أنا وأنــــــا ... خـالد علي !

في تدوينة سـابقـة أشـرت إلى أن خالد علي صديقي الشـاعر المغمور كتب قصيـدة توضح ، وفي شيء من الاختـصـار والشعر الجميل فلسفـة ( أنا وأنـــا ) ، ومش هقول لكم إني منذ ذلك الحين وأنا بطلب منه ( بلااااش بتحايل ، وبترجى ، وبكلمه ف تليفونات ، وإيميلات ، وماسنجرات ، و بلااااوي بيضا !! ) لكن المهم إن القصيــدة وصلت يا جدعاااااااااان ، قصيدة أنا وأنا للشاعر المغمور خالد علي ، زي ما انتو شاي فينو

انا ........وانا
ونايم
إيدي تتلفت
مكان دافي ..
ومين الليلة نام جنبي
واراجع كل احلامي
الاقيني
مافيش غيري
انا جنبي ..
( انا ) نايم
وانا نايم
وانا قايم لقيتني مشيت ..
وافكر ليه انا سابني
واكلمني وانبني
انا دايما بخالفني ..
بطنشني ..
بعاندني ..
وبخنقني ..
وانا صابر ومستحمل
بلا نفسي
واتاريني
نفد صبري
ماعارفني
وانا من امتي عارفني
ده انا من يوم كارهني
انا في دنيا
وانا في دنيا
ما نتقابل
وبحزن
قلبي يتحسر
ما اقف جنبي
أقومني
انا ناكر سنين العشرة جوايا
ندالة .. ولا خوف مني؟
ولا رافض أواجهني؟

وياما وقفت قدامي
ببص لشعري
لإديـــا
واركز حبة ع الياقة
ولا فاكر في يوم بصيت على عيني
ولا بصيتلي من جوة
انا غيري
انا هوا
ومين هوا
لا انا عارف
ولا هو
ودلوقتي انا رايح
وانا راجع
انا ماشي وانا واقف ..

ويتحير تراب الارض في خطايا
وتتقلب هموم الدنيا جوايا
وتتحول حياتي لدايرة
تتقسم تصير موجة
انا هاغرق
اكيد هاغرق
انا ...
انا باين...
انا غرقان ولا داري
انا فيني ؟
انا .........وانا برضه
بنتجمع
ولكني بقيت بره
انا ميت