أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

الأحد، 4 مايو 2008

هنفتـــرض .. إنــك ..حلمت ..

صحيت م النوم، وإنتا كنت بتحلم إنك سافرت اليابان !!، الأحلام ليها منطقها الخاص...

طبعًا هتقعد تفتكر ف التفاصيل، مش هتفتكر إلا حاجة واحدة، إنك سافرت اليابان!!

فجأة يبقى" حلمك" إنك تسافر اليابان.. فعلاً !!

هتعمل إيه ؟؟

هتبص حواليك، وتفكر شوية، تبص على وشك ف المراية، تتخيل فجأة إن ملامحك ممكن تجيب على"ياباني" ، تضحك للإفيه اللي هتقوله لنفسك( يا باني ..يا هادم) وتوقن إنهم مش هيفهموه ف اليابان !!

هتفكر شوية، إشمعنى اليابان؟؟ مع يقين غريب وملازم إنك خلااااص لااازم تسافر، خلاص بقى حلمك، ومنتهى أملك تسافر اليابان، أكيد فيه سر مجهول هناك، ما إحنا دايمًا محاطين بالمجهول ده، وبندور عليه ف كل حاجة، أوقات كثيير بنحسنا عايشين لغاية غامضة...

هتحس إنك بقيت عاوز تروح اليابان أكثر ...

هتفتح الكمبيوتر وتعمل سيرش ع اليابان، ممممممم ، إنتا عارف ملامح الوجوه اليابانية، وعارف مقدمًا الثورة العلمية التي يبدو أنه لا علاقة لك بها هناك !!، ساعتها هتقفز الصين على رأسك (لو الجو على شرق أدنى)، وهتهز راسك تحركها ..ف تقع !

وترجع لليابان ...
هتتساءل إشمعنى اليابان بقى ؟؟؟ وبما إنها بقت حلمك، فإنتا لاااازم تعمل اللازم ل"تحقيق" الحلم ...
هتعرف إنها بلد" تهزها الزلازل وهي تهز العالم"، وهتبدأ تشوف ممكن يبقى فيه إيه "فرص عمل" هناك؟؟ ماهو إنتا أكييد مش هتبقى مسافر سياحة...

هتبدأ تسأل أصحابك عن السفر لليابان بطرق مختلفة، وستفاجؤك إجابة واحدة فقط
(طب ما تسـافـر ؟):
ـ ابقى اتغطى كويس قبل ما تنام .

ـ اليابان ؟؟ ده على أساس يستفيدوا بخبرتك العلمية الفظيعة ؟؟

ـ عشان يعني التكنولوجيا وكده ؟؟

ـ إنتا لازم كنت بتقرا قصايد "هايكو" اليومين دول

لاشعوريًا يقودك الأمر إلى الأدب الياباني!!

تفكر في هذا كله، وتفكر في أنه ربما كانت مجرد إشارة حلمية لمجال آخر/ فكرة أخرى !!

ولكنك لن تصرف فكرة السفر عن ذهنك، ستبحث في الدليل عن سفارة اليابان، وتحاول أن تتواصل معهم من خلال إنجليزيتك، التي تتذكر أنها مكسرة!! ...

لن تحاول أن"تفسر" الحلم لإنك لا تؤمن بهذه الأشياء ،،، أصلاً !!

سيقولون لك (اليابان ف الحلم ..نصـرة !!)

أصبح حلمك أن تسافر لليابان، وهم يقولون لك : ومالها أمريكا؟!!

ولكنك لم تسافر أمريكا في الحلم!!، ولا تؤمن بحلم أمريكي !!

ستفكر أن عقلك الباطن تؤثر فيه التكنولوجيا الحديثة!!، ولكنك لم تتذكر أبدًا أن"الكمبيوتر" اختراع ياباني؟!!، بل حتى إن امبراطور الويندوز، وصاحب الثورة كلها أمريكي شاب، اسمه"بيل جيتس"!!

......

ستوقن أن "اليابان" المكان حلمًا ومعجزة هي الحل، ستسأل عمن سافر هناك، وتفكر أكثر جدية في الشعب الياباني الذي تظل تعتقد دائمًا أنهم يتشابهون !!وتتساءل كيف يميزون بعضهم؟!! ...

أصبح السفر إلى اليابان حلمك !!

صباح خميس

1/5/2008

بوتري كافية

هناك 21 تعليقًا:

إبـراهيم ... يقول...

مبدئيًا بس عشان محدش يفتكر ده حصل فعلاً، أو ليه علاقة بأي شكل من الأشكال بالواقع، فده ماحصلـش !!... الحكاية كلها محض افتراض !!
.
.
ومش عارف قدرت أوصل الإحساس بسيطرة الحلم بالشكل ده، ولا لأ ! ....
بس ممكن نكتب تدوينة تانية هنا عن الحلم

مش كده ولا إيه :)
أهي تبقى تدوينة متدارية
تحياتي لجميع المارين، قصدًا، وقدرًا، وبالخطــأ

ريحانة يقول...

اه فعلا فى احلام كده بتستغرقنا تفاصيلها
لدرجة انك بتقوم وانت همك الوحيد تحققها

فى احساس جميل وصلى من بين سطور التدوينة

اقولك راءعة كالعادة

تسلم الموهبة

Camellia Hussein يقول...

وبوتري كافيه ده حصل ولا ماحصلش؟؟؟؟
ايه الثرا المفاجئ ده
انت بعت كل نسخ الكتاب ولا ايه؟؟؟؟

غير معرف يقول...

احم..
ايه بوتري كافيه ده صحيح؟؟
لولا ان كاميليا سبقتني كنت نعتك بالبرجوازي الذي يمتلك أدوات رأس المال
المهم
عندك ألف حق في حكاية ان امريكا متنفعش تبقى حلم،الحلم الأمريكي ده أكبر وهم شعوب العالم كلها عايشاه
بيتهيألي اليابان جت في البال لأنها مرتبطة بالشرق بطريقة او اخرى
على الرغم من انهم هناك كمان بقم مشوهين، مفيش احساس بالاصالة لكن لسة فيه تاتشات منها برضو
بس تصدق؟
حلوة جدا حكاية ان حلم يؤدي إلى الأدب والبحث عن نوع كامل من النصوص لأمة معينة، حسستني ان انا احلامي تافهههههههة يمكن عشان كدة مبفتكرش منها حاجة لما بصحى؟؟:)

منور سعادتك، اتفضل سوشي ولا حاجة ده حتى ميصحش يعني :))

ست الحسن يقول...

هنفترض إنك صحيت م النوم
لقيت نفسك في اليابان بقالك 10 سنين
وانت كما أنت لم تتغير
تحاول ان تتذكر
لماذا أنت هنا من الأساس


التدوينة حلوة
وحلو إني كل ما اجي ألاقي حاجة جديدة

إبـراهيم ... يقول...

ريحـانة ..:
منووورة، إنما فيه أحلام لا نعرف لها تفصيلاً، مش عارف ليه، مرة هكتب عن ده ...
كويس إن اللي وصلك جميـل ...
يسلم مرورك ...

***********
أهلاً يا كاميليا
حمد لله ع السلااامة الأول صحيح
يعني إنتي ماشفتيش ف التدوينة غير بوتري كافيه ؟؟؟
عمومًا يا ستي إطمني ، كنت معزوم، والكتاب لسـه ملقح مااتباعـش
نورتي ... أيضًا

The Alien يقول...

نام وإحلم تاني
هو دا الحل الوحيد

تحياتي

إيما يقول...

بس برضو اشمعني اليابان!!
فكرة حلوة والله بس ممكن أفكر الأول عايزة أروح فين وبعدين أحلم بيه :)
تحياتي

mostafa rayan يقول...

اتقد ان دة مش مقتصر بس علي اليابان
دة علي كل مكان حتي لوكان انك تودي العيال وامهم يومين رأس البر

Empress appy يقول...

بس مش عاوزة اليابان
ههههههههه
هى فعلا حقيقه وقدرت توصل الفكرة انا لما بسافر بكون عامله كده زى ما سافرت تركيا مثلا جالى هوس بيها وماليزيا والمغرب عملت كل ده هههههههه

هدى يقول...

ما هو اصلا فيه فرق بين الحلم اللي بنحلمه واحنا نايمين والحلم اللي بنحلمه واحنا صاحيين

يعني انا مثلا كنت زمان بفكر اسافر فينسيا وبعدين الحلم مشي ومش فاكرة مشي امتى

تقريبا بحب السفر بس لفكرة السفر في حد ذاتها

اليابان حلوة على فكرة

سافر

...

إبـراهيم ... يقول...

ملكة:
استغفر الله، يا بنتي دي مرة، ولا مرتين، كان من نصيبهم إن بالبتاعة دي تتكتب فيه !!
فكرة التدوينة كلها عن الحلم اللي يقدر يتحول لهاجس، ماينيمش صاحبه جالليل، طووول الوقت بنحلم بأحلام تافهة، وأوقات عبيطة، وأنا أصلاً قليل قوووي لمـا أفكر ف حلم، وبالمناسبة أحب أكد إني ماحلمتش بده، بس افترضته
نورتي ، ولأ طبعًا ده واجب علينـــا
********************
ست الحسن :
نورتيني وفاجئتييني، كنتش أعرف إنك ممن يتابعون بصمت ودأب !
أتمنى يكون الكتـاب عجبك بالمناسبة

خاااالـــص تحياتي
* * *
مستر بشوي :
شكلك نسيت :
بس قالو له : أول خطوة لتحقيق حلمك، قوم من نومك :)
تحياتي

ومنتظـر رأيك لــســـه

بنوتة من وسط البلد يقول...

هى المشكلة ما بقتش انك تتغطى كويس قبل ما تنام .. النظرية فى ان الواحد ما ياكلش اكله تقيلة قبل ما ينام


وانا راودنى نفس الحلم .. بس ساعتها طيارتى كانت طالعةعلى ايطاليا


والحلم ده لسه مستمر معايا .. بس البحث والفحص والتمحيص ده خلصته من بدرى .. لانى فى الفيلم ده من 4 سنين تقريبا :)

عجبتنى الاشارة للحلم الامريكي .. تسلم الايادي

تحياتى

نهر الحب يقول...

طيب احلم تسافر حته حلوه كده......بلاش اقول مثال
عشان متفهمنيش غلط

اقول حاجه بقه
تخيل اني ديما بقول ان الناس اليابانيين كلهم شبه بعض
ومش عارفه بيعرفوا بعض اذاي؟؟

علي فكره عيونهم ....صغنتوتة قوي

غير معرف يقول...

كده يا ابراهييييييييم ، مش كنت تسيبلنا فرصة نتريق شوية ،
وأنا اللي قعدت اتخيلك بتدور على سفارة اليابان وعمال تعمل سيرش بقى وعمال بتقرا هايكو ...
لكن انت خليتنى افتكر امتى سيطر على حلم وسعيت لتحقيقه ... بس الحمدلله ماتحققش..قصدي ماحققتوش( تقدر تقول كسّلت)...
بس تعرف ..أنا يمكن حلمت زي صاحبك لكن(من غير ما أنام) انى اسافر بلد ما( مش امريكا)وبعدين هو مش لازم اليابان عشان يتقال اشمعنى ، هو اي بلد غير امريكا تقريبا هتلاقي حد يقولك اشمعنى ،المهم ان كتير اوى بنحلم بالسفر لبلد معينة وبتكون الاسباب مش واضحة أو مش مقنعة للاخرين( يعنى ممكن ترتبط ببلد من خلال قراءتك لأدبها) أو حتى شفت مسلسل تليفزيوني من البلد دى ،عشان كده مش غريب ان ممكن حد يتعلق ببلد عشان شاف حلم وهو نايم، بس في الاخر بتسيبك من كل حاجة وتقعد تعمل سيرش وتدور ع السفارة ... وتدخل تنام

متهيألي عرفت انا مين...
نـضـال..

ابو على يقول...

سؤالاى الخاص لك وارجو الرد الصريح والوضيح
حلوه الوضيح دى:d
لو روحت اليابان تتفكر اساامه ابن لادن هايسيبك ف حالك
انا لو منك اعمل مشروع ف بلدى احسن وأكل منه وأكل غيرى ولا انى اروح اليبان وارجع بعربيه دايو

خليك هنا احسن بلدك محتجاك
احلم هنا
ولا انت يأست من الحلم هنا

إبـراهيم ... يقول...

إيمـا:
كويس قوووي إن الفكرة وصلتك، وكده زي ما هيا .... تفتكري ممكن نروح فين ؟؟
وهل هنقدر نروح لما نكون عاوزين ؟؟


تحياتي ... وفي انتظارك طبعًا
***************
مصطفى :
إزيك الأول، دي أول تشريفة ليك هنا ؟؟ إيه بقى رأس البر، والعيال دول .؟؟؟
عمومًا ربمـــا ...
من يدري ؟

**************
آآآبي :
منوراني، ما تبقيش تطولي الغيبة الله يخليكي، وهنيالك سفرياتك يا ستي، من قدكوا يا عم :)
الفكرة برضو مش ف اليابان في حد ذاتها ، أعتقد أن ذلك واضح

إبـراهيم ... يقول...

هدى : على اعتبار إني بسأل يا جماعجة إيه رأيكم ف اليابان ؟؟؟؟
برضو مش فكرتي الفرق بين حلم النوم وحلم اليقظة، فكرتي سيطرة الحلم بتاع النوم على واقع الواحد ، وتحويله لهاجس حقيقي عاوز يحققه !!!
نورتي على كـل حال
ماتغيبيش

**************

ياااااااااه بنوتة من وسط البلد عندي يا مرحبًا يا مرحبًا ، متشكرين يا ستي ع التريقة، أنا بتغطى على فكرة

بس مافهمتش إنتي عاوزة تقولي إنك بتدوني من إيطاليا يعني ؟؟؟؟

وعمومًا يسلم مرورك

break يقول...

لولا انك قلت انه محصلش كنت قلت انه حصل
شايف الجملة الفظيعة دى

:D

فعلا الاحلام كتير بتسيطر على الواحد وتبئا همه يحققها


بس محصلتش معايا شخصيا(حتى الان)

Rannon يقول...

لو حلمت أزور اليابان هصحى من النوم اسمي نفسي أوشين وآخد شنطتي بتاعة السفر الطويييييييييلة أخت اللي بيمرو بيهم علينا في البيت...(اللي هلبسها بكرة :S) وأشيلها على ضهري وأكمل طريقي بقى...:))
الا صحيح هما بيفرقوا بين بعض إزاي؟ أصلهم شبه بعض قوي :)

غير معرف يقول...

انا حلمت اني رحت رحله عاليابان بعد كم يوم نسيت الحلم و بعد ما مر اكتر من شهر فجأه حبيت اتعلم الياباني و هلأ تذكرت المنام انصدمت حسيت في شي غلط

Ratings by outbrain