ســـد ــ لامؤاخـذة ــ الحنـك !!

الأول : البنات (سيدات المطبخ) يمتنعن ، ثانيًا : ليتقدم الشباب العزبنجية (زي حالاتي للأبـد) ، ثالثًا : مش أبلة نظيرة ولا حاااجـة يعني !! ، بس أهي تجربـة ، والسلام

مممممممممم ، نخش ف الموضوع ، عندك فرخة جايبها من أسبوع (منورة الفريزر) وبطاطس (جاهزة للتحمير) ،وزيت ، وبصل ، وميه (من الحنفية ) و شوية دقيق ، وسكر ، بس مفيش عيش (كالعادة يعني ) ، والفينو خلص ، و .... ملكش نفس تنزل تجيب ، وقاعد معاك ، فمش طالبة تنزلك تشتري حاجة ! لحسن تزعل منـك ، وعندك حالة عظيييمة من الكسل الشنيع ، كسل يخليك حتى مش عاوز تنزل تعمل أي حاجة !!!، مش عاوز تنزل ، مش عاوز تفتح باب الشقة أصلاً ، كويس قوووي إنـك قاعد ع الكمبيوتر ، أو بتكلم الناس ف التليفون !!
.
سو سو .. سو .. سو ... عصافير بطنك بتصوصو، بما إنك ما طفحتش م الصبح ! ، أو بما إنها مفجوعة وبتصوصو على طووول ، وبما إن (لجسدك عليك حقًا) ، فلاااازم تكتمهم !! ، طب إزاااي ، إزااااااي ؟؟؟؟

إحنا قلنا عندك إيه ، فراخ وبطاطس ( تكتشف بعد قليل إن فيه مكرونة مخفية ف المطبخ) ، بس (ماعلينـا ) سيبك من دول كلهم ، لسه هتنضف الفراخ ، و تقشر البصل ؟.!! ، ولا لسه هتجهز الزيت ، وتقلي البطاطس !!! ، مين فاضي بقى لده كله ؟!؟
فيه اختراع جميييل ، ومريح ، وبيزغط العصافير ويبططهم بسرعة ، الاختراع ده اتعرفت عليه من زمان ، وكان اسمه وقتها ( سد الحنك) :)
تقريبًا ف الأماكن المفتخرة ممكن يسموه ( كمبوليتنيو بالعسل ) ولا (حنوكملبنو ) أو حلوى الـ... فالوذج هههه ، ماهي أي حاجة بالسكر بتبقى حلوة !! ( وده الغريب فعلاً ، إن السكر طعمه حلو !!، عين تلاقي الملح مملح ، والفلفل مفلفل ، لكن السكر حلو !! ) ....
رغم إن دي الكلة الوحيدة اللي اسم على مسمى ، يعني مش عارف يعني إيه ( بطاطس) ، ولا يعني إيه ( كنافة !!) ، لكن عارف كويس قوي ( سد الحنـك ) وت داز إت مين ، أنـد وت دز إت دوووو ( ده بيدو بلااااوي !!) ، المهم
.
طيب ، تعمل إيه بقى سيادتـك :
المقادير : شوية دقيق ( قد خمس كبشات كده) ، حبة سكر ( يعني مايعدوش كبشات الدقيق ، إلا لو عاوزها تبقى مسكرة بزيادة )، على شوية زيت ( لزوم الحاجة اللي ع النار) ، على كوبايتين مية ( محدش يقول لي اشمعنى كوبايتين) ...

طريقة العمل : يااااااااااااااااااهـ ، ربنا يصبرك فعلاً !!!
هتحط الحاجات دي ع النار ، وتقلبها ، مش مهم مين قبل مين ، ولا إيه بعد إيه ، المهم إنك تكون بتقلب( الخليط ) جيدًا ، حتى لا يلصق في الحلة ( ممكن كازارونة على فكرة) ، وانتا بتقلب هتلاقي ( سبحان الله ) عجينة ظهرت لك ، بيضاء فاقع لونها تسر الناظرين !! ، قوم ما تكدبش خبر ، وقلبها كمان ، واتأكد إنك حطيت السكر ، واطفي النار !

بس بعد كده بقى تعمل إيه ؟. ....

أكيد هتلهط على طووووول ، وتبقى تدعي لي ، ما تكترش ـ لأن (سد الحنك) أهم مميزاته إنه بيخرس البطن تمااااااامًا !!! ...............

وابقى قول جعان دي تاني !!!
في أوروبا ، والدول المتقدمة ، ممكن تكور العجينة ، وتضيف عليها جوز الهند ، لكي تبدو بشكل ( ألذ!!) ، لكن صدقني كده ولا كده هوا سد حنـك !!
مرة جربت أحط ع الخليط لبن ، طلع سد حنك برضه ، مرة حاولت أغير اللون ، وكان عندي عسل أسود ، طلع سد حنـك بالعسل الإسود إنما إيه تحححفة ( ماعملتوش تاني) !!
اكتشفت بعدما عملته إني عندي مكرونة ، طب وماله ، خليها للمرة الجاية !!
اتفضلوا معاناااااااااااااااااا .

مميزات سد الحنـك :
أولاً بيسد الحنـك
ثانيًا : مستحيل بعدما تسد حنكك ( اللي هوا يور ماوث يعني ، للي ثقافتهم فرنساوي ) تفكر تفتح حنكك تاني ! .
ثالثًا : الأكلة الوحـــيــدة (حد علمي ) اللي مستحيل بعدما تاكلها تخلص ، أو تقول عاوز كماااان ، حتى لو كنت الإيليفنت ذاااته !! ( فيل يعني ) !!
رابعًا : بتعمله ، وتاكله ولا كأنـك عملت حاجة ، ما بياخدش غلوة !! ، أو ( هســـة ) ، يعني أسرع مما يسمى بالوجبات الجاهزة ، والـ سريعة التحضير !!!
خامسًا : بيخليك تعرف إن كونك جعان أرحم بكثييييييييير من " وجع البطن !!! " لذلك يحذر الخبراء من عدم الإفراط في أكله !
سادسًا : سد الحنـك الأكلة الوحيـــدة اللي ممكن تعزم أصحابـك عليها مهما كان عددهم ، وإنتا مطمن ، بس ما تقوللهمش أنا عازمكم ع الغدا يعني !!! ، ولا تقول لهم أنا عازمكم على ( سـد حنـك ) !! ، قول لهم هعمل لكم أكلة تجنن ، وخلااااص !!
.

أسئلة بمناسبة الموضوع : ليه كل الطباخين العالميين رجالة ؟؟!!!
ليه الواحد لما يكون جعان ما بيطلبش ديلفري ؟؟؟ ( خدمة توصيل للمنزل !!)
ليه الواحد بيجوع أصلاً !!!