أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الثلاثاء، 20 نوفمبر 2012

ناس عندها لحمة :)

بسم الله الرحمن الرحيم، اللهم ألهمنا الصبر حتى نرضى وألهمنا الرضا عند الصبر، ويسِّر وأعن ...

فيه بعض الأسئلة الوجودية، اللي عاوز أطرحها هنا بشكل عشوائي فوضوي عبثي، يمكن ف يوم من ذوات الأيام أجد ليها إجابة..
هوا الناس اللي معاها فلوس كتير بتعمل إيه لما يجي لها فلوس تاني؟!
ويحضرني هنا مقولة عادل إمام في الواد سيد الشغال (يعني ناس عندها لحمة بتعزم ناس عندها لحمة على لحمة؟!)

يعني من أوائل دروس المدرسة في حياة أي إنسان بدائي إن (الطمع قل ما جمع) وإن (القناعة كنز لا يفنى) .. هنفترض إن فيه 30 طالب قروا الأمثال دي 20 منهم ماصدقوهاش مش فيه 10 ممكن يصدقوها؟!

يعني أنا دلوقتي لو غني جدًا وثري ثراء فاحش وجالي  مليون جنيه، مش هبقى متضايق ومحبط؟! ولا هفرح برضو ؟!
 تيجي إيه مليون جنيه جنب ثروتي اللي بالمليارات؟!
زمان قوي من 10 سنين كده كنت فكرت ف الموضوع ده برضو!
 قلت لأ، ياعيني الأغنيا دول غلابه وبيتضحك عليهم، عشان مش بينزلوا يشتروا من العتبة، لأ بيضطروا بما إنهم (غناي)* إنهم يشتروا من أماكن راقية وبتبقى الحاجات ياااعيني غالية عليهم قوووي البنطلون اللي بـ 150 ممكن يبقى بـ ألف ونص، والتي شيرت أبو 90 جنيه بيبقى بـ 900 وهكذا !
 ده غير الأكل والشاندويتشات والمطاعم والكافيهات، إشي سيلانترو على بينوس وغيرها وغيرها من الأشياء الفاخرة اللي تموع النفس، واللي الواحد منهم بيصرف فيها ع القليلة خمسمياية ف القعدة !
 الحياة صعبة يا أصدقائي، صعبة ع الغني والفقير صدقوني
 لاسيما في مصر!
.
بس السؤال بقى برضو، يعني اللي معاه فلوس كتيييير ده وبيصرف في القعدة خمسمياية  لو جاله ألف جنيه هدية، مش ممكن يدين نصهم مثلاً ! زكاة ن صحته وعافيته (زي ما بيقولوا) !
 ولا لازم الألف تتحط جنب المليون ونص ؟!!
عادي يعني!
 طب سؤال تاني وده الأهم، ليه الأغنيا اللي هما مش ف بقهم معلقة دهب من صغرهم ولا حاجة، يعني الناس اللي كانت فقرا (مش فقرا قوي طبعًا) وبعدين اغتنوا بمجهودهم وكده، ليه الناس دي ما تقررش تبقى كريمة مع الناس اللي بيشغلوها، هل خوفهم من طمع الناس الأقل ؟؟ ولا فاكرين نفسهم فلوسهم هتقل يعني ولا إيه ؟!
سؤال تاني بقى أهم، عندنا كام قناة تلفزيون مصرية؟!
 القنوات دي بتجيب أجور العاملين فيها منين؟!
 طب بتكسب إيه ؟
من الإعلانات؟!
 ليه هيا الإعلانات دي بتجيب كام ؟!
والناس اللي بيجيبوهم ضيوف بيدوهم كام ؟!!
 أنا بحس أوقات إن فيه حتت فيها مواسير فلوس بتنزل على ناس معينة طبعًا ..
 بس الملاحظ بشدة إنها كلها ينطبق عليها مثل (ناس بتعزم ناس عندها لحمة على لحمة!)
يعني البرنامج الوحيد الاستثناء من سيربح المليون!
 وبرضو مش منطقي يعني إن مره واحدة يربح المليون ولا الـ 100 ألف حتى!
 وفيه ألف متفرج بيتفرجوا عليه !!!
.
إمتى بقى الواحد يبقى كاتب كبير؟!
عاوز أكتب "خرافات" ينتقدها ناس كتير جدًا ومع ذلك يعجب بيها ناس كتير جدًا برضو ... المهم في الآخر آخد عليها فلوس كتييير برضو
 وأقعد حاطط رجل على رجل .. باشا بمعنى الكلمة
.
 أكيد في يوم في شهر في سنة ..
 هيحصل الموضوع ده ..

 وهبقى أقفل المدونة
 بس أوعدكم كل حد هيعلق هديله مممممممممممممممممم
 10 جنيه ..
 لو باخد ع المقال ألف جنيه مثلاً
.
 لو باخد 10 آلاف هدي كل واحد بيعلق 100 جنيه
 وماليكو عليا يمين
.
 وهذا إقرار مني بذلك
.
 بس والنبي بلاش شغل اللجان الالكترونية .. لأني هقابل كل واحد لوحده، وهديله الفلوس لوحده :) 
 وفوقيها بوسة
قشطة؟!

هناك تعليق واحد:

candy يقول...

المثل المصرى بيقول برضه "الفلوس بتغير النفوس"

:))))

على فكرة التعيدات اللى بتتكلم عليها خاصة بالوطن العربى بس لأنه كله عقد ..

عندك أغنا أغنياء العالم بياخدوا كفايتهم بس وبيدوا الباقى لجمعيات خيرية .. بيل جيتس قال كمان أنه هايسيب لأولاده أقل من اللى محتاجينه علشان يشتغلوا ما يأنتخوش !

والتعقيدات سلينتروا ومش عارفة إيه دى مش موجودة غير فى مصر .. شوف دى

"فترجلا من سيارتهما وتوجها لمطعم محلي للوجبات السريعة إسمه رايز هيل برجر، وهو مطعم عادي يشبه مطاعم ماكدونالدز، وقف أوباما ومعه مديفيدف كأي زبونين يطلبان الطعام من على الكاشير ودفع أوباما الحساب وإنتظر باقي حسابه ثم توجها كلاهما إلى إحدى المناضد الخالية وجلسا عليها وسط بقية الزبائن في إنتظار طعامهما، طلب أوباما ساندوتش شيدر تشيز برجر ومثله طلب ميديفيدف مع بعض الإضافات من الماشروم والهالبينو، ولفت نظري أحد الاصدقاء على الفيس بوك بعد مراجعته الخبر أنهما تشاركا في طبق البطاطس أو الفرنش فرايز فلم يكن طلبهما حتى كومبو ميل"

http://shokeir.blogspot.com/2010/06/blog-post_29.html

Ratings by outbrain