... بصراحة .. زهقت منك ...
آآآه، وما عادش ينفع آآخدك معايا ف أي حتة!
هسيبك هناااااك ...
للزحمة والدوشة
و لـــوحد
مش طووول الوقت بتقطع نفسك حتت وترمي!
وأنا بقول لك مش هيبقى لك غيرك!
يا غبي!
لحد إمتى هتفضل تعمل حساب ليهم!
وهما مابيرفعوش عينهم يبصوا لك!
زهقت منك
وإنتا ارجع هناك
أقف في وسط الميدان
صوّت بأعلى حسِّك ...
أطلب منهم كتييير يتجمعوا تاني حواليك
فكرهم بيك!
كل ده ومش عاوزني أكرهك؟!!
بطلت أدافع عنك تاني
في مظاهرات محدش بيذيعها
ولا بيصورها للرأي العام
بطلت أجيب سيرتك قدامها في كلامي!
ماهو كان ممكن تحس قوي برضه إني بهتم بيك أكتر منها
وساعتها إنتا عارف كان ممكن تعمل إيه
ما إنتا عارفها
مجنونة باللوحات التشكيلية!
وكان سهل قوي، تبص لعين فينا
وتقطع التانية!
يرضيك أمشي كده؟؟
ولا أنا يرضيني !
يبقى خلااااص
ما تفكرش إني همشي معاك تاني
هسيبك لوحديك
وإنتا سيبني لوحدي
يمكن أقدر أجمع اللي باقي لي
وأقف قدام مرايتي من تاني
وأسأل نفسي سؤالي المبهج
"أنا شفت الوش ده فين قبل كده"!
هناك 7 تعليقات:
مش غريبة اوي تبقي حاسس الاحساس اللي غيرك حاسه اوووي
وفي نفس الوقت انت نفسك مش حاسس بيه
!!!
:(
غير معرف:
صدقني معرفك من بدري
وبطل حركاتك النص كم دي ....
على الأقل عشان الدنيا برد
،،،،،،،،،،،
شروق:
شكرًا على فكرة
يا رااااااااااااااجل
طيب ممكن تقول انا مين..؟؟
العفو:)
ولو اني لسه مش فاهمه
ممكن اجاوب اقولك شوفته فين قبل كده ؟؟؟
شوفته في كل ركن في وطنك شوفته وهو مبسوط بنصر في ماتش كورة وهو زعلان اما سابته حبيبته شوفته وهو بيدافع عن حلمه وبرضه وهو مهموم لان حلمه مستحيل
شوفته وللاسف مش هتقدر تسيبه لوحده مهما حذرته وهددته
يا ريتنا نقدر نسيب جزء منا ونمشي بعيييييييييد كنا كلنا ارتاحنا وماشوفناش اي شيء سيئ
تحياتي
غصب عنك هيفضل معاك وتفضل معاه كل لما تشوفه في المرايه هيوجعك لانك مش ايدك تبدله ومهما عاديته وكرهته لازم ترجع تحن له وتصالحه لانه حتة منك يمكن حتة مختلفة لكن لازم تتركب عليك
وفي الاخر لا احد ينفصل عن نفسه
إرسال تعليق