أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الأربعاء، 3 سبتمبر 2008

بتتســحَّـــر ... ولا مقضيـها ؟!!

رمضانكوووو ...كويس،...

على الرغم من أنه ليس الـ"رمضان" الأول لمدونتي، إلا أنه "طقت" ف دماغي من ضمن الطققآنات إني أستمر في عرض برنامجي الدوري .. (رمضان كريم مع إبراهيم).

.

السحور بركة، وكل حاجة، وهو الوجبة التانية الأساسية في "رمضان" بعد أن تم اختصار الفطار والغدا في الفطار (اللي هوا ع المغرب ده) ... ، وللإفطار ( في حد ذات نفسيته) كلام كثييير عندي عاوز أقوله ... منه مثلاً إن رمضان الفرصة الوحيدة اللي تخلي ناس بتصوم" رسمي"، ذلك أنهم بيصوموا كل السنة ف رمضان وغير رمضان، وعلى ما قال صديقي الشاعر أحمد عبد الجواد (الناس بتحج لكل مكان) فالناس دي بتصوم كثييير ف كل وقت، بس بيختلف رمضان إنهم مش لوحدهم بيبقوا صايمين، وإنهم ممكن ياكلوا بطريقة أفضل شوية!! ....

.

نرجع للسحور بقى ، حيث مضى يومان/ ثلاثة من الشهر الفضيل، ولم أتسحر في أحدهم مرة واحدة، فكرة السحور أصلاً عبارة عن ذكريات جميلة، وشوية أكل ، الجدير بالذكر إن فيه ناس السحور بيبقى أساسي عندهم لدرجة إنهم ما يتخيلوش صيامهم بدونه !!، وهم في كامل قواهم الجسمانية، والسحور ده في العادة بيتكون مما كان يتكون منه الإفطار الصباحي ، مع "مقويات صيام" أو مالئات معدة، ويأتي الفول منهم في المقام الأول، بعد كده أي حاجة تانية بقى "جبنة ، بيض، عيش حاف،زبادي" وللهواة وأصحاب المزاج العالي فكوباية الشاي لا غنى عنها، وبعدين بقى أهم حاجة الميـاه ....، أصل فيه ناس بتصوم، ومتخيلة نفسها جمال (مش عبد الناصر أقصد الحيوان) يعني المية اللي هيشربها ف السحور، هتفضل معاه للفطار، في حين إنه بمجرد ما بيصحى من النوم وينزل الشارع بيشعر بعطش الفيل !! ، في هذا المقام يذكر المغفور له ابن عمتي (حد أعرفه يعني) حيث قضى اليوم الأول من غير ما يشرب مية ع السحور

وفي تصريحات خااااصــــة جدًا له ( في الفطار أول يوم برضه) أكد (المدعو) إن ما منعه عن شرب الماء هو كثرة الأصناف التي كان يتناولها/يلتهمها على طاولة السحور، سألته حينئذِ متعجبًا إزاي ؟؟، فذكر رحمه الله إنه من كثر ما قعد ياكل والأكل "لخمه" فوجيء بالمؤذن (الشرير) يرفع أذان الفجر، وصاحبنا واقف ، وزجاجة المياة تراوده عن نفسه، لكنه اتحسبن ع المؤذنين كلهم، وقال لها (إني أخاف الله) !! الفكرة إن صاحبنا فضل فاكر إنه صايم من غير ما يشرب "كوب الماء"، وكأن كوب الماء ده هوا اللي هيخليه يحس بالنقص الشديييييد لغاااية الفطار، طبعًا مش محتاج أقول لكم فطر على كام قزازة مية !! طبعًا أنا فضلت أفهمه إن سحوره زي عدمه، وما إلى ذلك .....

.

للسحور معانا .. ذكريات خاااصة ، وفظيييعة ، من أيام الطفولة حيث لا أتذكر إلا الزبادي بسكر، لغاية ما كبرنا ورحنا المدارس، وكان بابا وماما يعتمدون علينا إننا نصحيهم للسحور، فيتم إعداد كل شيء، وعلى أكمل وجه، واااااو ، كانت السفرة بيبقى شكلها تحفة ، ويغلبنا النعاس، عشان يصحوا يتفرجوا ع السحور شكله يجنن ع الطربيزة، ويحوقلوا ، ويقولوا عليه العوض ومنه العوض، ،،،،

أما أنا حاليًا عن نفسويتي فشايف إن السحور رفاهية لا داعي من ورائها إلا إذا كان الواحد 1ـ عزوم ، 2 ـ سهران طبيعي :) .....

.

.ورمضان كريم ...مع إبراهيم

هناك 14 تعليقًا:

Rana Omar يقول...

بما إني أول حد هيعلق في اليوم ده

فهقولك كل سنة وانت طيب عشان تالت يوم رمضان

وهقولك بالهنا والشفا عشان السحور

وهقولك هنيا بعد كل تليفون

وهقولك شفيتم بعد ما تقوم من على الكمبيوتر

أنا عن نفسي السحور بالنسبة لي شيء مرهق جدا

لأني تقريبا باكل وأنا مغمضة عينيا

فمببقاش شايفة أنا باكل ايه بكتشف ده الصبح لما أصحى وألاقي معدتي وجعاني

المهم

إني بتسحر غصب عني بالإجبار .. لو عليا أنا هناااااااااااااام

أو
.
.

اقوم أصلي :)


باي باي

Empress appy يقول...

فيه عمال متقدرش تكمل تانى يوم فى شغل فى الشمس ولا شيل زلط وطوب واسمنت من غير سحور
يا ريس

كل سنه وانت طيب

أنا يقول...

بكره فكرة أنى أصحى من النوم عشان أكل بس المهم عندى أنى أشرب ميَه لأنها أكتر حاجة بتتعب فى الصيام...انا بسهر ف السحور بالنسبالى سهل

السحور روحه جميلة ف اللمة و بيبقى ماسخ لو أنت لوحدك ذى بالظبط كأنك قاعد تعمل واجب المدرسة

كل سنة و أنت طيب

غير معرف يقول...

وماله يا عم
فيه حاجات كتير بيبقالها معنى في الشهر دة تحديدا
ودي احلى حاجة في الدنيا
مش الحاجة
المعنى
انا نفسي ماقدرش اصوم من غير ما اتسحر على اي حاجة

صباحك فل

غير معرف يقول...

ربنا يديم لنا رمضاناتك التدوينية ... ولا الأصح تدويناتك الرمضانية
طبعا وغيرها من التدوينات
بجد وجهة نظر حكاية شرب المية قبل الفجر دي ... وبالررررررغم من إني مقتنعة تماما بكلامك إنها مش قضية يعني ... بس ما اقدرش أبقى صاحية وما أشربش
بالذات في رمضان السنة دي
ولا إيه
رمضانك مختلف يا هيمو .... مش كده برضه؛)
دينا

إبـراهيم ... يقول...

رنا:
بجد وحقيقي قووووي، من الصبح وأنا عاوز أرد عليكي، عليك دخلات كده تودي ف داهية :) ..............
مرعليَّا (عشان الأمانة العلمية) أيام كنت بتسحر فيها بالإجبار، بس برضو كانت أيام جميييلة قووووي، كنا نصحى على صوت محمد إبراهيم الله يرحمه وهوا شغال مسحراتي ....
يييييييييييييييييييه ، دونياااا
نورتي يا رنا

ورمضان حلو قووووي عليكي
************
آبي :
منووورة يا فندم، سعادتك الفواعلية الله يكون ف عونهم فعلاً ، بس تفتكري هما عارفين إنك بتتكلمي عنهم حلو كده ... أيووووووة ....

نورتي يا فندم ....

وابقي اتسحري كل يوم

ورمضان كريم ، مع إبراهيم

إبـراهيم ... يقول...

أنا:
إزيك، طب أنا بقى أرد عليكي إزاي دلوقتي، أول مرة أكتشف إن فيه(أنا) غيري ف المنطقـة، عمومًا نورتي، وطبعًا دي زيارتك الأولانية .....
هوا فكرة السحور عاملة زي الواجب المدرسي لما الواحد يكون لوحده ، فهي تنطبق على كل الممارسات التي يمارسها المرء ..لوحده ....
وأحب أطمنك ... إني مش بفطر لوحدي، أنا بفطر معايا ....

و رمضان كرم ..مع إبراهيم
******************
مصطفى باشا:
أنا برضووو بقول لهم كده، لاااازم نتسحر على حاجة، أي حاجة، بس مش يبقى السحور يعني الهم الأساسي، شغاااال يا معلم ...
ومسااااءك ورد ...
وطيارات ملونة

خالد كامل يقول...

كل سنة و انت طيب
انا عن نفسى بخربها أكل على السحور
دا غير جرادل المية اللى بشربها
و كل ده مش بيعمل معايا أى حاجة برضه
D:

Ehab يقول...

نعم يا با شمهندس ؟؟!!!

بتقول ايه حضرتك ...

بجد فعلا بعد البوست ده انت رمضان هيناسبك اوي عشان تشتغل مسيحاتي ...

مسيحاتي مش مسحراتي !!

يا بتاع بيد أن !!

إيه التسييح ده كله ؟ مكانش العشم يا باشمهندس !!!

يعني اكمني حكيتلك قد ايه انا كنت عطشان اول يوم يبقى انا مت بقى كده خلاص ... يللا الله يرحمني .. ويح ... ولا بلاش ...

عموما يا خويا ابقى تعالى اتسحر عندي وانا ازبطك ... ما تقلقش ...

هتحلف بكمية المية اللي هتشربها :)

وافضل سيح انت كده ومسيرك تفطر عندنا ف يوم ... ده انت هتشوف ايام عسل !

ولااااااااااه !

ما تزبط ياااااااااااه !!

:) :) :)

امضاء
ابن عمتك العطشااااااااان !

Ihab Omar يقول...

و الله يا ابني انا ايام الجامعة مكنتش بتسحر اساسا ً , و حتي دلوقتي مش عايز بس بعمل كدا علي سبيل العادة
يلا رمضان كريم يا براهيم

إبـراهيم ... يقول...

دينا:
نورتي البلوجز بوت :)
الواحد مننا بيبقى عنده شعور غريب إن كوباية المية اللي شربها دي هيا اللي هتنقذه، هوا "السحور" مهم برضو ....
خالص تحياتي ، وأكيييد رمضان ده أحلى
.
.
وكل رمضان يبقى أحلى وأجمل إن شاء الله لينا جميعًا
****************
السيد المهيج
خليك كده ، لغاااية لما بكره تعرف بقى
الكلام على إيه، كل سنـة وإنتا كويس

اللف والدوران برضو ملهمش لازمة، وعلى رأي المثل

إبـراهيم ... يقول...

هيما حبيب قلبي:
سياحة إيه وسفر إيه ياابني إنتا ؟؟؟، هوا حد كان داس لك على طرف ؟؟؟
الرحمة تجوز ع الحي والميت ، ربنا يرحمك، ويرحمنـا منك، وبعدين إنتا عمرك عزمتني على بصلة لما تعزمني على سحووووووور :)

منور يا عطشان :)

رمضان كريم يا إبراهيم

*************

إيهاب ، لأ ، أوعاااك ... العادة بنية صالحة تبقى عبادة، وبعدين السحور سنة مؤكدة ....

نركز بقى شوية
تحياتي
وكل سنة وإنتا جمييل

نوري يقول...

رمضان كريم
يا استاذ ابراهيم
ويعوده علينا ديما في طاعه وذكر
بس انت بتتكلم صح
اشمعني فعلا بق الميه الي بنشربه والمؤذن بيقول الله اكبر
حاجه غريبه والله
يا اخي البني ادم ده عليه حركات غريبه قوي
ههههههههههههههه
يلا بقي
هابي رمضان

جسر الى الحياة يقول...

بص يا هيما انا ما ليش فى حكاية السحور ممكن زبادى او كوباية عصير او كوباية نيسكافيه لكن انت فكرتنى بالبوست ده بابنى الكبير يفضل طول الوقت يلعب وييجى قبل الفجر بربع ساعة عايز يتسحر ويجننى اقوله يالا خلص الاذان هيؤذن وانت لسه بتتسحر ويعصبنى ويجننى وكان معدته مضبوطة على الجوع قبل الاذان بدقايق على العموم ذكريات رمضان جميلة وكل سنة وانت طيب ومتتقلش فى السحور يا هيما عشان متطلعش من رمضان وزنك زايد

دمت بخير ومودة

Ratings by outbrain