أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الخميس، 13 نوفمبر، 2008

ماتخـافش/ خــاف !!


كتبت رانيا منصور:

حاول تخاف
مني
وعليا
وبيا
فيا
وليا
ليك

وإياك تخاف
من غمضتي
خاف بس من رمشي اللي مَتني جوا عيني بالغلط لكن بيوجع!
مانتاش هتعرف رغم خوفك أو كسوفك رغم حبك تطرحه وتحط رمشك لجل يحمي مطرحه


وتقول "كوثر مصطفى" فيما يغني منير :

خايف اوعدك موفيش اقولك فيه تلاقى مفيش
وخايف لو قلتى بردانه أغطيكى بإحساسى متدفيش
دا أنا أد كلامى اللى هيخدك من دنيا لدنيا انا اده
لكن لو دمعك على خدك احلامى معاكى هيتهدوا
قوينى وقولى انك ليا علشان اتحمل لياليا وتعيشى واعيش
دا انا عمرى ما قولت ان انا خايف غير بعد ما قلبى اتمناكى
محتاج اطمن مش عارف الخوف جوايا وجواكى
لوكنتى صحيح بتحبينى ضمنى فى حضنك خبينى الخوف ميجيش

.
.
***************
عن الخوف !!!

حد عاوز يقول تاني ؟؟؟
خـوف

في عــــز فرحــتـــنــا ... دايمًا نلاقي الخوف ...
واقف في سكتنــــا ..مشتاق لنا وملهوف !
كأننــا واحشينــــه ، مع إننا عايشيــنه
خوف خلانــــا واحنا مغمضين بنشوف
.
لا عمره خلى القلب يفرح فرحة بجد
ولا عمره خلى حد يطّمن لحــد !
.
يا ما حاولنا ، وكان نفسنا
من فرحنا نسيب نفسنــــا
بس تملي بيفوقنــــــــا شعور بالخوف !!ا
.

الكلمـات : بهـاء الدين محمد
غنـاء :هدى عمــــــــــار
**** * * * ******** ** * ********** * ** * *****

ممكن نتكلم عن (الخوف) بهذه الطريقة، إزاي ؟؟؟ أنــا عن نفسي ،، مــش عــارف !!

يمكن أكتب بعدين، يمـكن أكتب ف التعليـقـات >>>> كـالعـــادة !!!

هناك 22 تعليقًا:

هدى يقول...

طيب

وكأنك بتتكلم عن بديهية .. احيانا بفكر هو احساس الأمان ازاي؟؟

مش عارفة هو دا زمن الخوف .. ولا احنا اللي مش عارفين نعيش بجد


..

حلوة خوف لهدى عمار .. كمان الفيلم حلو قوي .. "قص ولزق" ل هالة خليل

..

قلب الأسد يقول...

هو بغباوته ... الخوووووووف !!! ليه ليه ؟؟؟ ليه بنخاف ليه؟؟؟ ليه بنترعب كده و بنرتعش و سناننا تخبط في بعضها ؟ رغم إن مفيش برد .. بس فيه رعب :(

بيسوو يقول...

احنا ممكن نقول اننا بنتولد بيه الشعور ده...مفتكرش مرة اني قفشت نفسي وانا مش خايفة..على طول خايفة من كل حاجة ومن اي حاجة..والمصيبة اني مش عارفة من ايه بالضبط

عزيزي ابراهيم..الخوف شعور ملتصق بينا بطريقة مريبة ومخيفة...الخوف بيكون شعور مزعج ومتعب مع الوقت

بالنسبة لي...الخوف ضيع مني حاجات حلوة كتير كان ممكن تغير حياتي فيما اعتقد للابد

شكرا يا مستر ابراهيم على الفرصة دي :)...فرصة سعيدة والله

kafrawy يقول...

الخوف

الظلام قادم

و لسه الخوف جاى اضل و العن

ســمـــر احمد يقول...

اسمك ... بنطقه بهمس خايف

لتفضح رعشتى حزنى

و انا بغنى ..

وشايفك من بعيد واقف
***

وكمان

و جى خريفى مستعجل

ورعشة قلبى فضحانى

بخاف م البرد ..

و الوحدة ..



واخاف لو بان نشيج الروح

ما اعرفش امسح دمعتى تانى

و لا باقى ونيس و لا خل

غير كرمك

ولا ليا ف غير قربك سند ولا ضل ...


.. الخوف ..
كتير عنه الكلام
ابراهيم
ممكن ارجع تانى؟

خمسة فضفضة يقول...

السلام عليكم ورحمة الله وبركاته

احنا في زمن الخوف

الخوف من كل حاجه وعلي كل حاجه

الخوف من بكره ومن امبارح

ولسه يا ما هانخاف ونترعب ، كفايه اوي انك تسمع نشرة اخبار ولا تشوف برنامج بيحلل ويناقش الاحوال ده لوحده ممكن يسببلك موجه من الخوف تنافس موجة تسونامي


سلام

sara rabie يقول...

انا كنت بقول علي نفسى زمان
حكايات سهله !
ببساطة يعنى تقراها
تدخل جواهاا وتعلم
ترسمنى خطوط ليك بتوصل
تصحا وتبات
وأنا كلى ثبات
انا والحكايات ع الوضع السهل!!
فاتحة الأبواب
والبيت عمران
بـ الخير و الـ غير
كل الأحباب فـ عينيك
بتهل
أفتح شبابيك الروح
لـ لكل
أضحك و أجرى
من هنا لـ هناك
وستاير روحى "الشفافه"
بتاخدها النسمه وياها
بتلف الأرض
من وضعى الثابت ف الدوران
انا بـ اترب
وستاير روحى الخوافه
من أول غسله تتكرمش
اتخض عليا
واتلون
أصفر باهت
من أول لمسه تتنسل
تتقطع منى
تتحول
لـ خيوط وخيوط
بالطول والعرض
وف وسط ده كله دايخه الأرض
طب أعمل ايه؟
اغزل يعنى!
ازى طيب؟
وانا جاهله ف شغل الابرة بجد
و بكوم فى شوالى الابيض
بـ اديا الساكته خيوط روحى
اتكعبل خاالص
اتشبك
و اوحشنى
توحشنى كمان
الضحكة السهله
الى بتطلع م القلب معاااك
بالليل برجع
وشريط اليوم يجى ويعرض كل الاحداث
اسالنى
" كان ليه م الأول؟"
طب ضامنه تعيشى
دقيقه كمان
و برد عليا بأى كلام
من امتى وقلبى الشفاف
"اتعلم"
ف العشق يخااااف !!



ــــــــــــ

ابراهيم..ربنا على المفترى يا ابنى :)

انا بحب بتاعت رانيا
جدا جدا


الخوف..ضريبه وجود
يتشد مع الشهيق..يخاف يطلع فى الزفير

شفت بقى !

maha zein يقول...

ايه يا عم
هو انا كل ما ادخل مدونة الاقي صاحبها خايف
انتوا هتخوفونا معاكم ليه
انا واحدة مبتخفش
مالكم بيا بقه

بس تصدق انا بخاف فعلا
اذيك يا براهيم
وكيفك
ابقه تعالا انا ببقه هناك

إبـراهيم ... معـايــا يقول...

طيب، بما إني قلت إني هكتب هنا، ومعلش اتأخرت عليكو شوية/شويتين،،،،
كنت حاسس بتكلم على حاجات تانية طرحتها النصوص اللي مكتوبة، هوا ليــه محدش حس لبيها قوي ؟؟؟؟

.
.
يعني عند رانيا: خاف بس من رمشي اللي متني جوه عيني بالغلط .. والحل ؟؟؟
ماانتاش هتقدر رغم خوفك أو كسوفك رغم حبك تطرحه، وتحط رمشك لجل يحمي مطرحه!!
يعني لسه فيه خوف جوانا ساكن وبسببنا، ومهما عملنا مش هنقدر نشيله ... بس لازم نراعيه (مثلاً) ...
والصورة اللي جايباها رانيا هنا طبعًا قمة في البراعة لحد مش قادر يعمل حاجة!! ....
الحل التاني الرومانسي اللي بتقدمه (كوثر) لخوف مرعب أساسًا وواقعي قوي، يمكن التغلب عليه بإحساس الطرفين أنهما معًا أقوى ..... وهو معنى للحق يلعب عليه الرومانسيون كثيرًا ولا يقويه الواقع، ولكن يحسب لها هنا أن جمعت بين الاثنين بوضوح ....
بعد كده بقى (خاااالــــص) يؤكد بهاء الدين تلك الحقيقة الغريبة، التي استخدمها من قبل مصطفى كامل في أغنية لم أحب أن أذكرها في هذا السياق (بخااااف) لأني شعرت أنها أوووفـــر قوووي ....
ولكن ليه صحيح ( في عز فرحتنا ،،، دايمًا نلاقي الخوف) ؟؟؟

تحياتي وكل الشكر لكم كلكم

إبـراهيم ... معـايــا يقول...

هدى:
مش فكرة بديهية ،،، الخوف اللي بقى عامل زي ما يكون هوا الأصل!! ...مش عارف أنا كده قلت إيه ....

عارف إن فيلم قص ولزق حلو طبعًا

تحياتي ، وماتغيبيش
**********************

منــــار :
منورة قوووي طبعًا إلك مدة أو فترة ماعديتيش هنـــا ....
كمان إنتي مش عارفة ليه ؟؟؟
.
.
*****************
بيــســـو:
إزيك ؟؟ ، مش بتكلم عن الخوف العادي على فكرة، بتكلم عن القلق الزيادة يمكن !!، ويمكن في اللي كتبته فوق شوية إضافات .....

أنا اللي أسعد بالفرصة دي ....

وكل الشكر لكم مرة كمان

ست الحسن يقول...

صباح الخير يا ابراهيم

أنا عديت امبارح وفكرت أكتب كلام كتير أويييييي وبعدين مقدرتش أكتب

لما بكون خايفة ( بجد خايفة أوي ) مبحتاجش أتكلم أو أسمع نصايح

كل اللي با بقى محتجاله حد يحضني جاااامد ويطبطب علىَ بشويش وبحب يفضل يقولي متخافيش كل حاجة هتبقى كويسة

بس كده

عالم صوفي يقول...

الخوف بيفرد عبايته على الوجود
وقبل ما ينتصر الأمل والامان فورا يحسموا المعركة

مشمشه يقول...

اعتقد انى ابتديت اخاف لما ابتديت افهم الدنيا صح والخوف دخل اكتر جوايا بعد المرور بتجارب مش كويسه فى الحياه الى احنا عايشنها دى والاصطدام بارض الواقع بجد كون انى كنت شخصيه فيها حتة المبادره بس دلوقتى بقيت بخاف وافكر كتير ده فادنى بس كان الاحسن من وجهة نظرى انى مش اخاف واعيشها ببساطه زى ما كانت وبيقولك فى الامثال الشعبيه ان من خاف سلم مش عارفه باين طولت بس حبيت اقول راى

إبـراهيم ... معـايــا يقول...

كفــراوي ، نسأل الله الـسلامة ...

نورت، إيه التشــاؤم ده !!

ياريتك تعدي تاني :)

******************

الجميلة دومًا سمر، أعجز هنا عن مجاراة إبـداعك، ولا أتمكن إلا أن أشكرك كثيرًا ....

لك مودة خــالصـة ...

وأمــان دااائم ياااارب

**************
ست فضفضة
إنتي حولتي الخوف لحاجة تانية، مكنش قصدي كده برضووو على فكـــرة !!

وياريتك تعدي تاني


منوراني على طووووول

Summar يقول...

بخاف لو لحظة
نسيت اخاف
واخاف لو ضحكة مَحْليّة فى عيونى..ضعاف
بخاف انسي..انى خايف حتى من خوفى
واخاف اكتر
لو انسي انى ساعات.
.خواف
بخاف على قلبي..وبطبطب...ولو بالجرح
بخاف على الحلم اللى ماتفتح
ولساه جوة بيلمح
واخاف من وقت خايف فيه وانا وحدى
اكون وحدى بقيت الشرح

بخاف افرح...
وعيني ساعات كده تدمع
واخاف ع الدمع يتجمع
يغرقنى
واخاف لما ابكى..يخذلنى
ماينجدنى..ويتمنّع

بخاف...بعد اما احس
اعود بلا احساس
واخاف بعد اما الاقى النور...تضيع الناس
واضيع من غيره...
من روحى
ومن قلبي
ومن خوفى..اعيش العمر كله..بخاف
حقيقي..بخاف


:)
شكرا على فرصة الكلام

رانيا منصور يقول...

ابراهيم ..

مش عارفة أغلّس واقولك ان كلامي نوّر تدوينتك :D

تؤ.. :))
نيجي للجد

تشكر عالتعليق الحلو ده


الخوف حاجة إنسانية أكتر من كونه واقع عايشين فيه
يعني أحيانا الواحد بيبقى "عايز" يخاف
رغبة معينة جواه بتسعى لكده
يمكن عشان يبقى بعد شوية "عايز" بردو حاجة تانية
"أمان" مثلاً :)

ما علينا

تشكر عالبوست الحلو.

حاتم عرفه يقول...

الخوف .. الفرحة ..

الخوف إحساس يدعم كل شيء .. قبل الحصول عليه .. ويملؤك بالاطمئنان من بعده..

أبدا لا نستطيع الحياة دونه..
و كانوا بيقولولي أيام ما كنت بحب العسكرية والجيش ..

إن الشجاعة مش أنك ماتخافش..
لكن أنك تخاف .. وأثناء مانت خايف..
تعمل الواجب..

حلو الواجب ده؟..

تحياتي ليكي يا أبو خليل..
و ابقى تعالى..
:)

إبـراهيم ... معـايــا يقول...

ســارة ...ال ربيع

وااااااااو ، بجد أدهشتيني!!!

التدوينة دي حظها حلو إذن جدًا ....
تعرفي إني مكنتش أعرف إنك بتكتبي شـعـر، وحلو قوووي كده كمان !!!

((وشريط اليوم يجى ويعرض كل الاحداث
اسالنى
" كان ليه م الأول؟"
طب ضامنه تعيشى
دقيقه كمان
و برد عليا بأى كلام
من امتى وقلبى الشفاف
"اتعلم"
ف العشق يخااااف !!))

حلوة قوي، قوي ، قوي

لا ريب أن كنتِ ورانيا ... صديكتان

تحياتي .. وباقة ورد

إبـراهيم ... معـايــا يقول...

مها .... زين


إنها الحيـاة يا ستي، وبعدين بتقلدي حتى ف التعليقات ؟؟؟؟ ، والله إنتي بتهرجي ، طب لا هنا بقى، ولا هناك ، أنا هتبت هنـــا

ومنوَّرة على طوووول

***************

صباح الـ نور .. يا غادة الحسن:

نحتاج دائمًا كثيرًا لهذا الحضـن ...
ولحد يقول لها لنا من جووووَّه قوووي

ما تخـــااافــــش ...

ولوعىل طريقة بنت منصور ...خاف :)

تحياتي ،،، و وردة

نهر الحب يقول...

اولا
من كتر اللي بنشوفه مفيش اي شيء يخلي الواحد ما يخفش
ده الاهل ممكن يقتلوا بعض عشان حاجات تافهه
والاصحاب بيضحوا ببعض عشان اي حاجه
والاحباب

للاسف ممكن يخونوا بعض حتي بعد العشره

مين يطمن لايه

حتي والناس ماشيين في الشارع بيخافوا
حد ياذي حد او يضايق حد
لان من الاخر مبقاش فيه حد بيخاف علي حد ولا علي مشاعر حد


بالنسبه للنصوص
رانيا كلامها جميل جد ا حلوه قوي
خاف بس من رمشي اللي متني جوا عيني بالغلط لكن بيوجع

منير
مافيش كلام عليه بس نفسي اعرف مين اللي بيكتب كلام اغانيه

لو كنتي صحيح بتحبيني ضميني في حضنك خبيني الخوف مايجيش
هو ده الحل بكل بساطه

بهاء الدين محمد كمان مافيش فيه نقاش
حزينه لكن للاسف واقعيه جدا

لا عمره خلى القلب يفرح فرحة بجد
ولا عمره خلى حد يطّمن لحــد !

بس
طولت عليكوا كالعاده

إيمان الميهي يقول...

كيف حالك يا إبراهيم ؟؟
الخوف ده أكبر عدو في العالم
لو الواحد قلبه مليان بحب ربنا أكيد مش حنخاف لا على عمر ولا أهل ولا حبيب ولا رزق ولا شئ ونسيبها على ربنا
نستودع الله قلوبنا
فلله ما أخذ ولله ما أعطى
إحنا بنخاف إكمن الدنيا باقت وحشة أوي بس كله بيعدي
محتاجين بس نؤمن ونتوكل بجد
لو كان الخوف رجلا لقتلته

إيمان الميهي يقول...

ونسيت إليسا لما بتقول
متخافش مني أنا اللي زيي تخاف عليه

Ratings by outbrain