فوووور.. .مــــات

الأول التهييس :
هما المفرووووض يبقوا (فور ماتوا !! ) على اعتبار إنهم أربعة !!
بس ساعتها يبقى أفضل تقول ( فور ديث) ، وساعتها هتبقى للموت ، وأي نعم أنا كنت كاتب عنه حاجة ، بس مش وقتها دلوقتي !!..
..........................
أصلاً هيا كلمة انجليزي، وتعني في التعريب المباشر (تهيئة)، وعشان اللي ثقافتهم لاوندي ولا زنجباري (فورمات) مش جمع مؤنث "سالم" لفورم ، وفورم دي يعني شكل ، يعني هتقلب على أشكال !! ، لأ ، (فورمات) يعني إيه ؟؟؟
. . . . . . . . . .
يعني (ف عالم الكمبيوتر) تمسح كل اللي فات ، وتبص ع اللي جاي !! ، تبدأ من أول وجديد ، تعمل (كمان)شيفت ديليت ، كلللللللللله يروح، ينتهي كأن لم يكن ، وتبدأ من الأول على بيااااض ! ....
ترجع كل التجارب أولى، وكل اللقاءات أولى، وكل الأفعال بكر،وردود الأفعال طازجة ، مايعودش فيه "المره اللي فاتت" ، و" كل مرة" وآخرة مرة ! ...تنتهي (مرة) من القاموس .....
نرجع من الأول !
ــــــــــــــــــــــــــــــــــــــــــــــــــــــــــــــــــــــــ

وأنا نفسي قوووي أرجع م الأول !!
مش ضروري قوي أفقد الذاكرة !، لأني اكتشفت مؤخرًا إنهم مابيفقدوهاش !!، كانوا بيمثلوا علينا، ....
بس أنا محتاج أبدأ من الأول :
اسمي إبراهيم
ـ أهلاً وسـهلاً ... وأنا ...
بأول ابتسامة غصبن عننا ، بأول توقع أو عدم توقع لاستمرار العلاقة، بأول كلمة حلوة اتقالت ، ماأنا همسح كل القديم ، القديم أكيد فيه حلو ووحش، مايضرش، يروحو مع بعض / لما هنبدأ م الأول هكون أكثر حرصًا !! ....
لأ أنا كداب ، مابعرفش أكون أكثر حرصًا ، أنا كده على طول !!!
بلاش الكلام الحلو
خلينا لما نبدأ من الأول نحرص على الحيـاد !
لا حلو، ولا وحش
بس نحافظ على براءة اللحظات الأولى !
ــــــــــــــــــــــــــــــــــــــــــــــــــــــــــــــــــــــــــــــــــــــ
ف الكمبيوتر عندي بحتفظ بملفات كثيييييييير، بالهبل ، لما بفرمت مش بفرمت غير الجزء بتاع النظام السي، الباقي فيه ملفاتي منذ جبت الكمبيوتر ، كثير لما بفرمت الجهاز، وأبدأ فيه من الأول أسأل نفسي هيجرى إيه لو فرمتت الجهاز كله، وأصبح جهازي بلا ذاكرة، أصلاً كثير بفكر لو الهارد بااظ ولا حصل له حاجة هعمل إيه !، عادي ، اعتقد عادي ، أقدر أبدأ من الأول وجديد، ما كل حاجة فيه أنا اللي عاملها ،صحيح هفتقد شوية ملفات، على كام صورة، على كام أغنية حلوة، على كام كلمة ، وكام نص، وكم كتاب، وكام موقع، وكام برنامج، وكام .............. بس كله يتعوض !!!!
لأ ، مش كله يتعوض قوي !!
فيه حاجات ما تتعوضش
لأ ، تتعوض . . . .!!
مش عارف !
بس أنا لسه مجربتش أفرمت الجهاز كله !
وبعدين يعني لو فرمتت الجهاز كله ،لما امشي ف الشارع مش هيعرفوني !!
عارفيني
ده حتى البقال الحقير هيقول لي : أيوة اشتريتها مني المرة اللي فاتت
ما أنا مش هروح أسأله(إنتا تعرفني ؟!!) ، هوا اللي يهتعامل معايا بود من رآني من قبل !
ده غير اللي عارفيني !
مش هعرف أبدأ معاهم من الأول خاااااااالـــص !
خلااص، الأول راح، وراحت معاه كل حاجة !
مش بعرف أمثل !
هيا حادثة !!
واضح إني هفضل مستنيها كثيييييييير
مش بس لأني باخد بالي من العربيات وأنا بعدي ، لأ، لأن الناصحين محدش فيهم متهور، أصلهم فاكرين لما يخبطوني هموت !!!
ــــــــــــــــــــــــــــــــــــــــــــــــــــــــــــــــــــــــــــــــــ
الكلام كثر قوي !
وبقى شكله باااااااااااايخ !!!
أحسن عشان محدش يقراه