أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الأربعاء، 12 أكتوبر 2011

رغاوي النسكافيه .. الدافئة :)

مين بقى أول واحد قلِّب السكر مع النسكافيه .. وعمل "رغوة"؟!!

وإزاااي؟ وليه ؟؟

أكيد الموضوع ده ليه أسطورة خااصة

أكيد فيه وراه حكاية غامضة

.

ممكن حد يبص للموضوع باستخفاف، ده مجرد "وش"

بس الوش ده مبذول عشانه مجهود كبير .. و "دقيق"

يعني لو كترت المية شوية، الوش ضااع

ولو قللتها مش هتعرف تقلّب أصلاً

لازم نسبة معقولة من المية مع السكر والنسكافيه، وتقلب كويس، تعمل لك أحلى رغوة

.

طب ممكن نعمل رغوة من حاجة تانية؟

ليه مفيش شاي ب وش مثلاً ؟؟؟

ليه القهوة الوش بتاعها أسهل من كده بكتيير، وإن كان يتطلب برضو قدر من التركيز مع تسخين القهوة، عشان تلحقها قبل ما تغلي، وتفووور فـ يضيع الـ وش!

.

كل مرة أقلب فيها السكر مع النيسكافيه أبقى مستغرب فعلاً

.

مين أول واحد عمل كده؟

وليه ؟؟؟


هناك 7 تعليقات:

candy يقول...

أول واحد عمل كدة ..
كان صاحى متضايق وحابس دموعه
عيط تحت الحنفية كأنه بيغسل وشه
وبيضحك بالمرة على نفسه
وبعدين رجع لقى البراد لسة ماغليش
راح حاطط شوية مية صغيرين فى المج
وطلع كل عصبيته فى الحركة بسرعة ..
بسرعة بسرعة وبسرعة ،
وكل مشاعره بتلف دواااااااامة مع حركة إيديه
وبيخرس مشاعره اللى صوت المعلقة بيغطى على صوتها ..
سمع صوت المية بينده على استحياه يقوله أنا بغلى ..
رد وهو بيتنهد .. وأنا كمان !
ماكنش عارف المية على وشه دى نازلة من عينه ولا متبخرة على وشه من البراد وهو بيصب ..
بس من وسط الضباب اللى فى عينه شاف وش قدامه بيضحك !!!!!!!!
مسح عينيه بكم بجامته وهو مندهش ..
بس لقى وش نسكافيه بيضحكله !!

http://yorkcaravansite.co.uk/images/coffee_cup_smile.jpg

إبـراهيم ... يقول...

والله إنتي راااايقة يا كاندي

حلوة الحكاية دي ... تصلح كـ بداية :)

تسلمي

حسن ارابيسك يقول...

نسكافيه....!؟

رغاوي العرقسوس ... البيضاء
ياترى ليه العرقسوس بيعمل رغوة كده بيضة و كبيرة؟
ياترى حكاية الرغوة البيضة الكبيرة دي ليها سبب مرتبط بلون العرقسوس الأسود.؟
وياترى ليه رغوة العرقسوس البيضة الكبيرة دي بتكون أضعاف أضعاف حجم رغوة كباية العرقسوس اللي بتتعمل في البيت.؟
لذلك هل للمكان علاقة ( الشارع أو البيت ) في حجم تلك الرغوة ..؟
ولرغوة العرقسوس البيضاء الكبيرة وشوشة فهل سمعتها من قبل.؟ وهل تعرف سببها؟
ياااه قد ايه نفسي دلوقتي ف كباية عرقسوس مثلجة تعلوها رغوة كبيرة بيضاء تصاحبها وشوشاتها الجميلة وهي تنفث في وجهي وأنا أهم بشرب العرقسوس
معلش أعذرني أصلي معرفش غير العرقسوس والخروب والتمر هندي
لذلك أتمنى عليك ألا تكتب المرة القادمة عن الشاي المثلج
الأخ العزيز إبراهيم
تحياتي
حسن أرابيسك

الجنوبى يقول...

اعتقد ان اول واحد عمل كده كان مضايق جدا فعلا


موضوع وجودى لذيذ


تحياتى

Carol يقول...

الصراحة أنا بعمل النسكافيه من غير وش :)
لسه هقلب نص ساعة عشان أشرب الوش و بعدين الوش ده هوا يعني هقلب عشان أشرب هوا :)
لا يا عم مش شاربة شكرا
عندك كوكا؟؟؟ :)

إبـراهيم ... يقول...

أرابيسك بااشاا
حلو التفكير في العرقوسوس

بس اسمح لي العرقسوس رغوته كدابه، وملهاش قيمة، رغوة النيسكافيه بتبذل فيها مجهود :))

وعلى فكرة يا كارول مش نص ساعة ولا حاجة :)
....
الجنوبي
ما أعتقدش برضووو

حسن ارابيسك يقول...

أبوخليل

رغوة العرقسوس مش كدابة كما إدعيت انت
وان رغوة النسكافيه لها قيمة عشان بيتبذل فيها مجهود

لا أسمح لي أصحح فكرتك عن رغوة العرقسوس

رغوة العرقسوس أصيلة لأنها طبيعية
أما رغوة التسكافيه هي اللي كدابة عشان مصطنعة
فمن أمتى كان الشيئ المصطنع يتفوق على الشئ الطبيعي.!
تحياتي يا أبوخليل

حسن ارابيسك

Ratings by outbrain