أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الأحد، 31 أغسطس 2008

رمـضااان جــانــا ،، وفرحنـا به !!، أهلاً .. رمـضـان


.....
رمــضـــان إبراهيم ...
.
الحقيقة إن " كريم" بيعتذر لكم، وببالغ الأسف، وكده يعني عن وجوده في هـذا الـ" رمضـان" ، ومش نرجسية مني ، ولا "شَوَفان" نَفس إني أقول لكم ... إبراهيم عليكم رمضان ده (( شوووف يا أخي ليها معنى وطعم إزاي)) ...

هوا الأصل إنها مش تدوينة ، دي حجز مكان، لغاية ما التدوينة تيجي ....

وكل سنة وإنتو طيبين، هوا إنتو حيلتكو غير ال"طـيـبـة " !! ( على رأي الدستور )


.

رمضان جانا .. وفرحنا به !! .. أهلاً رمضان !

إزيك يا "رمضان"؟؟؟، عامل إيه كده ؟؟؟ ، من سنة لسنة بنستناك، تفتكر إنتا مش واخد بالك مننا طول السنة، ولا إنتا مستنينا زي ما بنقول إننا بنستناك ؟؟ ،،،،

.. طب بنستنى رمضان ليه ؟؟ ، وبنقول " أهو جه يا ولاد ؟؟" ؟؟ طب وبعدين ، ماهو بييجي كل سنة !! ... وبنعمل إيه يعني ؟؟؟ ...

بنفتكر ربنا شوية، طول النهار، وبننسى بالليل، ولا بنهيص، ونشتري حاجات، ونتفرج على مسلسلات مختلفة مصنوعة خصيصًا لرمضان!! ....

السؤال اللي محدش هيعرف يجاوب عليه إشمعنى ف رمضان ؟؟؟ ، صحيح بتوع التلفزيون دول كفرة، وولاد ******* ، ومش عاوزينا نكسب"حسنات" ف صيامنا، اللي هوا فرض أصلاً، فبيشغلونا بالحاجات دي ، طب وليه مش بنفتكر ربنا إلا ف رمضان!! ....

ياااااااااه ... ده إحنا حلوين قوووي، وكويسين قووووي ، و زي الفل أهه ...

بص ع الناس ف المساجد بعد العشا، تصاب بالذهول، كل دول بيصلوا "التراويح" اللي هيا أصلاً "سنة" مش فرض، وكل دول وضعفهم كانوا صايمين طووول النهار، وبيسمعوا كلام ربنا، لأن الصيام فرض، زيه زي الصلاة، وتلاقي عدد كبير بيبدأ يرجع للقرآن، وتنتشر المصاحف انتشار خطير ....

أي نعم بتنتشر الأكلات برضو، وبتمتلئ المطاعم"ع الفطار" على عنيها، والمحلات لاتتوقف عن البيع والزحمة من أجل شراء"الأكل" اللي الناس صايمة عنه طووول اليوم، ودي حاجة غرييييبة قوي برضو، لأننا المفروض بنصوم، مش بناكل، وأنا شايف الفطار والسحور مش محتاجين كل هذا التدشين للغذاء، وكأننا مقبلين على مجاعة!! ....

بس بفكر برضو ف حاجة تانية ...

بفكر ف ثلاث حاجات

العبادة

والأكل

والمسلسلات والتلفزيون

رمضان بالنسبه لك يعني إيه ؟؟؟؟

....................

بفكر ف حاجة تانية برضو: الأطفال اللي ما بيصوموش (ف الأعم الأغلب) إلا للظهر، ولا حاجة بيفرحوا صحيح برمضان، ولا أهاليهم اللي بيفرحوهم بيه!!

طب و" الكبار" بيفرحوا برمضان فعلاً ؟؟، ولا أهو "موسم" زي غيره، وشهر زي غيره !!

الناس نوعين، حد كويس، مش هيفرق معاه رمضان إلا للزيادة، وحد وحش فمش هيفرق معاه رمضان برضه إلا بالسلب!! ,....

لكن اللي ف النص، اللي زينا كده ، رمضان بيعمل معاه إيه ؟؟؟

لسه رمضان فيه "روحانيات"، وصحيح بـ"تصفد الشياطين"، فتبقى فرصة لتظهر النفوس الأمارة بالسوء فقط، على حقيقتها، ونعرف إننا مش محتاجين" شياطين" خااالـص في كل شيء سيء بنعمله!! ... ، وإننا نعلم الجن !!

هوا مفيش شك إن "رمضان" فرصة، ونوع من أنواع الموقفة مع النفس، وبداية"ممكن" لتغيير حقيقي، لأ ، والأكادة إن بيقول لك عشان ربنا يتقبل منك "رمضان" وكل الشطارة اللي كنت بتعملها فيه، لازم تستمر بعده!!، وده بيبقى دليل إن ربنا تقبل منك !!

ماهو إحنا مش هنهرج !! .... شهر، واقلب !!

مممممممممممممممممممم

نفسنا صحيح السنة كلها تبقى "رمضان"، ولا كفاية شهر واحد ف السنة !!

رمضان بالنسبة لي إيه .؟؟

رمضان يعني :

ذكر، و"دعــاء"، واستـغفــار !

تم تحديث التدوينة، للناس (حبايبي) اللي كـانوا هنا امبارح، وجاري التعليـــق
.
"رمــضــــان" .. بالنسبـــه لكووو ... إيه ؟؟؟ ..

هناك 20 تعليقًا:

نهر الحب يقول...

اولا كل سنه وانت طيب

ورمضان ......ابراهيم ....قصدي كريم عليك

ثانيا والله العظيم جات علي بالي فكره رمضان ابراهيم دي
من كتر ما انت عمال تقول جريده ابراهيم وابراهيم في كل حته قلت في عقلي كان لازم يسموها رمضان ابراهيم


مين كريم ده

ابراهيم اشهر


كل سنه وانت وحبايبك كلهم معاك

انا اول واحده اهه

رضوى داود يقول...

رمضان بالنسبالي
ليل النجوم فيه متلألأة
و ال"اسكرونجي"منورة و احنا نازلين نصلي التراويح و بتختفى و احنا راجعين
و نهار هادي
و طعم كل حاجه مختلف
و كل سنه و انت ابراهيم

خالد كامل يقول...

كل سنة و انت طيب
و رمضان كريم بقى مش ابراهيم

Ehab يقول...

كل سنة وانت طيب يا فقري !

ورمضان كريم محمد فوده !

مش رمضان كريم بس كمان !

عموما ان يذيع صيت رمضان ابراهيم في مصلحتي انا كمان

;)

مش كده وللا ايه ..

mostafarayan يقول...

كل سنة وانت طيب

ShimaaMahdy يقول...

كل سنه وانت طيب

Ihab Omar يقول...

كل سنة و انت طيب يا ابراهيم
و يتحجز تدوينة في مدونتك ؟؟ انت خايف لحسن انا التاني يكتب قبل انا الاول و لا ايه ؟

إبـراهيم ... يقول...

نهر الحب:

كل سنـة وإنتي أجمــل، ياااااه ... عدت سنـة!!ن رمضان من المحطات اللي بتوقفنا قدام الزمن فعلاً ، رمضان اللي فات كان (غير شكل) ... ترقبوا "يوميات رمضانية" حصريًا على مدونة أنا وأنا
ربنا يخليكي

************
أميرة:
رمضان نجوم بالليل ؟؟؟ ، وبيبقى إيه الصبح ؟؟

عمومًا حصـل خيــر، وياريت لو عديتي تاني تطلعي شريط الترجمة للمفردة اللي اترمت هنا، بدل ماحد يفتكرها شتومة
ورمضان إبراهيم
**************

مهيج باشا:
على فكـرة كريم اعتذر "رسمي" الشهر ده
لأنه مش فاضي، عنده شهور تانية

رمضان حلو

حاتم عرفة يقول...

كل سنة وانت ابراهيم
وابراهيم
وابراهيم كمان
ربنا يزود من ابراهيماتك
طبعا رمضان ابراهيم أحسن بكتير من رمضان أى حد تاني
حتى اسألوا فى التوكيل
أيوة خش سخن كدة رمضان
وحاول تطلع منه سخن كمان
ربنا يوفقك يا رب ويوفقنا فى الشهر ده ونطلع منه بحاجات قاااااااااد كدة

ماتبقاش تنسى تزورني
تحياتي

إبـراهيم ... يقول...

إبراهيم:
يا ابني أنا مش قلت لك تغير توقيعك ده، هيوديك × داهيـــة ....
والمفروض رمضان يبقى كويس، أو حلو ، أو جميل، لكن ميييين "كريم" ده ؟؟؟

نورت ، وأشوفك بقى ... صدفة ؛)

إبـراهيم ... يقول...

مصطفى باشا ريان

كل سنة و إنتا أجمـــل :)
************

شيماء:
وأنتم ...كـذلـك :)

محمود الدوح يقول...

كل سنة وانت طيب يا انت وانت
ورمضان اللى جاى عليك يبقى رمضان كريم
مش ابراهيم

نهر الحب يقول...

تصوري عن رمضان عندي في المدونه
معلش حتعبك

كل سنه وانت طيب

Camellia Hussein يقول...

رمضان ابراهيم وكله دعاء
عم يا عم
الله يسهلّه ياسيدي
انا عايزة اشوف الصور صحيح
وكل سنة وانت طيب

أسما عواد يقول...

رمضان بالنسبالي كتير قوي صوت محمد رفعت
فوانيس زمان حالو يا حالو .. وحوي يا وحوي
والفوازير
كل دي اشياء راحت ومضت ..ايه اللي باقي من رمضان الهادي اللي كله لمه وفرحة؟
موش مم المهم كل سنة وانت طيب

إبـراهيم ... يقول...

إبهاب ..باشا:
إنتا بتقول فيها، طب وطي صوتك بقى لحسن أسمعك، أتمنى أن تعود لتقرأ التحديثات، ... ورمضان كريم ...مع إبراهيم

************
تيما الجميل المصمم قوي

منور يا خويا ، آآدينا سخنييييين أهه، الخوف بس لانولع :) نورت ، وأضأت وأشرقت، وهرجع تاني وأقول لك هتعزم، ولا إييييه ؟؟؟

إبـراهيم ... يقول...

محمود :

رمضان إبراهيم يا حبيبي ....، ساعتها عهيبقى كريم ومصطفى وعلي كماااان

نورت ,.,,, كالعادة

**************
\
نهر ، بصيت بصـة ، بتنوري على طوووول

************
كاميليا
ربنا يخليكيي ... هتوصلك قريب قوووي

ورمضانك أحلى

سارة درويش يقول...

زمااااااااااااااان كنت بحس اوى بفرحة لما رمضان يجي وكنا بنستنى الرؤية ونهيييييص لما نعرف ان رمضان بكرة .. وكنت وانا صغننة خالص بصوم وممكن اكون ماصليتش فى اليوم دا بس عادى ببقى راضية عن نفسى اوى انا صومت يا بشر النهاردة وكده ههههههه ولا الزينة بتاعة رمضان اللى كنا بنعملها من ورا بابا لأنه شايفها حاجة مالهاش لازمة ونستنى لما يسافر هو وماما ونعلقها ونتهزأ لما يشوفوها واحنا بردوا مبسوطين ههههههه كانت ايام حلوة لكن دلوقتى .. عارفين ان رمضان هيبقى يوم واحد تسعة من يجي شهرين فالرؤية مبقاش ليها اى طعم ..
والتليفزيون ما سابش وقت للفوانيس

يلا كل سنة وانت طيب يا ابراهيم ..
ورمضان سارة بقى اشمعنى انا ههههههههههه

yamen يقول...

شوف يا عم ابراهيم

انا رمضان بالنسبالي لا يعني اشياء كثير

بس انا قبل دخلة رمضان كده باحس خير اللهم اجعله خير انه فيه جو من الالفة والزيارات و الونس

وبتزورني شوية ذكريات عن رمضان و انا صغير

واغاني رمضان اللي احنا بنحبها والمدفع والسحور ومازنجر وسلاحف النينجا..وكده يعني

وبس


وكل سنة وانت طيب علي اي حال

تحياتي

جسر الى الحياة يقول...

بصراحة يا هيما رمضان بالنسبة لى وقفة تامل فى حب الله والقرب منه زيادة ومحاسبة نفسى عن سنة فاتت بحلوها ومرها وبجد بجد رمضان ده جميل كانه بييجى يطهر نفوس كل البشر من تعب السنة كلها ويهدى بال الناس ويقربهم اكتر واكتر من نفسهم ومن ربنا انا باحمد ربنا على نعمة رمضان صدقنى فيه ناس بتحب رمضان عشان العزايم وجو اللمة والحاجات دى لكن انا باحبه للسكينة وهداءة النفس وتنقيتها من شوائب الشهور اللى مرت قبله والحمد لله بعد كل رمضان باحس كانى اتولدت من جديد وربنا يتقبل منا امين ومن كل المسلمين صالح الاعمال والدعاء فى الشهر الجميل ده
دمت بخير ومودة وشكرا على بوستاتك الرمضانية الجميلة والمفرحة زى صاحبها وكل رمضانوانت واسرتك الكريمة بالف خير

Ratings by outbrain