أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الجمعة، 25 مايو، 2007

نووووووم ... ن.... و ... م نننننننننوووووووم م م م م م م




يكتبوها إزاي عشان تبان نايمة أكثر ؟.؟؟ ، كنا ذكرنا في بدايات حياتنا التدوينية عن ماذا يفعل ابني آآآدم ع السرير (لوتفتكروا) ...
النوم ! على كلٍ .. يظل من الأشياء ... التي تعمل (عادةً) على السرير ...
وعلى رأي صديقنا (مطر) :
عندما تذهب للنوم .. تذكر أن تنام ...
كل صحوٍ خارج النوم حـراااام ....

أتتبع نصيحته بكل حذر ، أناااااااااام ، وأنا أصلاً من زمان نفسي أنام ، تقريبًا طوووول اليوم ببقى عاوز أنام ، حتى لحظات ما قبل النوم ، حيث تشتغل بطارية ذهن جسد التفكير اللا متصلة ، وتبدأ قشعريرة العقل اللاواعي في العمل في الجزء اللامرئي من الإنسان ، فيطير النوم من عينيك كحبات النفتالين !!!
* من ييجي شهرين ثلاثة ، قابلت صديقنا المشترك ، والسيناريست المغموووور محمد حماد، مش عارف إيه اللي جاب السيرة، لكن كل ما أذكره إنه تكلم عنه بحميمية وحنااان الحديث عن الحبيبة ، قال لي لسه لغاية دلوقتي ما كسرتش الـ 18 ساعة !! ، قلت له ياااااااه !! ، ده أنا لما بنام 8 ساعات بعتبر نفسي نمت يا راجل ! ، ساعة غباء جسم حضرتي البيولوجية بقت مضبوطة على الرقم 6 !! أصلاً ، أنام 3 تلاقيني فزيت 9 ، أنام 12 أبقى منتور 6 ، ده حتى ف مرة غلست عليها ونمت 4 لقيتها مصحياني 9 ونص ، عتاتة بغتاتة بقى !! ........
لكن حماد (ولا يمتلك مدونة بعد) كان بيتكلم عن النوم بحميمية نعستني أنا شخصيًا ساعتها ( واللفظ (نعس) يستخدمه الغير قاهريين بوفرة) ، وجعل يقول :
المفروض ننام بجد أطول فترة ممكنة ( وأنا أحدثه إن أوقات يوم الجمعة بنام 8 :9 ساعات) ، يقول : لاااازم تتجاوز الـ 18 ساعة نوم متواصل ، يقول : النوم المتواصل يختلف ، نام ، مش تعمل نايم ، لو مجالكش نوم ، ناااااامه ... حاول تنام

** أنا بقى من 3: 4 أيام مش عارف أنام زي الناس ، وأنا من البشر اللي ما بيعرفوش يناموا ف مكاتبهم ! لا سيما لو كانت مكاتب عقيمة زي مكاتبنا تحتل الشاشة ثلاثة أرباعها ، أفتكر ف رمضان اللي فات غفلت مرة ، ولا مرتين ، اتحسبوا عليا نومة !! ، ممممممممممم رمضان والنوم ، آآه ، المرة الوحيدة (أفتكر) اللي رحت ف النوم ف ميكروباص كان ف رمضان برضو ، وعديت محطتين وأنا نايم ، ورجعتهم تاني فااايق جدًا طبعًا ....................

**** للنوم وابن عمه السهـر لهم معي ذكريات من نوع خصوصي ، منها مثلاً أيام التطبيق ( المصطلح شبابي صياعي بعض الشيء) يعني أفتكر مرة طبقت يومين، كنت عامل زي السكران ف الشغل !! ، بس إيه ، بشتغل بكل همة وبتاااع ، ولو حد سألني الساعة كام ، هتكون الإجابة الوحيدة : ليه إنتا شايفني كومودينو ؟؟
.
******* ويقول علماء النفس والتغذية والشاي والسكر إن النوم بيحب يتدلع ( ومن حق الحلو يتدلع !) ، يعني لا يكفي لكي تنام أن تكون مرهق ، بل ربما يتأبى النوم عليك ف الحولات دي (مقصودة الحولات)، بل وربما يكون نومك حينئذٍ زي المرحومة (قلته) !! ، (( وده تقريبًا اللي بيحصل مع معاليا اليومين دووول !!))
(( لأ وافتكر أوقات برضو ف أيام المدرسة كنت ببقى النوم يداعب أجفاني يوميًا !!)) ... طيب ، ماذا نفعل له مثلاً : نغني له : النوم النوم النوم .... أوصف لك يا حبيبي النوم ...
قبل ما أشوفـك كنت .... النوووووم يا حبيبي !!!
ده لو عاوزين ننام نوم كلاسيكي، تقليدي ، على الطرب الأصيل
وبرضك ممكن نغني له ، ونهشتكه : النوم النوم النوم ، أحمر ودمه ظريف النوم ، بييجي ف شتا أو صيف النوم ...
.
********************
عارفين إيه المشكلة الحقيقية !! إني عمري ما استمتعت بنومة / السؤال هنا وهو سؤال عبثي تقليدي سفسطائي قديم ، متى يجد النائم لذة نومه ؟؟ قبل النوم ؟؟ ولا هوا نايم ؟؟ ولا لما يصحى من النوم !!! أنا برضوو حاسس إن مش دي القضية ، أو المشكلة ، المشكلة إني كل مرة بنام فيها .... بصحى !! نفسي مــــرة بقى ... أناااااااام ...ما اصحااااااااااااااش !!!ا
النوم سلطـــــــــــــــااااااااااان ... و لينكات متعلقة :ا
النوم × ويكيبيـديـــــــــا
كتاب اسمه النوم .. سلطان الدماغ
مواضيع منومـة ! قصدي نوميـة
نااااااس نايمــــة !ا
) :

هناك 25 تعليقًا:

إبـراهيم ... معـايــا يقول...

>>>>>>>>>>>>> <<<<<<<<<<<
ولا تقولوا ، ولا تعيدوا !! ، أقول لكم أنا :
الموضوع ده مكتوب من 15/5 وبيتأجل لظروف تديوينة ، وما خفي كان أكــثــر ، ما علينــــا !
.
.
.
المهم إني وحشتني ف التعليقات عليا قووي ، فقلت آآجي لي ، مدونتك حلوة ، وواضح إنها بتتطور ، أو إنتا مائل (إلى مائل مستقر) للتغير ، وعجبني قوي الصورة بتاعة اتصالات اللي انتا حاططها

مرسيييي قووووي يا براهيم ليك ....
عاجبني كمان برضو إنك عارف تصبر شوية على الحاجات الجاهزة ، وبتنزل حاجات بتاعة لحظتها .........

طبعًا ما أقدرش أتمنى لك التوفيق !! ، لأنه ـ يا حسرة ـ هيجي لك منين ؟
لكن أقدر أقول لك تمنياتي بإنـك تنام كويس دلوقتي
إذ إني أنا كمان عاوز أنـاااااااااااام
ألا هما ما غنوش للنوم ليه صحيح ؟؟

ملكة يقول...

مش عارفة مش قادرة احس بمشكلة قلة النوم بتاعتك دلوقتي دي ليه
أصل أنا اليومين دول مبنامش أقل من 10 ساعات والعادي غالبا دوقتي يبقوا 15 او 17 ساعة
واللي بيفضل من اليوم اما بصحى بقضيه بعين مفتوحة والتانية مقفولة ونايمة!!
الغريب بقى ان انا من النوع اللي لما يتضايق او يكتئب بينام
وكل ما اتضايق اكتر كل ما انام اكتر
لدرجة اني ممكن انام يوم بحاله بسبب الموضوع ده
مبيكونش نوم مريح لاني بقوم كل نص ساعة افتح عينيا وابص فوقيا على الساعة وافتكر اللي مضايقني واكتشف ان الحل الرائع عشان اهرب هو اني انااااااااام
وتخيل بقى
موسم امتحانات+اكتئاب =كمية نووم معتبرة لا يمكن ان تقل بأي حال من الأحوال عن 20 ساعة متواصلة

ماعلينا

YHYيــوســف الـمصـرى يقول...

السلام عليكم
اول تعليق فى المدونة ال... دى وان شاء الله مش الاخير
نيجى لموضوع النوم بنسبالى انا فأنا بحس انى بسرق النوم بالعفية يعنى بقالى سنوات كتير منمتش نوم متصل فترة طويلة واغلب نومى بيكون نوم تفكير اه والله بفكر وانا نايم !!!!!
لكن الملاحظة الهامة ان احلى اوقات النوم هى مرحلة ما بين الصحيان و النوم يعنى تشعر انك ولا صاحى ولا نايم ده الوقت الى بحس فيه فعلا بشىء جميل مش فاهمة
لكن بجميع الاحوال فعلا النوم سلطان
وسعات (سولطانية )
تحياتى

توتة توتة يقول...

ايه النوم دا كله

KOKKO يقول...

صحيح ان النوم احساس لذيذ جدا
خاصه اول ما تصحى بعد نوم عميق
وصحيح انا ممكن اخد جائزه نوبل فى النوم
لكن..وبحساب صغير احنا بنضيع اكتر من ثلث عمرنا فى النوم
ومع ذلك لازم تستمتع بالنووووم
good dreams

ساعه الغروب يقول...

ياااااااااااااه
نوم متصل؟

يعنى ايه الكلمه دى؟

انت بتهزر صح؟

دى لغوها

انا اخرى اربع ساعات بس
فاحمد ربنا

دا اذا ما كنش ساعتين ولازم اصحى وساعتين تانيين


دا انت بجد طماع جدا

بجد نفسى ربنا يرزقنى بالنعمه دى تانى

:)

الحمد لله

شكرا انك فكرتنى بيه

؛)

sendrlla يقول...

لا موضوع شيق وجميل انا مش من هواة النوم بس بعد ما خلصت الكليه خلاص بقيت بنام قولوا مثلا لو نمت بعد الفجر اصحى 2 الظهر لو نمت الساعه2 صباحا اصحى 12 الظهر

بس وانا فى الكليه كنت ايه استاذه فى السهر والدح كنت موس مذاكره كنت افضل سهرانه من الساعه 10.30 الصبح لما اصلى الفجر وانام واصحى 10 واذاكر 10.30

بس النوم جميل برده

إبـراهيم ... معـايــا يقول...

ملكــة : يعني عااااوزاااني أقول لك اللهم حســد ، ولا إيه بالظبط ؟؟؟ 15 ساعة يا مفترية ؟؟؟ ، وبتصحي كام ساعة على كده !! ، ياللا صح النوم ... مش كده برضووو
صح جدًا

إبـراهيم ... معـايــا يقول...

يوسف بيك المصري : نورت وأضأت ، ومرحبتين بيك ف المدونة الـ ... الـ... ، دي ! على رأيـك ....
فعلاً تخيل إن دي بتبقى أحلى فترات النوم
تحياااااااتي يا باشا ، وأتمنى إنـك تنورنا دايمًا

إبـراهيم ... معـايــا يقول...

توتة : فزعتيني
إزيك ؟؟؟ صحيح

إبـراهيم ... معـايــا يقول...

كوكو : عندنـــــــا يا مرحبًا يا مرحبًا ، مبروووك يا ست كوكو المدونة ، وتتربى ف عزكـ ... وتنورينا كده على طوووول
.............
لااااااازم فعلاً نستمتع بالنوم ، تصبحي على خير

إبـراهيم ... معـايــا يقول...

رضوى : إنتي من أهم النصاااايح اللي لااااازم تتنصحي بيها ( حلوة تتنصحي دي ) إنك تنااااااااااامي ، ويا حبذا لو نمتي كويس ، لأ بجد بقى لا تهرجين ... الونم ـ يا عزيزتي ـ مفيد للجسم ، ومفيد لحاجات تانية كثير ، يعني الغريب إننا اللي هتكلم على فوائد النوم ، وأنا صاحي 6 ونص الفجر !!! مش عارف ليه ، طب ما أنا أتوجه للسرير فورًا وأنااااااام


تصبحوا على خييييير

رهووفي يقول...

النوم !!!!!!! أقولك ايه يا ابراهيم عن النوم ، بالله علك اول ما تقبض على المذكور أعلاه إديني خبر

تحياتي
رهووفي

Lemonada يقول...

على فكرة انا المفروض اكون ثاني تعليق بس النت عندي مبارح كان ننننننننننننننننننايم وماخد اجازة
ههههههههههههه

صابتني حالة هستيرية من الضحك وانا اقراء ما كتبت
اهلي في المنزل اعتقدو اني جننت
بس لما قرءتلهم الي كاتبو انت كلهم وقعو من الضحك

يلا يا عم عيش ادخلت البهجة على عائلة كاملة
على فكرة لما اكون مخنوقة وعاوزة افرفش بدخل على المدونة بتاعتك
لها طعم البهجة والصدق والحقيقة كلو مع بعضو بطريقة عجيبة

تحياتي

اخر من الاخرين يقول...

من زمان نفسي انام نومة من بتاعة زمان برضة .. نومة كدة من عشقي في النوم . ايام ثانوي و الله علي ايام ثانوي كنت اقوم من علي المكتب امدد علي السرير و الكتاب في ايدي و اذ فجأة الاقي حد بيصحيني و يقولي انت نايم ولا بتذاكر . بس كانت بتبقي نومة ايه 100% بعد كدة بقي مبقتش اعرف . لما دخلت الكلية بقت الحياة سهر مطلق في سهر مطلق و التطبيق بقي اسلوب حياة . لما اتخرجت اكتأبت الحقيقة مش علشان مش لاقي شغل زي معظم المتخرجين بس علشان كان نفسي افضل طالب شوية فاول ما اشتغلت كنت بنام تعب + اكتاب.
لما سافرت بقي بقيت انام علشان انسي
هقوم انام بقي :)

Rosa يقول...

نيمتني يا ابراهيم وانا قاعده
:D
انا النوم دا مشكلتي في الحياة امنية حياتي انام زي الناس الطبيعيه مش اقعد اعمل صراعات مع النوم عشان يجيلي نوم ... هوا مين بيودي على فين؟
:D
بس على فكرة قول لصاحبك اني كسرت الرقم القياسي بتاعه ومن اسبوع فات نمت 19 ساعة متوصله دون انقطاع
:D
روحت العريش وجيت في نفس اليوم يادوب ساعة في البلد و رجعت تاني واليوم الي قابله ماكنتش نايماااااااااه
حطت راسي ولاول مره في تاريخ روزا النومي انااااااااااام على طول من غير محركات البحث والتفكير ماتشتغل في دماغي
ونمت 19 ساعه متواصله
يلا غيظ صاحبك بقا
تحياتي :)

shermen يقول...

النوم ينفع في شتا أو صيف
تصدق ممكن الغنوة دي تنتشر بكره
بس خد بالك سجلها ف الشهر العقاري عشان حقوق التأليف

بالنسبة للبوست بقى تعليقي عليه
هو النوم فعلا سلطان وجميل جدا
أنا عن نفسي لازم آخد قسط وافر من النوم
بالنسبة لسؤالك

والاجابه تخصني شخصيا
بستمتع بساعات النوم نفسها
ولو حلمت حلم جميل مش كوابيس ذي العاده بقوم مبسوطه جدا

وساعات بنام واحلم بكابوس مثلا
أقوم من النوم وأستعيذ بالله من الشيطان وأرجع انام تاني مخصوص حتى لو كنت عاوزه اصحى عشان خاطر أحلم حلم سعيد وأقوم مبسوطه

ماتقولش عليا مجنونه
لكن النوم سلطان فعلا
شوفت أديني بتاوب على سيرة النوم أهو
تصبحوا على خير

إبـراهيم ... معـايــا يقول...

سندريللا : منوووورة يا جميييـــل ، و نوم العوافي يا ستي ، هنعمل دراسة بعد كده أكيد عن أثر المذاكرة في تقليل أو نكتير عدد ساعات النوم ،،،،، تحيااااااتي


**********************

رهووووفي : يقول المثل الدارج : النوم النوم النوم ، أوصف لك يا حبيبي النوم


أظن كده عرفتيه ....... منوراااني

**********************

ليمونادة : أسعتنيني أسعد الله قلبـك ،،، آخـر ما كنت أتخيله إن الموضوع ده يكون مثار للضحك بالشكـل ده ، حقيقي أنا سعيد جدًا إني عرفت أعمل كــده ، ورأيـك ف مدونتي شـهـادة جميـلة أتفشخر بيها

تحيااااااتي يا منعنشـــة :)

*****************
السيد الآخـر : نورني حضورك ، ده إنتا تقريبًا كاتب عن النوم في حياتـك ، بس كان بدنـا نعرف سافرت فين ؟؟؟

منور ، وياريت تبقى مش الأخيرة يا باشا

سجدة يقول...

كنت بقرأ فى تعليقات فى مدونة سيزيف شفت صورتك قلت ايه دا
دا ابراهيم
اخبارك ايه
ومش بتدخل على الاميل ليه
عموما اعرفنى لوحدك
دا لو افتكرتنى

The Alien يقول...

ومين سمعك
أنا كمان نفسي أنام

وبالنسبة للأرقام القياسية
18 ساعة و 19 ساعة إيه اللي إنتوا بتتكلموا عليها
محسوبك مرة نام يوم الخميس الساعة 10 بالليل وصحيت السبت الساعة 5 الفجر
يعني نمت حوالي 30 ساعة
ومصحتش غير مرة واحدة شربت ميه وكملت نوم
طبعا الكلام دا كان أيام الكليات والإمتحانات
دلوقتي ومن ساعة ما إشتغلت بنام 4 أو 5 ساعات
واليوم اللي بنام فيه 6 يبقي تمام

أنا أطالب إننا نعمل حملة نوم
نختار نوم ننام فيه ... قصدي يوم ننام فيه
كل الناس تنام يوم كامل

تحياتي

Lemonada يقول...

سافرت فين يا عم
انت تقصد في مدونة قوس قزح؟

صاحب البوابــة يقول...

ويبقى

النوم سلطـــان

!!!!

تحياتي

YOTTA يقول...

استاذ ابراهيم
يعنى هو بص باه أنا لو اتكلمت عن النوم هاقووول كتييييييييير
و خلينى ابقى اقول فى مدونتى احسن لانى كنت ناوية اصلا اتكلم عن النوم
او تقدر تقول انى عاملة المدونة مخصوص عشان اتكلم عن النوم
تصبح على خييييييير

reri يقول...

ما هو بوست واحد أهو اللي فاتني
وإنت تقولي إتنين تلاته يا مفتري
أكيد من قلة النوم
أنا شخصيا بحب النوم جدا
يا سلام لما الواحد يخبطله 12 أو 13 ساعه كده بقوم عايزه أنام تاني
فكرتني بالنوم
بجد البوست ينيم
تصبح علي خير

سلاماااااااااااااااااات

إبـراهيم ... معـايــا يقول...

روزا : فووووووووقي ، نوم إيه وبتاع إيه ،،، هوا صحيح الكسل أحلى من العسـل ، وده عن تجـربة ، بس مش للدرجة دي يعني ، وتحياااااتي للـ 19 ساعة ، وعقبال ما تقفلي الـ 20
نورتيني ..............

***********************

شيرمين ، صبااااح الفل ، وحد لله ع السلاااامـة ، نورتي المدونة من جديد

أحــلام ... فتحيــة ( عشان سعيدة اتجوزت بـــس ) تحياااااااتي

***********************

سجـــدة ، منوراااااني ، وفرصة سعيدة فعلاً أن يعود الماااشي قليلاً ، أنا إيميلي اتسرق يا فندم من فتـرة
و الجديد : ibnzaydooon@hotmail.com

تحياااااااتي ، وعلى فكـرة لا يخفى القمـــر

Ratings by outbrain