ســكرتيري ..الخــاااص

ده الموضوع رقم 51 ف حياتي التدوينية :

تعلن مدونة (أناوأنا) (م. م. م)* عن حاجتها الشديييــدة لسكرتير خااااص جدًا ، ومتميز جدًا .. ، وذلك رغبة منها ، ومنا على السواء في تقليل عدد العاطلين عن العمل في مصـر والدول العربية ! .
أنا بقى حاولت أدور على صيغ عديدة لقيت حاجة زي دي : ه(( هل تريد العمل من منزلك ؟
مطلوب للعمل من المنزل عبر الانترنت بعائد مناسب وليس بربح تصاعدي بل بما تحدده انت من ساعات العمل ..... فقط تحتاج لجهاز كمبيوتر ودراية بالتعامل مع الانترنت والوورد )) ... هـ

.

المترددون على مدونتي ( ذلك المكان الغريب الذي أمارس فيه فوضى العبث بحرية !!) يلاحظون أني ـ يمكن ـ المدون الوحيد ـ الذي أعرفه على الأقل ـ يحتار في كتابة مواضيعه كما يحتار جحا في عد غنمه !! ( تشبيه فزييع) ... وعليه كتبت قبل كده ( لو تفتكروا) >> جــوايا كلاااام >>> و أفكار مؤجلة ... أشرت فيهما إلى فكـرة إن مش ممكن يعني ، كل ما ابقى عاوز أكتب ما اكتبش !!! ، وأعلن من هنا إني زهقت مني !! ( وده طبيعي ) .. ولذلك قررت الاستعانة بالخبراااء ...

وأخيرًا وجدتها (بالمناسبـة الفكـرة دي أصلاً بقى لها شهرين ، يعني كان فاضل لها سبع شهور وتخرج !!! ) : هـ

.
عادي يعني، كأي مواطن (شريف) .. يحق لي طلب "سكرتير" خاص، مش عاوز سواق، ولا سفرجي ولا فراش ، ولا أي حـد تاني (م الأول أهه ) ... عاوز سكرتير ..
طيب ، المهام الموكولة بهذا السكرتير ( يعني عاوزه يعمل إيه م الآخـر ) : هـ

.
ـ يحضر الندوات اللي أنا زهقت منها ، ومايزهقش .. ويكتب لي تقرير مفصل كأني أنا اللي حضرتها ، ويدخله مباااشرة على مخي ( فااااضي أنا أقعد أقرا تقارير؟؟ ) .... يتابع لي بقى مغامير (ويشارك معاهم بفعالية نقد، وكتابة، وتعليق ، وبلااااوي ) ، ومشاهير ، أدباء ومفكرين ، عااااوزه يبقى صااايع ندوات ، كل شوية ف حتة ، وكل يوم ف مكان ، لا يكل ولا يمل (وكله بحسااابه يا سيدي ) . ه

.
ــ قرااءة عدد من الكتب والروايات ( هبقى أقول له عليهم) باستمتاع وتفرغ تاامين ، وبرضو تلخيص أفكار هذه الكتب ووضعها مباشرة في دماغ سعادتي !! (مش سكرتيري بقى ، يتصرف !!) ه

.
ــ العمل على (حلوة العمل على دي ) مساعدتي في كتابة ( نقول كتابة وخلااص) أي فكـرة (ولو صغنونة) تطرأ في دماغي في أي لحظـة من لحظات الحياة ( حتى لو ف الحلم ! ) ... وكتابتها بطريقة ترضيني (طبعًا) وتنسيقها جيدًا ، ووضع تعليقات عليها ( بسررررعة ) عشان الموضوع اللي بعده ، مش فاضيين يا جمـاعة . . . ه

.
ــ ده طبعًا غير مهام السكرتارية الأخرى المعروفة من ( الرد على المكالمات) ( قال يعني من كثرهم ) ، والرسائل (كذلك) والاتصال بالأصدقاء ( بصوتي ، وطريقتي ، ما يغيرش كلمة ) ... و الاطمئنان على الأهل ( أيوة ، ولو فيه مشوار إيمان عاوزاني أروحه يروح بدالي ) ... بس ما يحبليش ( لأني مش ناااقـص ) ولا يكره لي (لأني مش عاوز !!!) ..... ه

.
......................
هبقى أكمل بعدين :) مااااشي

ــــــــــــــــــــــــــــــــــــــــــ

* م.م.م : أكيد يعني مدونة مساهمة مصـرية :)، ولا إيه ؟؟