مش هتضيف جديد يعنى
تحياتى ليك

ست الحسن يقول...

ولمن يود أن يشارك في تحرير وصياغة وكتابة (إبراهيم) من جــديد


أخيراً رجعت تكتب حاجات فيها إحساس شديد وتوَرُط في الحالة

الجملة اللي اقتبستها دي مستني أوي وحسيت انها بجد وفيها صدق
والغرور الشديد والواضح زيادة عن اللزوم مش عارفة ليه محسسني انك شخص وحيييد جداً

وبدل ما اقول مين ابراهيم ده اللي مش شايف في الدنيا حد غيرة
بقول
مين ابراهيم ؟؟

Rana Omar يقول...

منجيلكش في حاجة وحشة إن شاء الله

D:

alexandmellia يقول...

ايه ده كله
هبقي اقولك علي حاجة لما اشوفك

princess dodo يقول...

إزيك يا هيمو

فكرة حلوة ، بس لو تكرمت وشفت لي عامود كده فى الجريدة اكتب فيه بعد مااتخرج يعنى
يبقى كويس اوى

وبعدين انا من حقى الاعداد
المجانيه اول شهر عشان اسم بابا ابراهيم
D:
و شكلى هطمع فى اشتراك سنوى مجاني بردو ;)

سلاااام

إبـراهيم ... معـايــا يقول...

الأستاذة فاتيما:
نورتيني بحـق وحقيق ....مش عارف مييين عبد الحميد اللي سعادتك بتتكلمي عنه ده، بـــــس ع فكـرة المدونة لم تقم بشيء من ذلك، المدونة حيالله بيتكتب فيها اللي بلحق أكتبه عن جـانب واحد من الجوانب الإبراهيمية الفظييييعـــة
أعتقد إبراهيم فعلاً محتاج جريدة مستقلة، وكل الإبراهيميين

نورتي مـصـر
****************

ست الحسـن:
وحشتني تعليقاتك، وإحساسك العالي بما أكتب، كلامك فقط الذي ذكرني بأني في وحدتي "بلد مزدحم" .......
مش ممكن أكون وحيـد وكلكم حولي، ربما أبدو كذلك !

د. موني يقول...

هههههههه
ماشي ياهيما بس خلي بالك كده انا ممكن ارفع عليك قضية
فاهمني؟؟؟؟؟؟
ضحكتني بجد بس انا عارفة انت تقصد ايه بالظبط
ماااااااااااااشي اصبر علييا

Ihab Omar يقول...

احلي شغل
و احلي كلام يا ابراهيم
مش عايز رئيس تحرير ؟؟

نهر الحب يقول...

اظن انا مش حيكون ناقصني خالص اني الاقي اسمك في كل حاجه

دانت حتي بتيجي في الاحلام

بس لو جريده كلها ابراهيم

اظن اخري حيكون مستشفي المجانين
ويا سلام لو الدكتور المعالج يكون اسمه ابراهيم

بس ابقي خلينا نقول تعليقات في الجريده

وبلاش تكون وحيد وسط مليون

ممكن يكون فيه ناس قريبين منك وانت مش حاسس

Noha El-arabi يقول...

كل ده عشان ابراهيم
رمز الانسان المعاصر يعني
طب معلش بقي ده فيه تحيز
عاوزين ملحق لسوعاد مثلا
خليك ديموقراطي و تقدر قيمة التلات اربع بتاع المجتمع
اوك

قهوة بالفانيليا - شيماء علي يقول...

تصدق..
انا كنت مفلوقة من العياط .. و هموت من قلة الهوا و حالتي كانت حالة :)
بس لما قريت الموضوع دة ضحكت أوي ..
ربنا يخليك و يكفيك شر أطباء الطواريء :)
اليل انا بشوفهم كل يوم تقريبا ..!

إبـراهيم ... معـايــا يقول...

رنا:
لأ، بالنسبه لك ما تجيليييش خااالـــص!! ..........
رحم الله درويــش !
*************
كاميليووو :
مش لما يبقى يحصل ، وأشوفك أصلاً !!

نورتي أيضًا !!

********

إبـراهيم ... معـايــا يقول...

برنسيسا دوودووو الجميـلة:
أنا تماام إيه رأيك إني كنت بفكر أوكل لك تصميم الأغلفة، ونحط برضو حاجات كده ... ونظبط التظابيط .....
يا فندم مشس عامود واحد الجرنان كللله تحت أمـــرك ....
ممممممممممممم
النسخ المجانية حقك من الآن إن أردتِ ...

ويسعدنا اشتراكك ....

منورة الحياة

هبه الاسكندرانيه يقول...

سلامتك يا ابراهيم اغييب و ارجع القى جرالك اللى جرالك ده ..لا حول و لا قوة الا بالله ..معلش اكتر من كده و ربنا بيستر ههههههههه

لا بجد بئا و منغير هزار مبئتش بتفجأ لما اقرا واحده من تدويناتك التهيسيه العميييييقه بجد عجبتنى
تحياتى يا صديق

إبـراهيم ... معـايــا يقول...

د.موني:
تعرفي بقى، وأنا بحضر لكتابة التدوينة دي كنت ناوي أجيب سيرتك، من بار رد المظالم لأهلها !!!، بس مش عارف ليه وأنا بكتبه نسيييييييييييت خااالــــص

يا جمااااااااعة الفكرة دي طرأت بسبب الصحفية الواعدة إيمان، كنت بكلمها مرة وكـده، وقالت لي هات خمسة جنيه، أعمل لك جرنان !!!!

على فكـرة احتمال نحتاجك بجد قريب، هبقى أكلمك

منورة برضووووو

ولا قضايا ، ولا محاكم.

**********
هوباااا : للأسـف الجرنان ده من غير رئيس تحرير، ولا هيئة تحريرية أصلاً ، بس بإمكانك الـ"تعاون" معانا .... وإنتا فاهمني ؛)

مها يقول...

ابراهيم

فكرتك هى نفس فكرة الإعلام الشعبى Citizen Media.. وهى نفس الفكرة اللى قامت عليها المدونات والإذاعات المجتمعية على الإنترنت وغيرها.. ومشروع جريدة المواطن موجود فعلاً فى بعض الدول من فترة .. والفكرة مش بتقف بس عند اصدار كل مواطن لصحيفته الخاصة اللى بتعبر عنه لكن الأهم واللى بيعكس عبقرية الفكرة هى إنه من مجموع كل الصحف الخاصة بكل المواطنين نقدر ببساطة نتعرف على أخبار الوطن بدون رقابة ولا تزييف ولا تضليل إعلامى ..

فى انتظار العدد الأول من ابراهيم .. بس وحياتك تتوصى بالصفحة الاجتماعية علشان بمووووووت فى النميمة

ههههههههههههههههههه

إبـراهيم ... معـايــا يقول...

نهر الحب:
صدقيني يدووب كده الناس تبدأ تعرف، وتتعرف على الجوانب كلها، ممكن رئيس الجمهورية يبقى اسمه إبراهيم، بس مش عارفين بيحب الآيس كريم، ولا بيفضل الأناناس ... مثلاً !!
الناس القريبين كثييير ... بس مين اللي الواحد يكون حاسس بيه !!
هوه ده السـؤال !

**************

نهى: إزيك
أنا مبسوط من عدم تحيزك لنهى، ليكي عليَّا أعمل ملحقين واحد لـ"سعاد" خبِّري من عن هوانا سائلٌ ... و واحد ل "ليلى" ... وما أقفرت ..منها سماواتي
مش بس إبراهيم اللي رمز

كلنا رموز

نورتي

نضال يقول...

طب شوف بقى انت كتبت كام (ابراهيم ) في التدوينة دى ؟؟
على فكرة انت محتاج تتعالج من داء الكتابة ده وبعدين لاهو انت هتلاحق ازاى بقى ولا احنا حتى هنلاحق ازاى على اللى بتكتبه...
ربنا معاك يابنى !
وعلى فكره جدو اسمه ابراهيم ..ينفع ؟

إبـراهيم ... معـايــا يقول...

شيمووو بتاعة القهوة:

الحمد لله إن التدوينة غيرت مودكـ ، هذا هو دورنا في الحياة، وكويس قووووي إننا بنعرف نأديه .... وأول مرة أعرف إنك دكتورة !!

ياللا ،،، حصــــل خيـــر
نورتي
ومنورة على طووول

***************

هوبا: ياااااااااه من يااامااا قوووي ما رديتيش عليَّا، ولا تلاقيكي دخلتي أصلاً، ممممممممم من بقى مع أحبابه يا عم :)
ربنا يخليكي وتنوري ني عططوووول

د\أسماء علي يقول...

هههههههههههههههههههه

طيب انا ممكن انجز روحي واتجوز واخلف واحد ابراهيم ..

انا فطست على روحي من الضحك ..

فريدة... يقول...

:)

فكرة حلوة قوى يا استاذ

ياترى امتى هيصدر العدد الأول

حقيقي عجبانى الفكرة

تحياتى

mostafa rayan يقول...

حبيب قلبي زي العسل والله
بس انت ماقولتلناش ماذا عن العدد الأسبوعي لأبرايهم يعني هيكون يوم ايه وهيتضمن ايه وبالنسبة للناس اللي هتكتب دي هتقبضم كام في الشهر انت عارف بقي مرتبات الجرايد المنافسة
اما بقي بالنسبة لأني هنافسك في الحوار دة اطمن انا هفكر بشكل عملي وافتح شركة رنات موبايلات انزل الأغاني مجانا من على النت وابيعها للناس بفلوس ويلا دلع موبايلك مع درشاوي فون
والحق اجدد الرنات واحدث الأغنيات مع الخط العملاق درشاوي فون
وطبعا يا ابراهم كل اعلانات درشاوي فون في الجرنال عندك هتكون مجانية دة شيء ماتتكلمش عليه
تحياتي ليك يا صديقي
ملحوظة مهمة جدا : تعال وزور اخوك

Abu Shahin يقول...

ايه الفقر ده

دمك خفيف جدا وكتاباتك هايلة

وبالنسبة للجرنال انا خالو اسمه ابراهيم .. ينفع

:)

نوري يقول...

والله لو ده بجد
يبقي دي خطوه جريئه وجامده جدا
وربنا يقويك علي تحملها
وتبقي قدها وقدود
بس لما تنزل بقي
هنشوفها فين ؟؟؟؟؟؟؟؟؟؟
يعني ممكن القيها عند عم امين الي تحتينا ولا ليها مكان معين
وهنتشحطط وراها بقي
هههههههههههه
يلا بقي
بست وشز فور يو

إبـراهيم ... معـايــا يقول...

مها..مشربية:
نورتي بشدة، وواضح أثر العلام، من ذلك يقولون إن ال علاااام حلووو يا جدعاان...

أما النميمة فدي أنا ملياش فيها، صفحة الاجتماعيات دي صفحة مهمة قوووي لكل من تزوج أو خطب أو كتب كتاب، أو نشر كتاب حتى ........
تحياتي ، وفراولة بالزبادي

********************

نضــال:
منورة الدنيــا ... قطعًا هيبقى مهم وضروري الكتابة عن إبراهيم لإن إبراهيم مش مجرد فرد عادي، إبراهيم ده برضو إبراهيم يعني ....
فاهماني، ولا إبراهيم ؟؟؟

إبـراهيم ... معـايــا يقول...

د. أسماء: ممكن جـدًا طبعًا ، وهنبقى نعمل ملحق لأطفال إبراهيم، أو الأطفال الإبراهيميين :)

***********
الفريدة :

إيه رأيك بقى
أنا نفسي مش عارف ، إبراهيم مش فااااضي لإبراهيم خالص اليومين دول

هبقى أفضي إبراهيم وأقول له يهتم بيه شوية

جومانا حمدي يقول...

ههههههههههههههههههه

أنت نسيت اهم حاجة في جريدة إبراهيم

باب اريد حلا يا إبراهيم

عليك تهيسات تودي في داهية

ضحكتني وانا ماليش نفس اضحك بتاتا

kafrawy يقول...

يا باشا
اعمل الجريدة و سمهيا زى مانت عايز

جريدتك و انت حر فيها افردها و اتنيها

Ratings by outbrain