أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الثلاثاء، 16 سبتمبر 2008

موسيقي ..تصـويـرية .. بقى ياعم !!


أوقات كثيييير أحس إن خلااااص الفيلم أو" المسلسل" اللي إحنا عايشينه ده مش ناقصة غير حاجة واحدة بـــس، لاهو محتاج مخرج، ولامؤلف، ولا مصممي ديكور ومديري إنتاج، هوا بس على قد الألحان والتوزيع وقيادة الأوركسترا، وحد محترف زي "محمود طلعت" ولا ياسر بيه عبد الرحمن" ولا السوبر "عمار الشريعي" ويعمل له "موسيقى تصويرية، بس بلاش الأغاني اللي جوه، لأنها مش ناقصـة ..!!

.

لأ بجد صحيح، وده مش عشان مسلسلات رمضان، لكن عشان الحياة عامـة، يعني ليه لما تبقى في حاجة حلوة ما بنسمعش ف الخلفية موسيقى حلوة، ولا لما الواحد يكون قريب من ربنا يسمع كده نغمات دينية كإن اللي ملحنينها كانوا بيصلوا وهما بيعزفوها (أستغفر الله !!) ، ولا لما تحصل لا سمح اللي مصيبة ما بنسمعش (تتن تتن) و ( تك تاك تااااك ) و(تش تش تش ، ودن دن دن ) والحاجات اللي تحسس الواحد بالقلق دي !!

.

أعتقد إن اختراع الموسيقى التصويرية ده برضو من أفظع وأخطر اختراعات البشر للإيهام بالحقيقة، كعنصر جذب وتشويق وتصديق ، وأعتقد إنهم (بحرفنة) نجحوا فيه إلى حد بعيد، سواء في المسلسلات أو الأفلام ....

أفتكر بس فيه موسيقى ماكانتش ماشية مع مشهد(أكشن) في الفيلم العجيب (فتح عينك)، حيث كان مشهد الصراع الأخير الحتمي بين الخير والشر، واللي فيه ضرب نار وبهدلة، كانت موسيقاه راقصة لحد بعيد ...

.

.

أقول لكم كمان ولا تزهقوا مني، من الحاجات اللي حصلت ف رمضان لواحد صاحبي معرفوش خاااالـص ولا من بعيييد ولا من قريب، إنه ساب باب بيتهم موارب (مش مفتوح قوي يعني)، وراح مشوار معتبر، وربنا ستر إنه رجع يوميها الضهر ليكتشف إن باب البيت مفتوح، وبيقول لي بقى دخلت البيت وأنا شغال موسيقى الخطر التصويرية، متوقع ف أي لحظة حد هيطلع لي من تحت أي حاجة، وبعدين نسيت إن مفيش تصوير عندي ف الشقة يوميها أصلاً!!، ده مش بعيد إللي يدخلها يسيب فيها ربع جنيه وهوا طالع ... و الموسيقى التصويرية وقفت فجأة !!

واحد تاني بيحكي لي إنه شاف مشهد قتل (ف المقطم) عيني عينك، وف عز النهار، لغاية انهاردة المسكين مش مصدق إنه شاف السكينة ف ضهر الضحية، وكان راكب ميكروباص والناس اللي ف الميكروباص كلهم ريقهم نشف، وهما بيبصوا ع المنظر، بس عدى، بيقول لي أصلها مش ممكن تموت كده، مكنش فيه أي موسيقى تصويرية تدل على مشهد القتل الفظييييع !!! ، أنا مصدقه قوي ، ومتوقع بصراحة ....

و إنتوا خارجين من المدونة اعملوا زي شاشة دخول الويندوز تاتااااااااااااااااا....
**************
رمضـان كريم ،،، مع إبراهيم:
مممممممممم ، تجذبني هذه الأيام أكثر من المسلسلات السخيفة التي يقطعون بها مد الإعلانات بعض الإعلانات الطريفة، بدءًا بكولا كريم وبيبسي حلمي، حتى مصراوي سامح ومنه، مرورًا بـ روتيتو وموبينيل الذي اشترى (أقوى شبكة محمول) وفي المقابل الذين (هيتكلموا بالليل ) عشان الدقيقة بـ10 قروش، والشركة الثالثة التي تقول لك "ماتخليش حد يفرض عليك هتكلم مين .....
وبيني وبيني لن أضيع على نفسي فرصة الحديث عن الإعلانات الآن، انتظـروا (فرج رنـا) ... مسيري أكتب عن الإعلانات ،،، أيضًا ... ، وبالصوت والصورة !!
لكن طمنوني، حد فيكو متابع حـاجة ؟؟؟؟

هناك 13 تعليقًا:

إبـراهيم ... يقول...

إزيكو يا بشـر ، ف الأول أحب أشكر جرأتكم إنكو فكرتو تعدوا أصلاً، وتبصوا على التعليقات، وتزودوها، أو تقللوها، أو تقروها وتستمروا في فضيحة الصمت!!

*********

جدير بالذكر إن الموضوع ده مكتوب من فترة، ومحسوبكم مكسِّل ينزله، إنه حاسس إن المدونة بتموت، بتحتضر ، صايمة!!، حاجة كده !!

**********
هوا أنا معرفش أنا كان فيه حاجة تانية عاوز أقولها، ولا لأ، بـــس لما هفتكر أهي مدونتي، وهبقى أعدي عليها على طول

mostafa rayan يقول...

انا متابع السيت كوم
انا سمعت اخبار خطوبة وكدة مبروك يا عم وربنا يتمم بخير

آيــة يقول...

:)

اول ما قريت الفكرة حسيت انها جديدة جدا ..

بس فكرت شوية لقيت ان حياتنا فيها موسيقى تصويرية بجد

او معرفش

انا شخصيا عندي موسيقتي التصويرية شغالة معايا على طووول

المشكلة أنك بتدور على شكل للموسيقى التصويرية عودونا عليه في الدراما ( تا تا تا تن ) ( ان ان آنن )حاجات من دي بقى

في حين أن كل واحد لو ركز مع نفسه ممكن يسمع موسيقاه التصويرية الخااااصة جدا

صوت مية نازلة في دماغي وانا بسمع كلام ساقع .. صوت هوا و رياح و انا بسمع كلام صاااااادم
صوت أنين أو صوت بكاء و انا مش عارفة اتكلم ..
اه .. واصوات عصافير متعدش و انا بطير او وانا قاعدة لوحدي

أصوات كل الآلات الكون اللي اعرف اسمائها و معرفهاش متلازمة مع اوقات حياتي

بتبقى الموسيقى التصويرية رامية على اكسليفون يعزف عليه محترف لحن سريع الايقاع :)

كويس اوي
كده انا اتجننت

عالم حبيب يقول...

أن أن أن آآآآآآآآآآآآن

>>> دي بس لزوم دخول المدونة أول مرة

فكرتك حلوة ياعم .. ما شاء الله

بس ما ينفعش تكون اناشيد تصويرية ههههههههه

ومدونتك جميلة وان شاء الله نتواصل على خير دايما

كرانيش يقول...

فكره بردو

بس متهيالى احنا محتاجين هدوء اكتر
بس انا متفقه مع ايه قوى لو حصل وعملنا فكره الموسيقى دى كل واحد هيبقى له موسيقاه الخاصه بيه
الموضوع معايا فين بقه لما اجى افتكر كلام حد صدمنى بحس بيه زى مابييجى فى الافلام العربى
فور اجزامبل:
مينفعش
مينفعش
لا مينفعش
والصوت بيزيييييييييد وبيعلى
ساعتها بضحك والله
بالنسبه للمسلسلات
انا بشوف مسلسل بعد الفراق خالد صالح وهند صبرى
وبنت من الزمن ده
بالنسبه للاعلانات
بحب اعلان الكولا بتاع احمد حلمى مووووووت
وبتخنق من اعلان كريم عبد العزيز
بيعجبنى الواد اللى بيقول
عمو عمو هى الشبكه القديمه راحت فين؟

ورمضان كريم يا فندم
سلالم بقه عشان يابخت من زار وخفف

ســـــــهــــــــــر يقول...

متابع حاجه ؟؟؟
متابع المسلسلات و لا الاعلانات و لا الموسيقى التصويريه المصاحبه لمشاهد الحياه
عارف
مشاهد الحياه مش محتاجه موسيقى تصويريه لانها ما بقتش تسيب اثر فينا .. اقصد المشاهد و بصراحه احسن انها مش بتاثر اصل الحكايه مش ناقصه كمان موسيقى تصويريه تخليها تثبت اكتر و تتعلق ف ارواحنا لاننا مش ناقصين

متابع حاجه انت ؟؟

إبـراهيم ... يقول...

مصطفى ريَّان:

صباح الفل، وأنا كمان، تتميز بإنها خفيفة، ومش محتاجة متابعة أصلاً :)

الله يبارك فيك يا جميـــل ، وعقبى لك

**********

آيــة، أسعدني جدًا تعليقك
وأضاف بجد للفكرة، وللموضوع، صحيح، أوقات بيبقى فيه موسيقى خاصة بينا جدًا حوالينـا، مش صناعية، وإنما طبيعية، فكرتيني بمرة كنت فيها ف مول، وكنت حاسس بزنة كإن الدوشة دي كللللها بتقول لي إنتا ولحدك :)
تسلم إيدك، وسلامتك من الجنان
تووووووووووووت

إبـراهيم ... يقول...

الحبيب حبيب,.....

عزيزي أنا بقول موسيقى تصويرية، مش أغاني تصويرية!! ، خـالص تحياتي على كل حـال

*********
الجميلة كرانيش، والتعليق الأجمل
هههههههههه، ضحكتيني ف موضوع ماينفعش ، ما ينفعش دي ممممممم ، بتحصل أوقات فعلاً :)
المسلسلات اللي بتابعيها، أنصحك تبتعدي عنها تمامًا ، وعلى فكرة إعلان حلمي عن البيبسي، مش الكولاهههههه

والكلام عن الإعلانات المرة الجاية أصلاً

نورتي قوووووي

أحمد سعيد بسيوني يقول...

كل عام وانتم الى الله اقرب

العنكبوت النونو يقول...

عارف
...
لأ ابراهيم مش عارف
ههههههههههههه
خفة مش كده
ده انا حتى ساعات بأستتقل دمي الله يكون في عون الناس
المهم
تعرف بجد
احمد خالدبيه توفيق كان بيقول انت في الأفلام بتعرف ان البطل هيحب البطلة من الموسيقي التصويرية
طب وفي حياتك؟
انا عن نفسي بأسمعها بس مش بأحاول اصدقها عشان معظم الوقت مش بتيجي على هوايا
الموضوع محتاج بس حبة احساس
..
المسلسلات مش بأشوف منها حاجة
اما الاعلانات هأطق منها
اكتب عن اي حاجة خليني افوق واكتب انا كمان

نوري يقول...

اهئ اهئ اهئ
دي موسيقا تصويريه
عشان انا زعلانه ع رمضان ده جدا
معملتش فيه اي حاجه

يلا بقي ربنا يعوضني
الا قولي انت متابع ايه بقي

إبـراهيم ... يقول...

سـهـر:
تفتكري الموسيقى بتثبت المشهد، ولا بتمهد له بـس ، أعتقد أصلاً حياتنا ماينفعش يبقى فيها موسيقى، لأن أوقات هييجي عقلنا يتدخل مع المخرج، ويقول لأ ، انزل لي بالحزايني هنا، أنا حزين، مش فرحان ....، ويا سلاااام بقى لو قلبت بغم :) ... نورتي أيتها الشـاعرة

*************
أحمد سعيد:
أهلاً بـــك ... رمضـان بيمشي خلاااص !!

إبـراهيم ... يقول...

منى .. النونو:
قولي لأحمد بيه إحنا بنعرف إنه هيحبها لأنه مفيش غيرها يتحب، هوا البطل معمول للبطلة، مــا علينـــا ،،، نورتي بزياادة، وإليكِ التدوينة القادمـة بقوة عن الإعلانااااااااااات

************

نوري : إزيك ... ما تعيطيش اغتنمي العشر الأواخـــر

Ratings by outbrain