أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الثلاثاء، 24 يونيو 2008

ســـؤال .....

و ... " هيَّا ..عاملة إيه دلوقت؟؟" ...

البنتُ الملهمةٌ ..جـــدًا ...
التي تغيب
فتحضر ....
ولا تـحضـر فتغيب ....
التي يقتله ... ويقتلها إلـيـه الشوق ...
وهي موجودة دااااائمًا ...
التي ..يعرف غيرها ...
فيحبها أكثر !!
.
.
يود أن يحضن غيابها ...
ويحتاج حضورها ..
ويسأل ...
ماذا تفعل الآن ؟!!!
ما يفعل ... كل شيءٍ ...معكِ .. الآن !!


أأنـــا الآن ...هنا ..هناكِ .. أم هناي ؟!!

أنــــــــــا ... ممممممم أحتــاجكِ .. أكثر !!

سيفكر أنها ربما تتذكره .. فيسعد
وربما تتجاهله .. فيفرح ..
وربما تنساه ...
فلا يقر ..
ولا يستريح !!
* * *
عاملة إيه دلوقت ؟؟؟؟
كويسـة ؟؟
بتاكلي كويس، بتشوفي الشمـس كل يوم وبتشوفك ؟؟؟
بتمسي ع القمر ؟!!

بتبصي على ورق مكتوب لـــــــك ...
طيب
إيه بقى ؟!!


أنا كمان ....
بشوفــــك ف الشمس ...
ف عز حرهــــا ... ف كوباية مية ساقعة ... ثلج ..
(كأننا لوحدنا) ...
بشوفـــك ف القمر ... حتى لو مش شايفة ....
. .
. .
بقراكي ف كتب كثيييييييير ...
ولســـه فيه حروف عندي بتاعتك إنتي بــــــــــــــــــــس

مش بس بحبك
مش بس
.
.
دعـــــــــاء:
أنا محتاج أصلي ...
.... وأشكـــــر ربنـــــــــا ...
يااا أجمـــــل شيء حصل لي ...
من مليون سنـــــــــــة

هناك 48 تعليقًا:

محمد العدوي يقول...

ممتع قوي أنك تتصفح المدونات وانت في الصحرا

اهي دي اخر تجاربي وانا هناك ..

والبركة في اتصالات


الكثر متعة بقى اني اجي المدونة دي بهذه الطريقة .. بس مكنش البوست دا .. كان منير ..

يا سيدي صلي .. وادعي .. و ( دعاء ) ؤك إن شاء الله مستجاب .


:)

زى الهوا يقول...

البوست جميل اوى , يلا ربنا يعينك , وعجبنى اسم المدونة وشرحها كمان , حلو اوى حابب تكون انت , عجبــنى الاسم جدا

... يقول...

هو فيه كدة
‏!‏!?!!

سمعت ان فيه كلام هنا عن منير
بس لقيت بوست جديد
رقيق بجد

خمسة فضفضة يقول...

السلام عليكم ورحمة الله وبركاته

يابختها

:)))))))))

هبة المنصورة يقول...

عاجبنى أوى وصفها بالبنت الملهمة جداً

تصدق ساعات بتكتب تدوينات هنا أحلى بكتير م الحاجات اللى جمعتها ف كتابك

ابو على يقول...

كأنك بتتكلم بلسانى يا ابراهيم
اول مره بجد احس انك بتكتب حاجه بتمس القلب
خليك اكتب ف كده على طول
على طول والنبى

عين ضيقة يقول...

حاسسنى بجد وانا بدعيلكك يهنيكم ببعض على طول؟


قول ان شاء الله

سنووايت يقول...

المفروض نشكر السؤال اللي خلانا نقرأ كلام بالاحساس دا
ربنا يخليها ليك

غير معرف يقول...

كتابتك جميلة جدا يا باشا
انا باتكلم عن كتابك بالمناسبة
عشان انا ماحبيتش الفكرة بتاعت النصوص المشكلة في الحقيقة مع انها جديدة ودة يحسب لها
بس الكتابة هايلة
انما الكتاب مش قوي

تحياتي ليك يا جميل

إبـراهيم ... يقول...

الصديق محمد العدوي:
نورت من الصحرا يا باشـا، وربنا يخليلنا اتصالات، و مرورك الجميــل ...
كل الشكر لك
*************

سماح زي الهوا مرورك أجمـل نورتيني ....

وأكـيـــد ...يـاريت تتكرر :)

ســمـــر احمد يقول...

هادعيلكو انا ..
بوست زى البمبوناية ... عمل اكيد فرق فى نهار مالوش طعم

ريحانة يقول...

جميل اوى

اكبر من كلامى



تسلم:)

قلب الأسد يقول...

أغنية منير تجنن .. أنا بعشق منير .. بحس إنه قريب مني قوي .. حتى اسمي قريب من اسمه (منير و أنا كمان ) ! :)
بخصوص السؤال بقى : انت متأثر بأغنية سؤال لمنير برضه ؟؟ .... لسه فيه حروف؟ ... لسه؟ .. على فكرة الدعاء يجنن .... برضه منير

3D يقول...

بوست جامد يا مان

basma saghir يقول...

انت عسل قوي يا ابراهيم على فكرة

حبيت الكلام المرة دي قوي..لالالا..مش معنى كدة اني مكنتي بحب الكلام اللي قبل كدة مع ان الموضوع اللي فات كان في طوب بيتحدف والمدونة غرقت دم..وانت اصلك اثرت فتنة طائفية بين اللي بيحبوا منير وبين اللي مش قوي معاه

بس فعلا حبيت الكلام المرة دي قوي قوي..وقريته يمكن اكتر من 5 مرات

وشكرا على اغنية مينر..خيال :):)

Doaa Ebrahim Aaql يقول...

ازيك؟ :)

وعامل ايه دلوقت :) ؟!!!

.
.

مؤكد هى مُلهمة ،
وجداً
لأن الحروف كلها ..
كلها ..
مليانه احساس
وكل كلمة جواها كلام كتير بردو
وجميل

.
.

جميل ياهيمو

.
.

وسلام

إبـراهيم ... يقول...

الأستاذة بثينة:
فيه كده ،،، أحيانًا :) ...
أسعدني مرورك، واضح إن تدوينة منير أثارت مشاكل في المدونات المجاورة، عمومًا خير برضـــه
**********
خمسة فضفضة:
وعليكم السلام ورحمة الله وبركاته ..
خمسـة ............. فضفضة :)

*************
هبة: تعرفي بعدما أشكرك يعني، أحب أسألك ده مدح، ولا ذنم؟؟؟ ....
عن الكتاب يعني ، إنتي لسه ما قلتيش رأيك فيه على فكرة

غير معرف يقول...

ياعم ع الرقة والحب والجمال وكوباية المية الساقعة المشبرة في عز يونيو
بجد بجد ربنا يسمع منك دعائك ويجمعك بيها
ايه يابراهين الحلاوة دي بجد؟
النص جميل جدا ورقيق جدا جدا

تسلم يمينك ويخليها ليك..ربة الالهام :)

إبـراهيم ... يقول...

أبوعلي:
إيه ياااا سيدي؟؟؟، أول مـرة إزاي بس:) إنتا اللي جبقى لك فترة ما عتعديش هنا .....
ابقى تعالى ،،، نـــورت
**************
أسمـاء:
تسلمي يا ستي، وربنـا يسعدك ويخليكي ...

**********
سنووايت: ونشكر مرورك .. وإحساسك الجميل

إبـراهيم ... يقول...

مصطفى باشا:
مش عارف الناس بتعلق هنا ع الكتاب ليه، الكتاب ليه مكان يا جماعة ع الفيس بوك :):) .........
على العموم أشكرك جدًا أيها الشاعر الجميل ..... و ..نورت

**************
سمـر: تسلمي يا جميلة، وربنا يتقبل منك يااارب ، ويخللي كل نهاراتك وأيامـك أحلى

إبـراهيم ... يقول...

ريحانة:
مرورك أجمـل .. بالتأكيد

نورتي
*************
منيرة:
مش منيرة برضووو، عشان يبقى اسمك زي اسم منير، ولا اسمه منار ، فتبقي إنتي مناره هيهيهيهي
منوووورة يا ستي ، وشكلك بتتلككي لمنير أصلاً ، أول حاجة (وهيا عاملة إيه دلوقت) دي عمرو، وأغنية عمري ما كنت بحبها ، بس حصــــل

يسلم مرورك
**********
ميوزك لافر: ،،، مرسيي يا مااان

رانيا منصور يقول...

ممممممممم..

انت بتثير مشكلة على فكرة!
الحسد والحئد الطبقي يا ابراهيم
واللي ميعرفش يقول
"ده متهني وبيحب وبتاع"

لمّ تعابينك
وربنا يحفظ جلبك ودعاك :)

نهر الحب يقول...

بتوحشيني
عارفه لما بتوحشيني بيحصل ايه؟؟
بدور عليكي وسط العيون بجنون
و عيون الناس كتيره و بميت لون
لكن عنيكي حلاقيها لو وسط مليون
و بحسد كل اللي شايفينك و انا لأ
و احسد الارض اللي ماشيه عليها
واتمني اكون تراب في الأرض
بحسد الشمس اللي بتدفيكي
و القمر اللي سهران ليكي
و السما اللي بتغطيكي
يا ريتني حته منها تبص عليكي
واول م الاقي عنيكي
قلبي يسبقني اليكي...و يقولك وحشتيني
ولما بسلم عليكي
الاقي روحي بتدوب فيكي
و تقولك... برضه وحشتيني
وحشتيني ومن غير م اتكلم
و مش لازم اتكلم
د و انا شايفك بتعلم احب و بسلم
اه سلمت من نظرة عين
ولا عارف قلبي رايح فين
عارفه
دلوقت انا بحسد نفسي
بحسد عينيه اللي شافتك و ايديه اللي لمستك
واحلفلك اني بعشقك
و اوعدك
اني حدفع عمري عشان اسعدك
بس و حياة ضحكتك
ما تغيبي عني
عشان عنيكي بتوحشني

مش عارفه ملقيتش غير دي لايقه قوي


ربنا يسعدك ويحققلك كل اللي تتمناه يا رب

Rannon يقول...

سيدي يا سدي ;)

ايه الكلام والحركات الجامدة دي ;)

التي ..يعرف غيرها ...
فيحبها أكثر !!

تحياتي بجد

Ihab Omar يقول...

ربنا يسعدك يا ابراهيم انت انسان رائع
و طيب قوي جدا .. ربنا يقدرك و تفضل محافظ علي الطيبة دي علي طول لانها عملة نادرة

حاتم عرفة يقول...

إيه يا عم هاقول إيه دى؟! ماقول اللى أأقوله ده انت غريب قوى !!

قعدت أقرى التعليقات كلها مستنيها ترد عليك.. من منطلق: (يا عيني عليك يا بنى) مالقيتهاش الصراحة.. (ولا يمكن موجودة وماخدتش بالى؟) .. ماظنش ... بما إنك يا ابراهيم(معاك) علطول.. فعندي شك كدة والله أعلم إن دى قصيدة ذاتية .. وانك انفصلت عن نفسك فترة فدورت عليها وقلقت عليها كمان.. ويمكن تكون تمثلتها فى صورة بنت حلوة في أفلامك مثلا ..
وانت عامل إيه؟ و(معاك) عامل إيه ؟؟ يعنى انت معاك دلوقي ؟ ماشي يا عم.. ربنا يسهلووووووو

Rana Omar يقول...

أنا مكنتش فاكرة الحالة اللي انت فيها وصلت للدرجة دي .. أنت لازم تروح للدكتور فورا أو للبنت الملهمة تعالجك أحسن أنت كده هتعدي أصحابك واحنا مش عاوزين والنبي عدوى من النوع ده اليومين دول

Unknown يقول...

إبراهيم ..
إيه الحنان دة ؟؟ :)
ايه المشاعر الجميلة دي ؟
أدام الله عليك النعمة :)

آيــة يقول...

لماذا أصل متأخرة دائما ؟؟؟
اقرأ في كل مرة بوست ثم أغيب و أعود لأعلق فأجد غيره فأقرأه و أغيب و أعود لأعلق ... فأجد غيره مرة أخرى ....

المهم الحق اقول هنا ...
اني لو كنت مكانك ..
لما سألت هذا السؤال هنا ...
و لوجهته لها مباشرة ...


تحياتي :)

إبـراهيم ... يقول...

بيسووو: ...طبعًا نورتي، وعلى فكرة حلو قوووي إنك تقريه أكثر من مرة، جده أكيد معناه إنه عجبك ....

و أكيد منير حلو على طووول
يسلم لي مرورك
******************

دووودااا البرنسيسااا :
أنا :) تمام ، الحمد لله ....
مرورك ورد أكييييد يا دعـاء، وبساتين من التيوليب والفل والياسمين ....

هما كل دعاء كده ولا إيه ؟؟؟؟
..
.
حقيقي نورتي قوووي

بوركتِ ...دااائمًا
&*<**********

صديقتي العزيزة ملكة :
ممممم ، مش هقول لك هيا أجمل، والكلام ده، هقول لك إدعي لنــــا، وهقول ..
مرورك أجمـــل أيضًا ... على فكرة كنت منتظره .،،،،، كماااااااااان
تسلمي لي

Smr يقول...

ازيك ياابراهيم
:)
اكيد عارف ان طريقتك مميزة
وكلامك جذاب
:)
فقلت اسلم..بقالك فترة مابتظهرش
ربنا يوفقك دايما

إبـراهيم ... يقول...

الجميلة داائمًا رانيا بنت منصور:
نعمل إيه بس إذا كان الصب تفضحه حروف!! ، عمومًا يكفيني دعاءك أيتها النقيــة ....
ربنا يسعدنـا وإياكي
و دمتِ لي
**********
نهر الحب: حقيقي مش عارجف أقول لك إيه
تسلم إيـدك، ويسلم قلبـك ....

Camellia Hussein يقول...

ربنا يباركلكم في اللي بينكم يارب
ويجعلها من نصيبك يا ابراهيم يابن ام ابراهيم

Soooo يقول...

عارف يابراهيم
احسن حاجه في مواضيعك انها قريبه من الواحد
اه والله

يعني انا حسيتني انا اللي قايل اخر بؤين
واخد بالك من كلمة بؤين
تحس انك بتكلم كهربائي سيلسيون

ياسيدي ربنا يسعدك ويكرمك ويوفقك ويبسطك ويرضيك دنيا واخره



سلامووووووووووز

ebtedy team يقول...

ماشي ياعم اكتب اللي نفسك فيه وبالطريقة اللي تعجبك
بس كل طريقة وليها شيخ زي مابيقولوا
المهم تكون حاسس اللي بتكتبه
عشان ساعات بنكتب حاجات مش حاسينها وبتوجعنا بعد كده
وابقى سلم عليها
ميس فاطي

غني يابهيه يقول...

جهازى بايظ يا هيما وسلملى على الكل
وان شاء الله
قريب نتواصل
بس انا قاعد بره
سو سورى

تحيات بهيه

إبـراهيم ... يقول...

رنـا ....
ياااه، إنتي لسـه هنا، إيه اللخبطة اللي عاملاها ف مدونتك دي ، قعدت أقول هيا ولا مش هيًّا ...
تحياتي يا جميـــل .

********

إيهاب باشا: منور يااا جميل، فينك من مدة ما عديتش ، طب أنا بنسى، تنسى إنتا كمان ؟؟؟ يصح كده يعني :)

نورت
*****************

حاتم: جهوا إنتا مش مصمم يا ابني برضوو، إيه اللي جابك هنا ؟؟؟؟
أنا يعني ألحيت عليك، وكده ،،، طاب يا سيدي حقك عليا
ومنك لله ، برضووو مش هنسهالك ، أنا ممكن أمشي من رشدي لحد الأنفوشي بمزاجي ، بس ياللا ، هوا اليوم كان حلو برضووو

سلم لي ع الإقبال

إبـراهيم ... يقول...

رنا عمر:
إزيييك يا جمييل، نورتي المدونات كلللها ، مممم هيا مش "حالة" بـس طبعًا، دي حياااة .... ودعواتــك بقىج

*****************
شيماء علي ...
نورتي، ليا عندك كده اثنين قهوة، وواحد كبشتينو ......

ربنا يسعدك إنتي كمان
*************
آية :
إنتي لسه هنا ؟؟؟؟ لسه بتيجي ؟؟ لسـه موجودة ؟؟؟
طب ليه ؟؟؟؟
عادي يعني ... بغلــــس
طيب، سألتهولها أصلاً

هبه الاسكندرانيه يقول...

يارب اجعله فى "دعائه " نصيب

Dr. Ibrahim يقول...

إيه يا عم هيما

الرومانسية دى


د/هيما

غير معرف يقول...

عارف أنا عاملة ايه دلوقت؟أنا أسعد انسانة فى العالم بعد ما قريت الكلام ده واللى ماعرفش وصلت له ازاى مع ان ماحدش قال لى على البلوج لكن يظهر وصلت له باحساسى..كلامك كأنه طالع من قلبى أنا..وانت عامل ايه دلوقت؟فعلا يا بختها..أكيد انت كمان وحشتها أوى

إبـراهيم ... يقول...

سمر: ربنا يكرمك، ويخليكي ...
معلش اليومين دول شوية لخبطــة ، معتبرة ، بــس حلوة الحمد لله

نورتي ... وياريت ما تقطعيش النور
***************

كاميلا: ..تسلمي يا جاميلا، ويجمعك ياااارب مع من تحبين قريييبًا قوووي ، عاوزين نفرح بجى :)
فيــنــك صحيح ؟؟

*************
ســوووو باشا:
ربنا يخليكي ياأحمد ويسعدك ويرضيك إنتا كمااان ....
بس إشمعنى كهربائي :)
تسلم لي يا غاااالي

سلاااامووون

Samar Ali يقول...

Beautiful...Just brautiful!

مها يقول...

أجمل ما فى الوجود إنك لما تحب تقول..
لكن الأجمل إنك لما تقول .. كل كلمة تتحس صح .. تمام زى احساسك بيها .. وده واضح جداااااااااا فى كل حرف ..
ربنا يسعدك بيها ويسعدها بيك يا ابراهيم..

حمامة يقول...

دعـــــــــاء:
أنا محتاج أصلي ...
.... وأشكـــــر ربنـــــــــا ...
يااا أجمـــــل شيء حصل لي ...
من مليون سنـــــــــــة



جميل .. جداً

:)

جسر الى الحياة يقول...

ربنا يسعدك يا ابراهيم احيانا الحب بيبقى احلى حاجة حصلت لنا فى حياتنا بس خد بالك مهم قوى مراعاة الوافد الجديد ده لانه يتنفس وياكل ويشرب مهم ان نرعاه يا ابراهيم لاننا لو اهملناه او قصرنا فى رعايته قد يضيع منا ولا نلقاه مهما بحثنا عنه
وربنا يديم عليك نعمة الحب انت ومن تحبهم
دمت بسعادة طول الحياة

غير معرف يقول...

ربنا يسعدك ياهيمو و يحقق لك اللي بتتمناه و انت بصحة و راحة بال والله كلنا بنصلى و ندعي لك لدرجة ان أحنا حبينا الدعــــــــــاء
أختك سارة

غير معرف يقول...

فى غمضة عين عشقت هواك وحبيتك لا قولت لفين واخدنى معاك ولا نسيتك
فى غمضة عين هواك عشقتة وفى ثانية معاك احلوت الدنيا فى غمضة عين
فى غمضةعين عشقت هواك وحبيتك لا قولت لفين واخدنى معاك ولا نسيتك
فى حضن ايديك بحس براحة جوايا امانة عليك تكمل دنيتى معايا
وعينى عليك ياريت جنبك تخلينى اعيش ايامى وسنينى فى حضن ايديك......
اختك سارة

Ratings by outbrain