أنت

في حياتي كلها أتوقع أن تكوني بذرة الضوء التي لا أدري كيف تنمو بداخلي لتنير اليوم، لكن أثرك أعجز ـ لازلت ـ عن التعبير عنه **** ، ولكنكِ تفرحين، وها أسنـانك تظهر .. ف تبتسمين :) وتطلع الشمس، هذه المرة ليس عنِّي بل عن جميل مرورك كلما حدث ... أمــــــــانـــــة عليكو أي حد يعدِّي هنا يترك تعليقًا .. ليستمر النور :)

السبت، 1 مايو 2010

التدوينة الثانية ... في أقل من يوم

طبعًا ما إن أعلنت عن عدم مشاركتي في الحملة حتى انهالت علي العروض "تترى" (وتترى دي بالنحوي يعني يأتون تباعًا) كل واحد يعبر عن رأيه ويفرض نفسه، أو يعبر عن نفسه ويفرض رأيه، ويقترحون بقى اللي يقول لك اكتب ع الفيس بوك من الموبايل كل يوم، ولما تبقى ف سايبر إبقى نزلها ع المدونة، وآلاف الناس اللي اقترحت أكتب في الساعة اللي منكن أقعدها ف أي سايبر، وناس تانية (ودول الأغلبية) اقترحت وأشادت أكتر بفكرة إني أترك الباسوورد مع حد وأخليه يكتب لي بما إن فيه ناس فعلاً متعاونة يا جماعة، وعندها استعداد من قلبها تكتب الكلام اللي بقوله وتنشره بالنيابة عني في مدونتي!!


وكأن ما أكتبه درر أو ما ألقيه في المدونة مجوهرات وألماس، أو أن الناس يتابعون المدونة بشكل يومي أو دوري، أصلاً وصلنـا للحالة (جيم) منذ فترة طويلة جدًا، وآمنا بالله وملائكته وكتبه ورسله أن أحدًا لا يمر في هذه المدونة ولا غيرها إلا إذا قمنا باستثارته بشكل أو بآخر وذلك أمر لا يتم ـ رحمكم الله ـ إلا من خلال متابعة دورية وعميقة للمدونات الصديقة وغير الصديقة، بل إن عددًا لا بأس به من المتابعين، وما قد أطلق عليهم "أصدقاء المدونة" قد اختفوا في ظروف أشد غموضًا من أن تذكر! ....

فكرت فعلاً في كل ذلك، وقلت أن رعاة الحملة قد يشفقون على أمري، ولن يكون عسيرًا عليهم أن يوفروا لي نحو 20 جنيه ثمن تدوينات الأيام الـ30 (هدفع التلت مش مشكلة كنوع من المشاركة ) ... ولكن الأهم من هذا كله (في الحقيقة يعني) ماذا سنكتب؟؟؟

.

ماذا سيكتب ذلك الذي لن يكتب لنفسه، يكتب للآخرين، ... يقدم لهم تجارب الحياة يعني، وما إلى ذلك!!


الحقيقة أني حاولت أن أتلصص على المدونات القريبة والزميلة والشقيقة، ربما أرى فيها بعضًا مما يوحي بالكتابة أو يحفز عليها، أملاً في الوصول إلى تدوينة أفضل، لا سيما أننا مقلين (كما اتفقنا) ...

ولكني تراجعت بسرعة:) .....


أنا أصلاً عندي كلااااام كتيييير راح أقوله ، وكلاااام راح أقوله مايعجبشي! ...

ف .. يعني .. خليكو معايا وخدوا بالكو ... أنا أصلي ناوي .. ما أطولشي!

يعني عندي مثلاً كلام عن الحنين ...

كلام عن الناس

كلام تاني عن الدنيـــا! وما تفعله في البني آآدمين !

كلام برضو عن الأدب والتدوين والكتابة! ...وجدوى هذه الأشياء المرهقة!

عن الذكريات والأحلام والأمنيات!

عن فكرة بتطاردني بقالها 3 أيام دلوقتي، ومش هقول هيا إيه طبعًا، عشان تنصرف من لوحدها!

.

.

تقريبًا التدوينة كده اتكتب خلااااص، يعني عملنا الوااااجب ... هييييييييييييييييه


نمشي بقى

نشوفكووو في التدوينة الجاااية



هناك 11 تعليقًا:

بنت القمر يقول...

:-)))
متابعاك من زماااااااان ومش لازم اعلق زي الناس ما بتابعني من غير تعليق
وجود تعليق او عدمه مش معناه وجود متابعين للمدونة او لا
كل الناس بتابع عن طريق الريدر
.مش مهم اكتب عشان نفسك اولا
ملاحظة التدوينة دمها خفيف جدا
:)

إبـراهيم ... يقول...

ياما في المدوناااات مــارين (جمع مر يمر مرًا أو مرارًا) ....
تعرفي يا بنت القمر منورة طبعًا جدًا، ومنورة كلمتك دي ( متابعاك من زماااااان)
اتلكلمة مفعمة بإحساس حقيقي وواقعي!
.
.
في اجتماع المدونين الأول اتفقنا إننا لانترك مدونة إلا معلقين تعليقًا معتبرًا لكي نشجع أصدقائنا (المتورطون) الجدد على الاستزادة! ...
وبعدين إيه أكتب لنفسك دي، إذا كان شعاااار الحملة أصلاً من أصلووو ما استحق أن يعيش من كتب لنفسه:)
,.
أنا مش عارف طبعًا لاحظتي خفية الدم فين بالضبط، بس أنا شاااكر محمد شاكر لتعليقك جدًا ...
وأنا عن نفسيتي متابع تعليقاتك ....
.
.
بس ع الفيس توك (وش بيغمز)

رحــــيـل يقول...

ايوون تمام فى امل على فكرة التدوينة دى ممكن تتحسبلك لبكرة يبقى كده مافيش حجة
:)
انت تكتب كل يوم وتحوش لحد متلاقى نت وتنشر مره واحده

ويبقى حققت الهدف من الحملة انك برضه بتكتب بشكل يومى خلال ال 30 يوم

فى انتظار جديدك

آيــة يقول...

:)
بس التدوينة دمها خفيف فعلا يا ابراهيم
...

انا كنت معدية و بسلم و كده
:)

إبـراهيم ... يقول...

سـارة، إنتي مش قلتي هتبقي رحيل، قصدي سارة :)
.... ولا جديد ولا قديم، إنتو تحمدوا ربنا ،
بس إييييه بقى ؟؟؟ مخدتيش بالك من خفية الدم ولا إيه ؟؟

ـــــــــــــــــــ

آآيــــة:
تســـلـــمي
أخيييرًا نورتي ..

ما تحرميناش من نورك

Shaimaa Zaher يقول...

أنا متابعة مدونتك أهو ..صباح الخيرات

بنت القمر يقول...

انت فريند عندي انت مين
:)))

غير معرف يقول...

هيما عندك حق
بعد سنين من التدوين مش لاقيين حد من بتوع زمان كلهم اختفوا
كمان صح اوى موضوع انك لازن تستثير الناس عشان يجوا يقولوا صباح الفل وابقوا تعالوا زورونا
انا الصراحه على قد ما بحب التدوين على قد معدتش حاسه زى زمان
لكن يبقى برضه متنفس لما بنتعب بنرجع له
مستنى بقى ال28 بوست يا بطل
تحياتى

خمسة فضفضة يقول...

متابعين يافندم
بس في صمت

:))

Unknown يقول...

متابعة متابعة
:))

إبـراهيم ... يقول...

أ.شيماء:
منووورة مساااء الفلات
ـــــــــــــــــ

غرباوي:
قوووول للزمان، من فضلك، بعد إذنك إذا سمحت يعني .... ارجع بقى
ـــــــــــــــــــــــــــــ
فضفضة وياسمين:
ياااااااااااااااااااه فكرتوني بأيام زمان منورين

Ratings by outbrain