المدونون ..يحصدون جوائـز السـاقية ..للقصـة القصيـرة

ببســـاطــــة شديـــدة .. ومطلـقة ، ولإن الواحد لما بيكسب حد يعرفه بيفرح، وبيحس إن الدنيـا لسـه بخير ....
ولإني (بمكن) بقالي كثيييير ماكتبتش عن أحداث يومية ... أو أحداث يعني حصلت دلوقتي طـازة

ولإنه أيضًا كان حضور المدونين مكثف ، أو أنا شفته كده ، ولإن (أيضًا) اكتشفت إن الديليكون (أو محمد عبد السميع ،،، اسم الشهرة) متابع مسابقـة السـاقية للقصة وعارف مين اللي فاز فيها من 4 سنين (يا ولداه) وقلت فرصة أنم عليه( وكان كسب السنـة اللي فاتت، ولإن أيضًا وأيضًا قابلت الكاتبة الكبيرة طبعًا اللي كتبت عن أهم كتاب نزل ف القرن الحادي والعشرين والمدونة الجميلة إيمان (منسيٌ وحر في خيالـك) ...
وربما أيضًا لإن الناس بتقول تدوين إيه وبتاع إيه ، في مواجهة أهم إصدارات نازلة إن شاااء الله سواء عن دار أكتب بسلسلة ((مدونات مصرية للجيب*))، أو كتاب الثنائي محمد كمال ومصطفى الحسيني (اللي سعادتي مشاركهم فيه ) عندمـا أسمع كلمة مدونــــة ** ....
.
يبقى من هنا تهنئـــة خاااصـة جدًا للأصدقـاء بترتيب التورط والفوز :
(عاوزين صوت عالي ف القراءة ) :
المركز السـابع : ..... (ونزعق شوية ) ... الصحفي والمدون ... الأستأذ (حلوة الأستاذ دي ..تظبيط) محمد هشام عبيه ... صاحب مدونة من نفسي ....................... عن قصته التي أشادت لجنة التحكيم بتميزها (وادوها مركز سابع برضوو): تحت الطلب ...
ألف مبروك يا محمد باشا .... وبجد في انتظـار مجموعتك القصصية التي لا أشك أنها ستكون متميزة .......
.
.
وتخيلوا إننا هننط كام مركز لنصل إلى أهم مركزين وأخطـر اثنين في المسـابقة ، وف الليلة كلللها ............
واللي أنا شخصيًا اعتبرتهم مفاجأة ليا أنا تحديدًا ، وخاصة صاحب المركز الأول، يعني محمد هشام عارفين إنه بياخد جوايز (مش نق يا محمد إنتا عارف ) .............
طب نقول، ولا نشوقكم أكثـر
طيب هوا المركز التاني لكاتب محبوب جـدًا عند شريحة (حلوة شريحة دي يا دكتر) كبييييرة من المهتمين والمتابعين لإصداراته ، وهوا كاتب كتابين (مممممممم أو ثلاثة يعني ) وله مدونة فظيييعة وخطـيرة (في آن معًا ) ولما اتعرفت عليه اكتشفت إنه صغير كنت فاكره أكبر من كده بكثير .............
إنه ، إنه ....... د.ميشيل حنــــــــــــــا ... (هييييييييييييييييييييه) يعني مستنقعات الفحم، يعني عالم كلينيكس ، يعني أجمد ناس، عن قصـة نعيق الغراب ... طبعًا يعني ...
وفي المركز الأول جاء المفاجأة الكبرى ، التي لم أصدقها حتى رأيته بعيني إنه محمود حـافظ ( أو شمعة يعني ) ومحمود ده حكايته حكاية وقصته قصة، أولاً المتهم يبقى صاحب صاحبي خالد باشا عبد القادر، وأنا مكنتش (أصلاً) قريت له حاجة قبل كده، لأ والأكـادة إن قصة معاليه التي أخذ عليها المركز الأول ( ألف مبرووووووووك يا شمعة، ولولولولولوييييييي وكل الحاجات دي ) القصة يا جماعة ...
واسمها ( في فضـل القاتل ) (( وبعيدًا خااااااااالــص عن الإيحاءات السياسية الخطيييرة في القصة يا جماعة)) ف إنها تقع في 20 صفحة!!
يعني افترا ده بالله عليكو ، ولا مش افترا ؟؟؟ ، ومدون أهه ، وهجيب لكم مدونته ... فورًا
الطريف إني إبان (يعني أثناء) البحث عن مدونته تعثرت بـ شمعة أخرى ، بس بنت بقى، وتقريبًا لم تفز في مسابقة الصاوي، وغالبًا مش هوا ، لأنها مش من شـــبراااا
شمعة ..محمود حـافظ بيـــــــــك .......

و طــبعًا منتظرين من الســــادة المدونين الفائزين نشـر قصصهم على مدوناتهم ( ولو على أجزاء، زي ما محمود هيعمل إن شاااء الله، في تصريح خااااص لروزا اليوسف بثته وكالات الأنبـاء) ................
وألف ألف مبرووووووووووك أيها المدونون الأعزاء ........
وبالتالي في انتـــظـار 3 مجموعات قصصية .. لثلاث مدونين على الأقل ، أنا علمت عليكو أهه قدام الناس دي كلللها
ونحن في انتظــــاركـم
إنكم تثبتون لمصـر وللعالم العربي في كل لحظـــــــــــة أن التدوين بخير
وتحيا جمهورية مصر العربية

ـــــــــــــــــــــــــــــــــــــــــــــــــــــــــــــــ
* حفل توقيعهم الخميس × عمر بوك ستور كما تعلمون ... مش عاوزين حد يتأخر 6 تمامًا إن شااء الله
** دول بقى حفل إصدارهم وتوقيعهم الأربع 21 /5 في دار العين ... التفاصيل عند محمد كمال